Timoteochi

Pabloꞌ pilla kiika pallu

1

Uraꞌ chusa tindu

1   Iya

Pablo, Diosren tsaa mutyañuya, Jesucristoꞌ mitya kuinda kenu laraꞌ eramu ruku juyu, tsejtu lalanu Jesucristoꞌ mityaren Dios uwain chuwaanbera kenu tsuyu tiꞌ tsandipamuwaañu, juntsa wandis neneimu ruku juyu. 2 Timoteonu, keenguemu in estennu na juuñuu jumunu, entsa kiika piikentsuyu. Lalaꞌ Apa Dios bain, Bale Ruku Jesucristo bain estyaꞌ keewareꞌ, tenbikereꞌ, tiba bulla jutyu sunden dechujtisa.  

3 Naa-uwanu

Jesucristo naa naake uraꞌ keñu bain

bain Diosba kuinda keꞌ ñunu tengaya jujuuyu, tsejtu ñuꞌ mitya naa mandala bain, naa kepe bain Diosnu yuj uraꞌ kive tiitiyu. Tsenmin in tinbu aa-apa millala tsaa juꞌ, i bain yala naake meengueꞌ yanu aawa kureꞌ keewaamu deeñuba i bain tsaren kentsuꞌ tenbuꞌ pensa tiba firuꞌ jutyu tsanguentsuyu. 4 Ñu waamuwaañuba chaiba tengaya juꞌ, ñunu mangatanu tenve, tsaiꞌ ñuba mika sunden manbuinu tenñu. 5 Tsenmin naa ñu uwain Diosnu uraꞌ keenguemuwaañuba tengaya juyu. Ñuꞌ aa-mama Loida, ñuꞌ ama Euniceba ajkeꞌ tsaawa deeñu, ñu bain uwain tsaa juꞌ uraꞌ keenguemu juve pensa juyu. 6 Tsajuꞌ iya ñuꞌ mishusha taꞌkañu, Dios ñunu naajusa tyaꞌ bain tsanguikaanuu tireñu, ne ñeeba juñu aa malluꞌwaren tsa tsanguisa tenve. 7 Matyu Diosya jeetyawaamu espiritu juuya lalanu kuwaindyuꞌ, tsamantsa pude jumu, naa munu bain estyawaamu, tsenmin lalanu maaliren tyee urajtu kiikenu tyamu juꞌba juntsa tsanguityuu tirekaamu espiritu juuya kuwave. 8 Tsaꞌ mitya lalaꞌ Bale Ruku naajuñuba yaꞌ mitya papatinu yujtyatyude, tsenmin naa in mitya bain yujtyatyude, naa iya Jesúsꞌ mityaa peesu puñu bain. Tsajuꞌ Diosren ñunu naajusa tyaꞌba tsaa tireꞌ dera kuwantsuñu, Diosaꞌ mika ura kuindaꞌ mityaa taaju iꞌ puinuu junmalaya, ñu bain taaju iꞌ puinuu jude. 9 Diosya lalanu livee keꞌ yachin juu chachi detirenu miꞌkeꞌ kave. Tsanguetu ne lala tyeeba uraa kiikemuwa deeñu, juntsan  

 

 

 

 

 

