Pedroꞌ

pilla kiika main

1

Uraꞌ dechusa tindu

1   Iya,

Pedro, Jesucristoꞌ mitya kuinda kenu laraꞌ eramu ruku, entsa kiika piikentsuyu ñulla ñullaꞌ tunu deluꞌ jiꞌ vee vee pruvinsiasha, naa Pontosha bain, Galaciasha bain, Capadociasha bain, Asiasha bain, Bitiniasha bain chudenashu juntsalanu, 2 ñullanu lalaꞌ Apa Dios kaspelen ya tyee kenu juꞌba tsanguenu miꞌkeꞌ kamuwaave, tsejtu yaꞌ Espíritu Santochi ñullanu yachin juu detireve, tsenmalaa yanu meenguemu detiyaꞌ, Jesucristoꞌ asachi shajaraꞌ tyatyuꞌ ñullaꞌ ujcha pitsalanudetsu. Dioschi mika estyaꞌ keewaraꞌ tiba bulla jutyu uraꞌ chudei.  

3 Lalaꞌ

Livee inbera inu dejuyu tenna keenanu

Bale Ruku Jesucristoꞌ Apa Diosnu mika urave tisai, yaa lalanu mika tenbityanchin Jesucristo peyaꞌ tsuñuren mangujteve, tsejtaa lalanu kasa na mangayaiñuu tireꞌ, uwain livee inbera inu dejuyu tenna dekeenanu tireve, 4 tsejtu Dios selusha tyee yachi naa-uwanuba mushatyu, naa wabi bain veraꞌ tiyaiba ityu, naa ejbiyuꞌ kakebanguityu juu uukareꞌ tanaꞌba, juntsaa ñullanu kakaanu tsuve. 5 Tsenmin ñulla uwain keenguemu deeñuꞌ mityaa, Diosren tiba ikaan jutyu ñullanu laꞌkantsumu juve, tsejtaa livee inutsumu ñullanu kuwaꞌ kakaanu tanatu, bene de-inu malusha entsangue katakaanu tsuve. 6 Entsaañuꞌ mitya ñulla mika sunden dejuve, naamika challa tsainuu juñu, ñulla jayuꞌ mitya tituba taaju iꞌ pulla pullaindu bain. 7 Tsajuꞌ ñullaꞌ keenguenu pensaya uru juuñu juꞌ, naa urañuba mijanu ñichi juꞌkeꞌ keran tsainu tsuve; tsejtu naa uruya mandinbu de-iꞌ pimuñuba, ñullaya tituba taaju de-iꞌ pullaꞌ bain, tiba ityuꞌ ñullaꞌ keranguenu pensa tsaa tsanashu juntsaa balenguraꞌ aawa kuranu detsuve Jesucristo katawanmala. 8 Ñullaya uwain Jesucristonu kataꞌ kerajtu dejuꞌ bain estyamu deeve, tsenmin challa naa ñulla yanu kataiꞌmujchi bain keenguendu mika sunden  

 

 

 

 

681

1 PEDRO 1  682

dejuve, tsejtu naatiꞌ palaachiya ne tsandenve tiꞌ patinuuba dejutyuve, 9 tsejtu ñulla juntsajuꞌ kerangues jindaa livee inuu tiyandetsuve. 10 Diosaꞌ mitya pamu rukula kaspee tinbunun entsa livee inu kuinda lengueꞌ naajuñuba aseetangueꞌ uraꞌ mijanu kemuwa deeve; tsejtu Dios mika aa ura ruku jutu tyee ñullanu kuwanuu juñuba juntsa wainmuwa deeve. 11 Dioschi Miꞌkeꞌ Kayamuꞌ Espírituya umanbelen Diosaꞌ mitya pamu rukulanu puꞌ mijakaakaa kemuwaave naa Dioschi Miꞌkeꞌ Kayamu naa-i taaju keꞌ puinuu juwaañu bain, tsenmin bene naa-i tsamantsaa katawanu juwaañu bain. Tsenñu yala naamaa tsainuu juñu bain, tsenmin naaitaa tsaa puinuu juñu bain mijanu kiikentsumuwa deeve, yalanu pamu Espíritu tsandiꞌ wandi wanditintsuñu. 12 Tsaaren Dios yalanu mijakaave naa juntsa tsandiꞌ wandya kuindaya yaichi jutyuꞌ, ñuichee uraanuu juñu bain. Tsajuꞌ naajulaa challa ñullanu Diosaꞌ mika ura kuinda demijakareꞌba kaspele Diosaꞌ mitya pamula tyee mijakaamuwa deeñuba juntsaa demijakaave, tsejtu livee inu kuinda mijakares deneve selusha eramu Espíritu Santo tsandikaañu. Entsa mijakara kuindanaa naa anjeela bain keemijanu tyaꞌ ajchundyandetsuve.  

