Filemónchi

Pabloꞌ pilla kiika Uraꞌ chusa tindu

1 Ñu,

laaba bulu taawasha kemu, lalaꞌ estennu naatala Filemón, iya, Pablo, Jesucristoꞌ mityan peesu pumu ruku, tsenmin Diosnu keenguemu lalaꞌ naatala Timoteoba, ñunu entsa kiika piikendetsuyu, 2 naa keenguemu tsujki Apianu bain, naa laaba bulu Jesucristoꞌ mitya deraꞌ taawasha keꞌ keenguemu naatala Arquiponu bain, naa ñuꞌ yanu waku waꞌdimu keranguemulanu bain tsangue piikendetsuyu. 3 Lalaꞌ Apa Dios bain, Bale Ruku Jesucristo bain ñullanu estyaꞌ keewareꞌ nejuu tiba bulla jutyu uraꞌ dechujtiꞌ jintsusa tenve.  

 

4 Naa-uwanu

Diosnu yuj urave tindu

bain Diosba kuinda kendu ñunu mandengamiya ñuꞌ mitya Diosnu yuj urave tiitiyu, 5 ñu Bale Ruku Jesúsnu naake uraꞌ keenguen chumu juñu bain, tsenmin Cristonu keenguemulanu bain naa-i estyamuñu bain, juntsa kuinda mere merekeꞌ mitya. 6 Tsenmin Diosnu paꞌmu juyu, ñu bain keenguemu jutu tyee uraa dejuñuba juntsa dekeemijaꞌ Cristonu estyan mityaren veelanu tsa tsangue dekenuu juñu. 7 Keranguemu naatala, ñu keranguemulanu estya estyaiñuꞌ mitya mika sundenñu, sundengaa chunayu, tsenmin ñuꞌ mityaa keenguemu chachillaꞌ tenbuka bain demasundyawarañuꞌ mitya sundenna chuyu.  

 

 

8 Naa

Pablo, Onésimoꞌ mitya laꞌkaꞌ pami.

iya Cristoꞌ mitya kuinda kenu eramu ruku jutu, ñunu naakesa tenñuba juntsanguide tinuu juꞌba, 9 tsandityuꞌ laatala estyamu jutaa ñunu uꞌtandinu tenve. Iya Pablo, yumaa derukuuyu, Jesucristoꞌ mityan peesu punaashu juntsa unbere, 10 tsejtu ñunu Onésimoꞌ mitya tiꞌ uꞌtandinu tenve. Yaa iya peesusha puñu keranguemu tiyatu, in na juuñuu tiyaive. 11 Yaa kaspeleya ñuchi uuden iꞌ taawasha kiikemu jutu, juiꞌñuba ne uraa tichiba balejtu juwaave, tsaaren challaya naa ñuchi bain, naa  

 

 

644

 645

FILEMÓN

inchi bain pureꞌ balee a juve. 12 Challa ñuꞌ junga me-eentsuyu, naamika yanu yuj estenñu bain. 13 Ñu engu putyuñu, yaa iba enu bulu puꞌ, Diosaꞌ mika ura kuindaꞌ mityan in peesu puinsha ñuꞌ mitya kivetentsusa tenna juꞌba me-eentsuyu. 14 Tsaaren ñuren uwain tsanguiñu urave tindyuya tsanguen jutyuyu, tsenmalaa ñu tsangueꞌ inchi uraa keꞌ bain iya tsanguisa tiꞌ uudenguiñaa tsanguisa tendyuꞌ, ñu maalin tsangueñu urave tyataa tsanguisa tenñuꞌ mitya. 15 Tsandenna Diosyaaba entsangueꞌ Onésimonu jayu tinbuꞌ mitya ñunu baꞌkeꞌ jikareꞌbanguimee tenve; tsenmalaa ñu umaya yanu mangatu naa-uwanuba tsana tananutsu, 16 tsaaren umaa ne ñuchi manda-iꞌ taawasha kemu chachin juu jun jutyuve; manda-iꞌ taawasha kemu chachillanuba kayu pulla uraꞌ kuraa junu tsuve, umaa ñuꞌ estyanu keenguemu naatala junu tsuve. Iyaa yanu mika estyamu juyu, tsaaren ñaa kayu inuba pullai estyanu juve, tsejtu ne ya chaꞌ ruku juñun tsa jutyuꞌ, Bale Rukunu keengueꞌ naatala juñuꞌ mitya bain tsai estyanuu juve. 17 Tsaꞌ mitya, ñu inu keranguemu naatala kureꞌ iba bulu taawasha kemuyu pensa jutuya, Onésimonu ne iyaaba juñu mamikan tsanguide. 18 Tsenmin ne ñuchi tibillaaba urajtu kemuwaañu bain, naa ne tiiñuba nelunañu bain juntsan mitya inaa manbaꞌsa tenve. 19 Iya, Pablo, enuren in tyaapachi pillakeꞌ ñunu tsandintsuyu: uwain manguwanuu junu tsuyu. Tsandityuꞌ bain, ñuren inu neenañuu juve, iya ñuꞌ mitya naakeꞌ keenguemu tiremuwaañu bain juntsan mitya. 20 Tsaꞌ mitya, naatala, ñu Bale Rukunu keenguemuya, juntsaa kemishtika tenve; tsejtaa Cristoꞌ mityaren in naatala jumuya tsangueꞌ in tenbuka sundyawaade. 21 Ñunu entsangueꞌ piikemiya naa uraꞌ meedinuuñuba miꞌ mityaa tsanguiyu; tsenmin iya miyu naa tsanguide tiꞌñu juuba kayu dekivetekenuu juñu bain. 22 Tsenmin inchi aangu jaꞌ chudinuu jumu bain uraꞌ dekide; matyu ñulla Diosba kuinda keꞌ tsanguisa tiꞌ pakendetsuñu, Dios pakatu, inu engu mangalareꞌ ñullaꞌ junga jikaanu juve tenna keenaꞌ mitya.  

 

 

 

 

 

 

 

 

 

 

23 Jesucristoꞌ

De-insha palaa

mityaren iba bulu peesu pumu Epafras ñunu uraꞌ chusa tintsuve, 24 tsenmin iba bulu taawasha kiveꞌmula Marcos bain, Aristarco bain, Demas bain, Lucas bain tsaren ñunu uraꞌ chusa tindetsuve. 25 Kumuinchi ñullanu Bale Ruku Jesucristo estyaꞌ keewaasa tenve.  

 

a 1.11 Griego palaachiya Onésimo mumu tiba kenchi pureꞌ baleeve titundive.