633

2 TIMOTEO 1​, ​2  634

mityaa tsanguindyuve; tsanguemiya Diosya naa entsa tuba jutyunu uwanun lalanu Jesucristoꞌ mityaren tsamantsa estyamuwaꞌ mitya tsanguenuu juwaataa tsanguive. 10 Tsejtu challa lalanu livee kemu Jesucristo jañaa, juntsa mika estyaꞌ keewara entsai katawave, tsejtu tuꞌkaamu jumunu pullaꞌ, ñillu dangaakiñungueꞌ, Diosaꞌ mika ura kuindaꞌ mityan naa-uwanuba chuwaanuu tireve. 11 Tsejtu Dios inaa juntsa kuinda tsandis neneide tiꞌ uudengueꞌ, Jesúsꞌ mitya kuinda kenu laraꞌ eramu ruku tiremin, mashturu tireminguive. 12 Tsejtu juntsaꞌ mityaa iya tiba entsaa taaju de-iꞌ pullantsuyu. Tsaaren naa tsaindu bain juntsan mitya yujtyanu jutyuyu, matyu iyaa munaa kerangueꞌ keenaꞌba nara miꞌ mitya, tsenmin Dios inu Jesúsꞌ majangama washkes jintsunu juve tenna juyu. a 13 Iya naa naake mijakaamuñuba juntsaatalaa keetadiꞌ tsa tsanguide, tsenmin lala Jesucristoꞌ mityaren ya mika aa uraꞌ kiñu, Diosnu keenguenutala bain, naa estyanutala bain naa naaken chunuu juñuba tsanguen chude. 14 Tsenmin juntsa tsamantsa naraa kuinda Dios ñunu veelanu mijakaasa tyaꞌ kuwañu, lalanu chumu Espíritu Santo tsanguemishtiñu, deechuꞌ mijakaade. 15 Ñuya yumaa mive, naa Asia pruvinsiasha keranguen chumu chachilla kumuinchi inu demanbakaꞌ mijideiñu bain, tsejtu juntsaiꞌ mavelamulaba, naa Figelo bain, Hermógenes bain juve. 16 Bale Rukuya, Onesíforoꞌ bululanu tenbityasa; yaa pureꞌ bijee inu masundyawaa jamuwaave, tsenmin naa iya peesu puñu bain juntsan mitya ne yujtyai bain ityuwaave. 17 Tsa jutyuꞌ naa-inga, ne yujtyaiba iinuuren yujtyatyuꞌ, neiꞌba enu Roma pebulunu vijamin, naa lekabanguiꞌmujchi inu miꞌketintsuꞌ katanbera kemuwaave. 18 Tsaꞌ mitya kavitu dekenu malunu Bale Ruku, yanu yaꞌ ajuusha tenbityasa tenve. Tsenmin juntsa unbereya lalanu Éfeso pebulunu naake uraa kemuwaañuba ñu bain nara mive.  

 

 

 

 

 

 

 

 

2

Cristochi uraꞌ suutadu juuñuusai.

1   Ñu,

in na juuñuu jumu, Dios tsamantsa aa ura ruku juꞌ, Jesucristoꞌ mityaren mika uraa keñu juntsan mityaa kayu dera mandiyaꞌ jijiintsude. 2 Iya pureꞌ chachillaꞌ ajuusha naatintsu meenaꞌ bain, ñu uwain tsanguenbera kenuu rukulanaa juntsa tsa mandinu uudenguide, tsenmala yalaa kayu veelanu bain mijakaanudetsu. 3 Naa taaju iꞌ llakinguendu bain, Jesucristochi mika uraꞌ suutadu juuñuu juꞌ, masmiꞌ miinu kityude. 4 Naaju suutadulaba yalaꞌ suutadu taawasha kiikenduya, yalaꞌ bale chachillaꞌ ajuusha tene uraꞌ katawanu kiikendetsuꞌ mitya, ne chachillaꞌ kiikenutala paveteꞌ bulla kiveꞌtyu deeve. 5 Tsenmin tsaren  

 

 

 

a 1.12 Dios inu Jesúsꞌ majangama washkes jintsunu juve tenna juyu tityumujchi, Dios yachi mika ura kuinda inu kuwamuwaañu, Jesús majangama kemishtiꞌ yaꞌ kuinda deechuꞌ mijakaras jintsunu juve tenna juyu tiꞌ aseetanguikara bain junu juve.

 635

2 TIMOTEO 2

juve naa ti aikikemulachi bain; yala pullaꞌ tyeeba kanu tyashu juntsaa, naake aikenu uuden juñu bain tsa tsangue uraꞌ aiketun pullainuu judeeve. 6 Tsenmin tsaren juve naa jeendaa taawasha kemu rukula bain, yalaꞌ taawashanu mika kendyaꞌ kemu jushu juntsaa, puꞌ tinbu inmalaya muꞌ mityaba yalaa ajkeꞌ kanuu junu dejuve. 7 Entsa iya patintsaashu juntsanu tejan pensangueꞌ keekide, tsenmala Bale Ruku ñunu uraꞌ aseetanguikaanu tsuve. 8 Rei David millanu seraꞌ jimu ruku peyaturen mangujtamu Jesucristonu naa-uwanuba tengaya jude; iya Diosaꞌ mika ura kuinda kes neintsaashu juntsanu juntsandive. 9 Tsenmin iya entsai taaju indu bain, naa leichi kuipa vimu ruku juuñu juꞌ jeru chuwachi telaa puꞌ bain, livee inu kuinda mijakaren mityaren tsaintsuyu; tsaaren naa iyaa tsanañu bain, Diosaꞌ kuindaya jeru chuwachi teetsunatyuve. 10 Tsaꞌ mitya iya naa entsanaꞌ taaju indu bain, Dioschi miꞌkeꞌ kayalachi uraa kendaa tsaintsuyu, tsenmalaa yai bain Jesucristoꞌ mityaa tsa-iꞌ liveeju detiyaꞌ naa-uwanuꞌ mityaba tsamantsaa chunu tiyanudetsu. 11 Entsa palaa uwain tsa deeve: Lala yabaren bulu peyaiñu deishu juntsaya, yabaren bulu chunu detsuyu. 12 Taaju induba tsaaren chuꞌ puulaꞌ jijiintsushu juntsaa, yabaren uudenguen chuinsha chunu detsuyu. Lala yanu kerajdetuyu tishu juntsaa, ya bain lalanu kerajtuyu tinu tsuve. 13 Naa lalaya yanu keenguindanda deeñu bain, yaa naajuwaꞌ bain tsarenju jintsumu juve, ya naatiꞌ bain masmiꞌ manbaꞌ anbutitinuu jutyuꞌ mitya.  