 

 

 

Dios yachin juu dechusa tyave.

13 Tsaꞌ

mitya tyee kenuu juñuba nara tengaya chutu ñullaꞌ pensasha tsanguenun jutyuu judei. Tsejtu Dios mika aa ura ruku juꞌ tsanguindyatu, Jesucristo katawanmala tyee kuwanuu juñuba juntsa kanbera kenu dejuyu tenna keenadei. 14 Tsajuꞌ ñulla umaa uraꞌ meenguemu kailla juuñu deemiya, kaspele ñulla Diosnu keemijtunu uwanu ñui tene naaken chundyamuwa dejuꞌba juntsaaya manguen chunu kityudei. 15 Tsa jutyuꞌ, naaken chutaa Dioschin juu chunuu juñuba juntsaaya ken chudei, matyu ñullanu mikamu Diosya ti ujchaba katandyatyu juñuꞌ mitya, 16 matyu Diosaꞌ Kiikanu entsandive: Ñulla ti ujchaba tajtuꞌ inchin juudei, i bain ti firuu pensaba tajtuñuꞌ mitya, a tive Dios. 17 Naa munu bain main main titi ken chumu deeñuba tsa tsangue kavitu kenuu juꞌ, mainnuren uraꞌ tyaꞌ keekityu Diosnu ñulla “Apa” timu deꞌ mitya, entsa tusha chungamaya ñulla naa-uwanuba yanu mika jeetyaꞌ balenguren chunuuya dejuve. 18 Ñullaya nejuu dechuñuren Diosya livee keꞌ mangave, tsaaren ñulla tsanguen chulaya ñullaꞌ apala tsanguen chumuwa deeñaa tsaawa deeve, tsenmin ñulla mideeve juntsai livee iꞌ mangayalaya de-iimu lushi kenu jeru juuchi bain, naa uru juuchi bain paa-itaa mangayaindetyuꞌ, 19 Cristoꞌ naraa asachee paa-iꞌ demangayaꞌ bain, matyu Cristaa tiba yujkajtu naraa jumu llupu uvejaaba juꞌ tutaꞌ keewaran tsaimuwaañu. 20 Cristoya naa entsa tuba jutyunu uwanuren yaa entsa-iꞌ puitanuu juwaami, tsejtu ñuichi uraanuu kenaa challa entsa de-inu tinbusha jaꞌ katawave. 21 Ñulla  

 

 

 

 

 

 

 

a 1.16 Levítico 11.44-45; 19.2; 20.7

 683

1 PEDRO 1​, ​2

Jesucristoꞌ mityaa Diosnu keenguemu deeve. Diosyaa Cristo peyañuren mangujteꞌ balenguranuu tireve. Tsaañuꞌ mitya ñulla Diosnaa dekeengueꞌ, ya tyee kenu paꞌba uwain tsanguenu juve tenna keenanu dejuve. 22 Tsajuꞌ challa ñulla entsa anbuda jutyu kuinda naatiñuba tsangue demeenguitu, ñullaꞌ pensa manbitsalaiñuuya de-ive, tsejtaa keranguemu naatalaatala vetaꞌ vetaꞌ anbuda keewaatyuꞌ, uraꞌ estyamu tiyanu. Tsa dejuꞌ ñui tene vetaꞌ vetaꞌ mika estyan chuꞌ, ñullaꞌ tenbukasha tiba firuꞌ pensajtu estyadei. 23 Ñullaya kasa na mangayan tsa de-iꞌ, challaya ne peya peyaimu chaꞌ apalachi nakayaindetyuꞌ, naa-uwanuba chumu de-ityu Diosaꞌ kuindachee na mangayan tsa deive. 24 Matyu Diosaꞌ Kiikanuren entsandive: Naaju chachilla bain ishtape juuñu deeve, tsenmala chachillaꞌ aawa kuranu jumuya ne ishtaꞌ llullu juuñuuve. Ishtape ejkenmalaya yaꞌ llullu wallaꞌ pajtyaimu juve. 25 Tsaanuren Bale Rukuꞌ palaaya naa-uwanuba tsanamu juve, b tive. Tsajuꞌ entsaa, Diosaꞌ mika ura kuinda ñullanu mijakara jumuve.  

 

 

2

Dioschi kasa chachi majumula

1   Tsajuꞌ

ñullanu tyee firuꞌ kekaamu juñuba juntsa dekepukeñuu kidei: anbukuinda juula bain, tsa jutyuren tsaañungue keewaanu juula bain, kishtyanu pensa juula bain, naa naꞌbaasa veelaꞌ kuinda mereꞌ mawainnu juula bain dekepukeñuu kidei. 2 Ñullaya challan kayaimu na juuñu dejuꞌ, livee iwaanu tiremu kuindanaa kayu tsamantsandyaꞌ miꞌkidei tichiba mushajtu chuꞌpi juuñuu jumunu, tsejtaa kayu awaiñu iꞌ jintsuꞌ livee inu, 3 matyu ñullaya Bale Ruku naaju aa ura rukuñuba dekeemijaꞌ mitya.  

 

Cristo chumu shupuka juuñuu.

4 Cristaa

chumu shupuka juuñuuve, tsaanuren ya kemu rukulaya juntsa shupuka dekepuñu bain, Dioschiya miꞌkeꞌ kaya shupuka juꞌ, balen meneste-imu juve. Yaꞌ junga kalen jindu 5 ñullaa Dioschiya chumu shupuka juuñuu detiyaꞌ, aamabi aa elesha juuñuu tiranu dejuve, tsenmin ñullaa chachillaꞌ mitya Diosnu kalen jimu detiyaꞌ yachin juu tiyanu dejuve, tsejtaa ñulla Jesucristoꞌ mityan tyeeba Diosnu keewaakeñungueꞌ yachi mutyaꞌ uutyainuu kenudetsu, kaspele animaa tuteꞌ keewaren tsanguiñunguetu. 6 Matyu Diosaꞌ Kiikanu bain entsandive: Iya Sión pebulunu ma shupuka tsurentsuyu; entsaa ura deendanamu shupuka juve, tsenmin miꞌkeꞌ kaya juꞌ, balen meneste-imu shupuka juve. Mun yanu keenguishu juntsaa nenñu iwa tyaꞌ ne yujpeyainu dejutyuve, c tive.  

 

b 1.24-25 Isaías 40.6-8

c 2.6 Isaías 28.16

1 PEDRO 2  684 7 Tsajuꞌ

ñulla keranguen mityaa balenguranu dejuve, d tsaaren keenguityulachiya Diosaꞌ Kiikanu naatiñuba juntsaave: Ya kemulaꞌ kepu shupukaa kayu deenamishtimu shupuka tiyaive, e tive. 8 Tsenmin keenguityulachiya juntsa shupuka juuñuu jumunu laapuꞌ patu entsandive Diosaꞌ Kiikanu: Ma shupukaa tyuꞌlekaanu tsuve, matyu ma lanbakinaa tsujinu detsuve, f tive. Yala juntsa-iꞌ tyuꞌlemiya Diosaꞌ palaanu meedityutaa tsainu detsuve, tsenmin yala juntsainuu juwaataa tsainu detsuve. 9 Tsaaren ñullaa Dioschi miꞌkeꞌ kaya chachilla deeve, g chachillaꞌ mitya Diosnu kalen jimu rukula dejuꞌ, reichi taawasha kemu juuñu deeve, Dioschin juu jumu aa bulu chachilla deeve, h tsenmin Dioschi atiꞌkaya chachilla deeve. Tsejtaa tiba Dioschi tsamantsa uukeraa keñu jumula ñulla veelanu wainnudetsu, i yaa ñulla dishkejtsa chun tsa denañuba mangalareꞌ, yachi tsamantsa danjurunainsha mamikan tsanguive. 10 Uwain ñulla kaspeleya ma bulu chachilla jutyuwa deeve, tsaaren challaya Diosaꞌ chachilla deeve, tsenmin ñulla kaspeleya Dioschi tenbi keratyuwa deeve, tsaaren challaya Dioschi tenbi keramu deeve. j  

 

 

11 Estennu

Dioschee taawasha ken chudei.

keranguemu naatalala, ñulla entsa tusha chutyularen engu jaꞌ nen tsaimulanu pan tsandintsuyu: chachilla tyee firuꞌ kiiken chunu tyamu deeñuba tsanguen chunu tyatyudei, juntsaya lalanu firuꞌ kekaamuñuꞌ mitya. 12 Diosnuya keranguityu chachillaꞌ kejtsapala ñulla mika deechuꞌ kiiken chudei, tsenmalaa yala ñullanu naa challaya firuꞌ kiiken chumu chacheeba dejuñu naꞌbaasa pan tsandindu bain, ñulla uraꞌ kiiken chumu deeñuba kataataakemiya, Diosnu yuj urave tiꞌ panu dejuve yaꞌ maanu malunu.  