 

 

 

 

 

Dioschi mika uraꞌ kemu

14 Entsa

palaanu mandengaapuꞌ Diosaꞌ ajuushan entsaaya kityudei tiꞌ uudenguetu, tiba uraa kikaakenuu palaa jutyutalaya depaꞌ vinbatyudei tide, matyu tsaa peletu palaa jumulaya urajtu juꞌ, meenamulanu naꞌbaasa detujlewaakemu palaa ne judeeñuꞌ mitya. 15 Ñuꞌ pudengama taawasha keꞌ Dioschi mika uraꞌ kemu rukuve tikayanu jude; tiꞌ mityaba ne yujtyainuu kityuꞌ, tyee ura kuindañu bain juntsaa naake mijakaanuu juñuba tsangue uraꞌ mijakaamu ruku jude. 16 Diosnu firuꞌ kuraa palaa juula bain, naa paiꞌñuba ne uraa palaa juu pandetsunmala paveꞌtyude; mun tsaa palaanun papatintsumulaya firuꞌ juunutala kayu firuꞌ tiyanchi ne iimu deeve. 17 Tsajuꞌ juntsaa mijakara jumulaya chaꞌ alla depeꞌwaakemu bishpee juuñu juꞌ, kayu awaꞌ jinchi ne iimuve. Tsenñu tsaa iiñuuya de-ive Himeneo bain, Fileto bain. 18 Tsejtu yala anbuda jutyu palaa jumunaa tsaa tujledekeꞌ, lala peyaturen mangujnuu juñutala bain yumaa tsaiꞌ mangujpaiñuu dejuyu tis neꞌ, mantsa chachillanu veraꞌ pensa manguikareꞌ tujlekaandetsuve, yalaꞌ keenguiñutala. 19 Tsejtu tsangueꞌ veraꞌ mangue manguekenu deeñu, Diosya  

 

 

 

 