13 Ñulla

Bale rukulanu meenguidei.

Bale Rukunu keenguemu deꞌ mityaren, naaju bale chachillanu bain meenguenuu dejuve: naa romanolaꞌ aa uñinu bain, matyu yaa kayu aa bale rukuñuꞌ mitya, 14 naa reichi uñi tiraꞌ eramulanu bain meenguenuu dejuve, yala firuꞌ ken chumulanuya taaju iwaanuu dejuꞌba, deechuꞌ ken chumulanuya yuj uraꞌ kiiken chumuve tinuuya dejuve, 15 tsajuꞌ ñullanu Dios juntsangue uraꞌ kiiken dechusa tyamuve, tsenmalaa naa tiba aseeta jutyu chachilla bain, naa tiba mijtu chachilla bain ñullanu naatiꞌ  

 

d 2.7 keranguen mityaa balenguranu dejuve, tityumujchi, keranguemulachiya juntsa shukupa mika balenguraa juve, tiꞌ aseetanguikara bain junu juve. e 2.7 Salmo 118.22 f 2.8 Isaías 8.14 g 2.9 Isaías 43.20 h 2.9 Éxodo 19.6 i 2.9 Isaías 43.21 j 2.10 Entsa pilla pumu Oseas 1.6,9; 2.23nu kalarave.

 685

1 PEDRO 2​, ​3

kundaa pan tsaa junudetsu. 16 Ñullaya maali nejuu chumula naaju chumu deeñuba juntsaa chudei, tsejturen ñu maali tyee kendyaꞌba tsanguen chunu juꞌ mityaa firuꞌ kiiken chunuya kityude, tsa jutyuꞌ Dioschee taawasha kemu tiyade. 17 Tsajuꞌ munu bain meengueꞌ uraꞌ kiiken chudei; keranguemu naatalalanu estyan chudei; Diosnu jeetyaꞌ balenguudei, tsenmin romanolaꞌ kayu aa uñinu bain balengureꞌ meenguen chudei.  

 

18 Taawasha

Uudenchi taawasha kemula naakenuuñuba

kemu chachillaya, ñullanu uudenguemu rukulanu balengureꞌ meenguidei, ne ñullanu tenbityaꞌ uraꞌ kemulanun jujutyu, naa firuꞌ kiikemulanu bain tsaren meenguen chudei. 19 Tsejtu ti kuipaba jutyuren taaju pullantsushu juntsaa, Dioschi mutyaꞌ keranu juve, yanu meenguendaa juntsaintsumiya. 20 Tsaaren ñulla firuꞌ kiiken chun mityaa taaju indu paviya jutyuu dejushu juntsaa, ¿tiꞌ mityaa balenu jun juntsaatu? Tsejturen ñulla uraꞌ kiiken chun mityaa tsa-iꞌ taaju kentsuturen tsaa jintsuꞌ nejuuve tyantsumuya, Dioschi uraꞌ katawaꞌ mutyakayanu dejuve. 21 Tsajuꞌ entsa deisa tyataa Diosya tsangueꞌ ñullanu mikave, matyu Cristaa ñullaꞌ mitya taaju keꞌ puimuwaave, tsenmalaa ya naa-imuwaañuba ñulla bain tsainu dejuve keꞌ keewaatu. 22 Uwain Cristoya ti ujchaba kindyuwaave, tsenmin munu bain anbukuinda paꞌ keranguikarendyuwaave, k tive. 23 Naa yanu firuꞌ padetiñuba, ya bain vejmiꞌ firuꞌ manbakakityu juwaave; naa yanu taaju de-iwaañuba, ya bain bene yalanu juntsangue mannu tsuyu tityuwaave, tsajuꞌ deechuꞌ kavitu kemu Diosyaa tyee kenu juꞌba tsanguisa tyatyaimuwaave. 24 Cristaa yaꞌ bulu kuusasha tuꞌviꞌ peyatu kumuinchi lalaꞌ ujcha jumula dekaꞌ jiive, tsenmalaa lala ujchachiya peyaañuu dejuꞌ bain, umaa uraꞌ kiikenaa chunudetsu. Tsejtu Cristoya ñullaꞌ mitya malastemai tapave, tsenmalaa ya juntsai detapanmala ñullaya uraꞌ mandiyanudetsu. l 25 Ñulla kaspeleya uvejaaba juꞌ tupiyaꞌ nen tsaintsumuwa deeve, tsaaren challaya uvejaaba dejuñu washken tsanguemunu, tsenmin ñullanu keekeenamu Cristonaa majaꞌ demasuudive.  

 

 

 

 

 

3

1   Tsaren

Supu miyala bain, unbee miyala bain

juꞌ, ñulla unbee miyala bain ñullaꞌ rukulanu meenguen chunuuya dejuve, tsenmalaa yala mantsala Diosaꞌ palaanu kerajutyu dejuꞌba, naamika ñullaya yalanu palaachi tsandi paindetyu bain, ñulla naake meenguemu deeñuba juntsanu kataturen uwain tsaave tyaꞌ Diosaꞌ palaanu meenguenu dejuve, 2 ñulla Diosnu uwain balengureꞌ keewareꞌ, chachiitala naaju deechuꞌ chumu deeñuba juntsa dekatatu. 3 Naa ñulla uukeraa chachi juu katawanu tenñuba, ne avindala keranchee tsai katawanu kityudei, ne achuwa  

 

k 2.22 Isaías 53.9

l 2.24 Entsa pilla pumu Isaías 53.4-5, 11-12nu kalarave.

1 PEDRO 3  686

tituba jungue kikake, ne tiba uruchi keñu juula bain puke, ne balenchi uukeraa jali juula bain panakityumujchi; 4 tenbuꞌ pensachee juntsai katawadei, tsejtu mika uukeraa juꞌ, tituba kidandajtuu juꞌ, ne mafirui tiyaba ityu pensachee juntsai uukeraꞌ dekatawashu juntsaa Diosaꞌ ajuusha mika uraꞌ katawanu dejuve. 5 Matyu yumaa tinbunu Dioschin juu chumu shinbula bain uukeraa junuumiya, Diosyaa uraꞌ deechuꞌ ken chumuve tyaꞌ, yalaꞌ rukulanu bain deechuꞌ meenguentsumuwa deeve. 6 Tsejtu Sara juntsaawaataa Abrahamnu meenguetu, “in bale ruku”, timuwaave. Tsajuꞌ naa ñui bain ya naajuwaañuba juntsaa chunu dejuve, tiba uraꞌ kiiken chuꞌ, tinuba jela putyu dechushu juntsaa. 7 Tsenmala ñulla unbee rukulaya ñullaꞌ shinbula naadejuñuba aseetangueꞌ, naakeñaa balenguraꞌ keewaranuu juñuba tsanguen chudei, tsejtu lejimu basu kayu taꞌkemiinu naake uraꞌ talan chunuu juñuba yalanu bain juntsangue balenguren chudei, matyu Dios tsanguendyaꞌ ñullanu naakeꞌ yaba naa-uwanuba chuwaanu juꞌba yalanu bain tsaren kenu tirave. Tsajuꞌ juntsanguen chudei, tsenmalaa ñulla Diosba kuinda dekenmala tiba daatadiñuu juiꞌnutsu.  

 

 

 

Uraꞌ kiiken mityaa taaju in chunu

8 Mu

bain ma pensa juuñuu chudei: veela naatyandetsuñuba ñui bain tsandyan chudei, naa vetaꞌ vetaꞌ bain estyan chudei, naatala juuñuu chudei, tsenmin aa uraꞌ chachi dejuꞌ dajkeewaren chutyumujchi mika tenbityamu judei. 9 Naa ñullanu firuꞌ dekiñuba, ñui bain tsaren firuꞌ mantyudei; naa firuꞌ depañuba, ñui bain tsaren firuꞌ palaachi manbakatyudei. Tsa jutyuꞌ, Dioschi uraꞌ isa tyaꞌ paꞌdei, matyu ñulla tsanguenaa mikayamu deꞌ mitya, tsejtaa ñui bain Dioschi uraꞌ inu. 10 Matyu Diosaꞌ Kiikanu entsandive: Mun uwain chunu tyaꞌ, sunden puinu tyaꞌ bain yaꞌ ñijkanu firuꞌ pakaanu kityusa, naa ne yaꞌ fiꞌpaki bain anbukuinda kityusa; 11 tiba urajtuya kityu juꞌ, tiba uraa tene kemu jude; munu bain tiba bulla jutyu uraꞌ chunu juu tene kiiken chuꞌ, juntsaa tene ken chude. 12 Matyu Dios naakesa tyañuba tsanguen chumulanuya Bale Ruku washkemuve, tsenmin yaba dekuindakeꞌ patu tyee depañuba yalanuya meenguemu juve, tsaaren firuꞌ kiiken chumulanuya meepungui kityuve, m tiꞌ pillave. 13 ¿Tsen maa ñullanu firuꞌ kichudeenga, ñulla naa-uwanuba uraꞌ kiiken chumu deeshu juntsaa? 14 Tsaaren ñulla uraꞌ kiiken chun mityaa taaju in dechushu juntsaa, ¡mika uraꞌ indetsuve! Tsejtu yala tyee kenu depañuba  