2 TIMOTEO 2​, ​3  636

tsanguen jutyungue tireꞌ ma tyutya uikaakiñungueꞌ, juntsanu entsangue piikive: Bale Rukuya naajulaa yaꞌ chachi deeñuba kerave, tsenmin entsa bain entsa pillave: Mun Bale Rukuꞌ chachi keengaya jumulaya urajtu junutala, tsaa bakaꞌ jiidei, b tiꞌ pillave. 20 Ma aa yanu naa uruchi bain, naa lushi kenu jeruchi bain tyeeba dekeñu juulan tsunatyu deeve, naa chichi dekiñu juula bain, naa tuchi dekiñu juula bain tsumu deeve; tsenmin junu mantsalaya balengureꞌ tyeeba kendu menestenguentsumi bain, naa ne menestenguentsumi juula bain tsumu deeve. 21 Tsajuꞌ mun juntsaa urajtu kiikenutala tsanguen chutyuꞌ bain, tyeeba naraa, Dioschin juu jumu, tsenmin Bale Rukuchi tiba uraa kenu menestenguentsumi juuñuuya junu tsuve, tsajuꞌ tyee uraa kiikendu bain meneste i-iimu junu tsuve. 22 Tsaꞌ mitya unnalaꞌ firuꞌ kenu tyatyainutalaya nepiyaꞌ jiiñu-ide, tsejtu Dios naakesa tyañuba tsanguen chunu junuutala bain, naa uraꞌ keenguen chunutala bain, naa munu bain uraꞌ estyan chunutala bain, tsenmin tiba bulla jutyu nejuu chunutala bain juntsaaya ken chude, tsajuꞌ naajulaa yalaꞌ tenbukasha tiba firuꞌ pensa jutyu deeñuba juntsaa chachillabaa Bale Rukunu pakan chude. 23 Paiꞌñuba ne uraa balejtu kuinda juubillaya paviikenu kityude; ñu mive tsaa palaa jumulaya vinbakaanun ne bale deeñuba. 24 Tsenmin mun Bale Rukuchi taawasha kemu juꞌ bain, ne vinguikes nemu chachi jun jutyuꞌ, kumuinchi chachillaba uraꞌ kiiken chumu junu juve. Naajulanu bain tiba uraꞌ mijakaamu junu juve, tsenmin jei naꞌbaasa kidandai paijtyu ruku junu juve. 25 Tsenmin naa tyeeba depaꞌ, tsa jutyuve tiꞌ masmiꞌ pamulanu bain mika tenbityaꞌ uraꞌ paꞌ mantseꞌkaamu chachi junu juve, yalanu Dios vetaꞌ pensa kekaashu juntsaya meengueꞌ yachi anbuda jutyu kuindanu keemijanuu dejuve tenna jutu, 26 tsenmalaa yala Dyabuluchi kayaañuu dejuꞌba uraꞌ pensa demangueꞌ, livee iꞌ demalumiya, Dios naa naakekaanu tyañuba juntsaaya kemu tiyanudetsu.  

 

 

 

 

 

 

3

1   Tsenmin

De-inu tinbusha naa-intsunuuñu bain

ñu entsa bain pashkatyude: de-inu tinbu kalenainsha tiba tsamantsa taaju kenu malu junu juve. 2 Chachilla yachin uraa tene miꞌkemu tiyanu detsuve, lushiren aa tadinu pensaa, dajtyamu, tiba narakeꞌ nechi tene tyaimu, tejkureꞌ pamu, naa yaꞌ apalanu bain meenguityu, naa veela yanu uraꞌ dekiñu bain vejmiꞌ juntsangue uraꞌ mantyu, Diosnu balengureꞌ keenguenutala bain balenguutyu, 3 estyaꞌ keekibanguityu, vetaꞌ vetaꞌ uraꞌ mandindyatyu, naꞌbaasa kuinda mereꞌ mawandis nemu, yala tyee firuꞌ kiikenu tyaꞌ bain tsanguenbera kiikemu, tsamantsa firuꞌ kiikemu chachi, tiba uraa kiikenutalaya kerandyatyu, 4 yaichi uraꞌ kera chachillanun kundaa kemu, ti keꞌba tejan pensangueꞌ kityu, tsenmin tiba  

 

 

b 2.19 Números 16.5

 637

2 TIMOTEO 3

uukeraa tene keꞌ neneichi tyaꞌ Diosnuya miꞌkiꞌmujchi yala tyee kiikeꞌ sunden puinu tyaꞌba juntsaa tene aa kiikemu junu detsuve. 5 Tsenmin tsa jutyularen tsaañungue keewareꞌ Diosnu mika uraꞌ keenguemu deeve tikayainuuya kiikenu dejuve, tsaaren yala tyee kiidekiñuba juntsaren mijakaanu juve, yala uwain Diosnu balenguutyu deeñuba. Tsaꞌ mitya juntsaa chachillabaya jaiba buudityude. 6 Tsajuꞌ juntsaa chachillaa naa vee yatala bain vis neꞌ, puluꞌ pensajtuꞌ tiba firuꞌ juu kendyaꞌ ujcha lan chumu supulanu anbuda keranguikares neneimu deeve, 7 matyu juntsaa supulaya tiba mijatindu bain tyee ura uwain tsaañuba uraꞌ aseetanguenu dejutyuñuꞌ mitya. 8 Entsa chachilla bain kaspee tinbunu Moisésnu meedindyatyu mirukula Janes, Jambrésba naajuwa deeñu bain tsaren dejuꞌ, anbuda jutyu kuindanaa meedindyatyu deeve. Matyu firuꞌ juu kiikenu tene pensaa chachi dejuꞌ, Diosnu keranguityun mitya, yachi mutyaꞌ keraiꞌnu chachilla deeve. 9 Tsaaren yala tyee kenu tyaꞌba tsangue kiikenuu dejutyuꞌ, kaspee tinbunu Moisésnu kundaa kemu pai mirukula tsaaya, ti kenduba pensangueꞌ kityu dejuꞌba chachillachi entsai katawamu deesu, entsalanu bain tsangue kataꞌ tiba aseetajuꞌ kityu deeñuba keemijanu dejuve.  