 

 

 

m 3.10-12 Salmo 34.12-16

 687

1 PEDRO 3​, ​4

jeetyatyudei, tsenmin ne wapanai bain ityudei. 15 Tsajuꞌ Cristonaa ñullaꞌ tenbukasha Bale Ruku juu kureꞌ balengureꞌ keewaadei. Tsenmin maa ñullanu juntsa uwain tsaave tenna keenanu pensanu tyeeba aseetanguenu tyaꞌ mijanu depakeꞌmeeñuba pakanun jutyuu jujuudei. 16 Tsaaren naa tsangueꞌ kuinda keꞌ bain dajkeewareiꞌmujchi tsangueꞌ nejuu keewaadei. Tsajuꞌ ne ñullaꞌ tenbuꞌ pensasha jatsandyainuuya kityudei, tsenmalaa ñulla Cristonu keenguemu dejuꞌ, uraꞌ kiikemu deeñuren, yala naꞌbaasa papatimu dejutu, yalaꞌ panu palaachiren ma-ikaꞌ yujtyanudetsu. 17 Tsejtu Diosren tsaa mutyañuya ñulla uraꞌ kiiken chun mityaa taaju ken chuñu kayu urave, ne firuꞌ kiiken chun mityaa taaju ken chutyumujchi. 18 Matyu uwain Cristoya ma bijeeren lalaꞌ ujchaꞌ mitya taaju keꞌ peyaitun manbeyatintsun jutyuu tiyave. Yaa tiba firuꞌ kityu juꞌ bain, firuꞌ kiiken chumu chachillaꞌ mitya peyave, ñullanu Diosaꞌ ajuusha tajinu. Tsejtu uwain ya chachi juu chumujchiya peyaturen, espiritu juu chunu mangujve. n 19 Tsejtu espiritun juu jitaa peesu pumu espiritulanu yaꞌ puiñu kuinda dewainnu jimi. 20 Juntsalaa kaspee tinbunu pañu meetyu juwaala, tsejtu Diosya Noéꞌ tinbunu aa baaku dekengama yalanu vetaꞌ pensa demannu keenaren tsaawaala, tsaaren mandishpen chachillaren baakusha videiꞌ pichi debukaꞌ peyatyuꞌ livee iila. 21 Entsanu pensanguenmalaya juntsa piya mungaantsumi pi juuñuu juꞌ, challaya ñullanu livee kemu juve. Tsaaren pichi mungaraya lalaꞌ bulunu manbitsaamu jutyuꞌ, Diosnu lalaꞌ tenbuꞌ pensasha ti kuipaba jutyu juꞌ, uwain ti bain tsanguenbera kenu tsuyu tiꞌ panuren ne juuve pichi mungara jumuya. Pichi mungaraya livee kemu juve Jesucristo peyaꞌ mangujpañuꞌ mitya. o 22 Tsejtu challa juntsaiꞌ mangujtatu kaiꞌsha maluꞌ Diosaꞌ urandyasha chuve, tsenñu naaju anjeela bain, naa vee espiritu pudeetala bain yachi tene uuden juu dechuve.  

 

 

 

 

 

 

 

4

1   Cristo

Cristo naaju chumuwaañuba juntsaa junu

naa-iꞌ yaꞌ bulunu taaju puimuwaañuba ñui bain juntsai taaju inun jutyuu judei. Matyu mun Cristoꞌ mityan yaꞌ bulunu taaju iꞌ pullaꞌ bain, juntsa chachiya ujcha manguiiken chun jutyuu tiyanu tsuve, 2 tsejtaa naa-uwanuba yaꞌ chungamaya ne chachilla tyee kiiken chunu tyamu deeñuba tsanguen chutyuꞌ, Dios tyee kesa tyamuñuba juntsaaya ken chunu. 3 Uwain pureꞌ tinbuꞌ mitya ñui bain Diosnuya keranguityu chachilla juu dechuꞌ, yala naaken chumu deeñuba tsanguen chumuwa dejuꞌ, tiba urajtu kiikenu tsamijaawa deeve, firuꞌ kiikenun tyaimuwa deeve, waꞌdiꞌ panda fiꞌ viñanun ajchuuwa deeve, naa tiba mika finu, pureꞌ kushnun tyaimu,  

 

n 3.18 espiritu juu chunu mangujve tityumujchi, Espírituꞌ mityaya chunu mangujtave tiꞌ aseetanguikara bain junu juve. o 3.21 Entsa bersikulu 21 naa entsangue aseetanguikara bain junu juve: Entsanu pensanguenmalaya juntsa piya mungaantsumi pi juuñuu juꞌ challaya ñullanu livee kemu juve. Tsaaren pichi mungaraya lalaꞌ bulunu ti urajtu kemuwa deeñuba juntsa manbitsaamu jutyuꞌ, Diosnu lalaꞌ pensasha ti kuipaba jutyuu tireka tiꞌ panuren ne juuve mungaraya. Pichi mungaraya livee kemu juve Jesucristo peyaꞌ mangujpañuꞌ mitya.

1 PEDRO 4  688

tsenmin uu tyutyanuu chi dyuslanaa aawa kureꞌ keewaawaa kemuwa deeve. Umaa tsa manguen chutyudei. 4 Tsejturen challaya ñulla, yala tyee firuꞌ kiiken dechuñuba tsa manguiveten dechutyuñu, nejtaa tsaatu den tyaꞌ, ñullanu tituba kentsureꞌ pan dechuve. 5 Tsaaren naa chumulanu bain, naa pemulanu bain kavitu kenuu jumu rukuꞌ ajuusha bene yala tyee kiiken chumuwa dejuꞌba juntsan mitya balelaꞌ pakanu dejuve. 6 Juntsaꞌ mityaa kaspele chuturen peyamulanu bain Diosaꞌ mika ura kuinda mijakarave, tsenmalaa chachi juꞌ Dioschi kavitu iꞌ ujchaꞌ mityaya peyanuu dejuꞌ peyatu, espirituꞌ mityaya Dios naaju chusa tyamuñuba tsaa chumu tiyanudetsu.  

 

 

Veelanu ti bain kemishtidei.

7 Ti

bain de-iꞌ piyanu malu yumaa kalenave. Tsaꞌ mitya mika uraꞌ pensa dejuꞌ deechuꞌ judei, tsejtaa Diosba kuinda kiikenu. 8 Tiꞌ mityaba ñuitala mika estyan chudei, matyu estyan dechushu juntsaa ti urajtu dekeꞌ bain vetaꞌ vetaꞌ uraꞌ mandiyan chunuu tiremuñuꞌ mitya. 9 Vee mujtu chumu keranguemu naatalala ñullaꞌ yasha tsunu dejanmalaya ne paviya kiꞌmujchi uraꞌ tyaꞌ mikamu judei. 10 Ñullanu Dios tyee kuwaꞌ main main tiba vee vee kenu tireñuba, vejan chachillachi uraanuu tene kiikemu judei, Dios tsanguendyaꞌ ñullanu mika aa uraꞌ keꞌ tsanguenu tireñu. 11 Mun Diosaꞌ palaa mijakareꞌ patiꞌ bain Dios naatisa tyañuba tsandimu jusa, tsenmin mun veelanu tyeeba kivetekendu bain, Dios yanu tsanguenu dera kuwañaa tsanguentsuyu tyatyaimu jusa. Tsejtaa ti kikeꞌ bain Jesucristoꞌ mityan Diosnu balengurekenuu tene kenu, matyu naauwanuba tiba tsamantsaa keewara jumula bain, naa ti kenu tenñuba kikenuu juula bain Dioschi deeñu. Uwain tsaave.  

 

 

 

Cristoꞌ mitya taaju intsumiya sunden junu

12 Estennu

keranguemu naatalala, naa ñullanu uwain keranguemu deeñuba mijanu dekeꞌ keeñu taaju de-iꞌ ñinbaasha pullaiñu de-iꞌ bain, nenñu in tyaꞌ wapanganu kityudei, naa tsa de-iꞌ bain ne tsaityu juuya indetyuve. 13 Tsajuꞌ naa llakinguenduba mika sundenga judei, tsejtaa Cristo naake taaju kemuwaañuba ñui bain juntsaiñu indetsumiya, ya naaju tsamantsaa juꞌba juntsai katawanu malu janmala tsaren ñui bain yaba bulu tsamantsai sundyaveꞌnu. 14 Ñulla Cristoꞌ mityaren kentsuraꞌ pakayandetsumiya, mika uraꞌ indetsuyu tyadei, matyu tsamantsaa jumu Diosaꞌ Espíritu ñullanu chuñuꞌ mitya. 15 Tsajuꞌ ñulla ne mallee taaju indetsuꞌ bain, ne chaꞌ tuten mitya juu, ne taanguen mitya juu, ne firuꞌ ken mitya juu, tsenmin ne veelaꞌ peletunun paveten mitya juu, juntsa-iꞌ taaju in chunu kityudei. 16 Tsaaren mallee ñulla Cristonu keenguen mityaa juntsa-iꞌ taaju indetsushu juntsaa yujtyanu kityudei, tsajuꞌ, ñulla Cristonu keranguemu chachi tikayan mityan, Diosnaa mika urave tiꞌ pakadei.  