 

 

 

 

10 Tsaaren

Pablo, Timoteonu uudenguiñu palaa

ñuya, iya naa naake mijakaamuñu bain, naa naaken chumuñu bain, iya tyee kenu pensa juwaañu bain, iya naake keenguemuñu bain, iya naajuꞌ teꞌ kidandai paijtyu juñu bain, iya naa-i estyamuñu bain, tsenmin naa iya tituba induba tsaa jintsumuñu bain tsanguenu mijañuve, 11 tsenmin naa inu tuꞌnu bendaa dekiñu bain, naa taaju-iꞌ puimuwaañu bain ñu juntsa mijave, tsajuꞌ juntsaaya inu de-iꞌ puimuwaave, naa Pisidia tusha Antioquía pebulubi bain, Iconio pebulubi bain, tsenmin Listra pebulubi bain, tsejtu tsaimuwaañuba, Bale Rukaa inu livee iwareꞌ puiteve. 12 Tsajuꞌ mun Jesucristoba jutu naaju chunuu juñuba tsanguen chunu tyamulaya uwain firuꞌ inu desuraꞌ taaju in chunuu dejuve, 13 tsaaren firuꞌ ken chumula bain, naa anbukuinda keranguikaren chumula bain yalaya kayu firuꞌ tiyaꞌ jinchi ne iintsunu dejuve, veelanu anbukuinda keranguikareꞌ, naa yai bain anbukuinda keranguikaras jijiindu. 14 Tsaaren naa tsa deeñu bain, ñuya tyee mijaꞌ uwain tsaave tenna juꞌba juntsanu tsarenju jintsude; ñuya mive naajulaa tsaa demijakaañu mijaꞌ bain. 15 Tsenmin mandengakide naa ñuya kayiimalaren Diosren piikikaañu kiikanu mijamuwa juꞌ bain. Juntsaa ñunu uraꞌ aseetaju tireꞌ Jesucristonu keranguen mitya livee iwaanu tirenu juve. 16 Diosaꞌ Kiikaya kumuinchi yaa tsangue depiikesa tyaꞌ pensanguikareꞌ piikekaañu jumuve, tsajuꞌ uraꞌ kuinda mijakaanu bain, uumiꞌteꞌ uraꞌ mandirenu bain, Dios naakesa tyañuba tsanguen chumijakaanu tirenu bain baleve, 17 tsejtaa Diosaꞌ chachi jumulaya naaketaa uraa kenu dejuꞌba aseetajuꞌ tsangue kiikenun jutyuu tiyanudetsu.  

 

 

 

 

 

 

2 TIMOTEO 4  638

4

Diosaꞌ palaa mijakaade.

1   Jesucristo

rei juu majaꞌ, naa bibu chumulanu bain, naa pemulanu bain kavitu kenu tsuve. Tsaꞌ mitya Diosaꞌ ajuusha bain, naa Jesucristoꞌ ajuusha bain ñunu entsandiꞌ uꞌtandinu tenve: 2 Diosaꞌ palaa mijakareꞌ, naa-uwanu mijakaanuu malu faañu bain, naa mijakaanuꞌ jutyuu malu faañu bain tsa tsanguide. Tsejtu nepaꞌ deechuꞌ mantseꞌkaade, uumiꞌtekenaꞌ bain, tsenmin sunden pensa manguwakenaꞌ bain tsa tsanguide jei kidandai paijtyuꞌ uraꞌ mijakaandu. 3 Diosaꞌ mika ura kuinda mijakaranu, chachilla de-abuindyaꞌ mameendyatyuꞌ, yala tyee kiikendyaꞌba tsa tsangueꞌ, pureꞌ mashtuu mityakeꞌ, yala tyee mereꞌ mijandyaꞌba juntsaaya mijakutinu tinbu janu juve. 4 Tsejtu anbuda jutyu kuindanuya meenguityui detiyaꞌ, anbukuinda, tinbu palaanu tene mameenguekenu detsuve. 5 Tsa deiñu bain, ñuya uraꞌ pensa juuren tsanaꞌ, naa taaju iꞌ pullandu bain tsaaren jintsude, tsejtu livee inu kuinda mijakareꞌ papatiꞌ, ñuꞌ kenu taawashanu uraꞌ kiikeꞌ jide. 6 Iya animaa tuteꞌ Diosnu kuwanu uranu binu yuutsuuntsumi juuñuu, yumaa tsaiꞌ tutaꞌ in asa yuutsuunun jutyunayu; inchi peyanu malu kalenave. 7 Iya vinguen tsanguendu mika uraꞌ kiikeꞌ puiñuu-iyu; nuka tyuinajinaa tsaindu bain yumaa junbi tyuinajiiñuu-iꞌ dekiyu; in uraꞌ keranguenu pensa masmiꞌ manguiꞌmujchi tsaaren jiyu. 8 Tsejtu umaa iya keenamiya Bale Ruku mika uraꞌ kavitu kemu ruku, juntsa malunu iya Dios naakesa tyañuba tsanguen chun mitya inu tyeeba meꞌnu juñu juntsa kanun keranayu. Tsaaren juntsa ne inuren kuwaken jutyuꞌ, naajulaa ya manen maanu juñu, uwain tsaisa tyaꞌ sunden dekeenañuba juntsalanu bain tsaren kuwanu tsuve.  

 

 

 

 

 

 

Naa naakesa tyaꞌba Pablo tsandimi.

9 Inu

teꞌ mangueejanu kisa tenve, 10 matyu Demasya entsa tusha tiba kataamulanaa kayu aa estyaꞌ, tsaa inu manbakaꞌ miji-iꞌ Tesalónica pebulusha mijiive. Crescenteya, Galacia tushaa jive. Tsenmala Titoya Dalmacia tushaa jive. 11 Tsenñu enuya Lucasren iba bulu punave. Maandu Marcosnu miꞌkeꞌ ñuba miyaꞌ jade; yaa in taawashanu pureꞌ kemishtikenuu juve. 12 Tíquiconuya, Éfeso pebulusha erekiyu. 13 Tsenmin maandu Tróade pebulunu Carpoꞌ yanu inchi palanu vikeꞌ nenu jali shuikikeesu juntsa mandaasa tenve, naa kiika juula bain. Tsaaren vejan kiika mandaatyuyu tiꞌba, pijtaa judeeshu juntsa kayu bale kiikalaya mandaade. 14 Jerutala taawasha kemu ruku Alejandro inu pureꞌ urajtuu kikive. Tsaaren Bale Rukaa ya inu tyee kiñuba juntsan mitya taaju puitenu juve. 15 Tsaꞌ mitya ñu bain juntsa unberenu keetadiꞌ pashkatyu jude, lalaꞌ mijakaanu kuindanu tsaa kundaa tiyaiñuꞌ mitya. 16 Inu bale rukulaꞌ ajuusha ajkeꞌ bijee balelaꞌ pakanu uwanu, mu bain laꞌkaveꞌtyuꞌ, kumuinchi inu mijapetse kityuꞌ, tsaa maali tiredekiwa. Tsa deiñu  

 

 

 

 

 

 

 639

2 TIMOTEO 4

bain, Dios yalanu kuipa putyusa tenve. 17 Naa yalaa tsa deiñu bain, Bale Rukuya in keenu puꞌ puulamishtiwa, tsangueꞌ livee inu kuinda Diosaꞌ palaa meenakareꞌ, naa kumuinchi judío chachi jutyulanu bain demijakaakaawa. Tsejtu kela juuñuulachi mika taaju inundiyantsuren Bale Ruku inu laꞌkaꞌ livee kiwa, 18 tsenmin tiba urajtu juulachi bain inu tsaren livee keꞌ jintsunu juve, tsangueꞌ washken tanaꞌ bene selusha yaꞌ chuinsha miyaꞌ jinu tsuve. ¡Yaa naa-uwanuba balengurasa! Tsaasa.  

 

De-insha palaa

19 Priscanu

bain, Áquilanu bain, Onesíforoꞌ bululanu bain, uraꞌ dechusa tide. 20 Erastoya Corintobi shuwave, tsenmala Trófimonuya Mileto pebulubi shuikiwayu diluiñu. 21 Kayu shu tinbu mandiyaindyuren teꞌ maanu kide. Eubulo bain, Pudente bain, Lino bain, Claudia bain, kumuinchi keranguemu naatalala bain ñunu uraꞌ chusa tindetsuve. 22 Bale Ruku Jesucristo ñuba bulu jusa, tsenmala Diosya kumuinchi ñullanu estyaꞌ keewaasa.