 

 

 

 689

1 PEDRO 4​, ​5

17 Challa

kumuinchi chachillanu Dios kavitu kenu tinbu yumaa jave. Tsejtu yaꞌ chachillanaa kavitu kenu ajkeꞌ peepuntsuve. Entsangueꞌ lalanu, yaꞌ chachillanuren, taaju depuiwaashu juntsaa, ¿Diosaꞌ mika ura kuindanu meenguityulanaa kayu naakechunga? 18 Diosaꞌ Kiikanu entsandive: Dios naakesa tyañuba tsanguen chumu chachillaren neiꞌba ne livee ideiñuba, ¿Diosnu jeetyaꞌ balenguren chutyu chachilla, ujcha lan chumu chachillabaa naa-ichudeenga? p tive. 19 Tsaꞌ mitya naajulaa Dios tsaisa tyañu taaju in dechuꞌ bain, tiba uraꞌ kiikes jindetsuꞌ, ñullanu kemu Diosnaa pakan chudei, yaa tyee kenu paꞌ bain uwain tsanguenbera kemu juñu.  

 

5

Keranguemulaꞌ bale rukulanu ula

1   Umaa keranguemulaꞌ bale rukulanu uleꞌ panu tenve. I bain yala naaju

bale ruku dejuñuba tsaren juyu, tsenmin Cristo naa-iꞌ taaju intsumuwaañu bain tsana keenamu juyu, tsenmin ya naajuꞌ tsamantsaa juꞌba juntsai katawanmala i bain junu puveꞌnu jumu juyu. 2 Dioschi uveja juuñuu jumulanu, ñullanaa washkenu detireñu sunden juꞌ washkeꞌ Dios naakesa tyañuba juntsaaya kidei, tsejtu ne tsanguidei tiꞌ uuden dekiñu deranchi kityudei, lushi dekuwañu aa kachi tenñu tsanguenu kityudei; tsa jutyuꞌ, ñullaꞌ tenbukachin tsanguenu tenñaa tsanguidei. 3 Tsejtu ñuichi washan chumulanu, ne ñuichi uuden imu deeve tyaꞌ, tituba pan chunu kityudei; tsa jutyuꞌ, ñulla yalanu uraꞌ keꞌ keewareꞌ laa bain juntsangue kiikenun tsa deeyu tyakaanuuya kiikidei. 4 Tsejtaa umaa uveja washkemulaꞌ aa bale ruku majaꞌ katawanmalaya, tiba tsamantsaa keewara jumu, jaiba tejpityu mishmunderu juuñuu kanu dejuve.  

 

 

5 Ñulla

Keranguen chumulanu ula

unnala bain tsaren junu dejuve, kayu ñullanu pulla rukulanu balenguremu judei. Mu bain daj pensajtu dejuꞌ, vetaꞌ vetaꞌ meenguen chudei, matyu Diosaꞌ Kiikanun entsa pillave: Dajtyamulanuya Dios meepungui kityuve, tsaaren dajtyatyulanuya tiba uraꞌ kiveteꞌ jimishtimuve, q tive. 6 Diosya tichiba tsamantsaa dera juñu, yaꞌ ajuusha tiba daj pensa jutyu chudei, tsenmalaa yachi naa-uwanaa tsanguenu malu jañuba ñullanu aawa kurenutsu. 7 Ñulla tyeeba naa-ichunga tyandetsuꞌ, pensaa dechumiya Diosnaa wandiꞌ, yaa tyee kenu juꞌba mijasa tyaꞌ pakadei, matyu yaa ñullaꞌ mitya tyee kenu juñuba pensa chumuñuꞌ mitya. 8 Naa-uwanu bain ti kikeꞌba mika tejan pensangueꞌ kiikemu judei, tsenmin kastyuñuu dejuꞌ keeta judei, matyu ñullanu kundaa kemu Dyabuluya firu aa kela juuñu juꞌ munaaba kaꞌ finu, ñullaꞌ keetala murundita nentsuñuꞌ mitya.  

 

 

p 4.18 Proverbios 11.31

q 5.5 Proverbios 3.34

1 PEDRO 5  690 9 Diosnu

deraꞌ keengueꞌ jindu Dyabuluchi bengaꞌ tyullaiñuu inu kityudei, naa nuka keranguen chumu naatalala bain ñulla Cristoꞌ mitya naake taaju kiiken dechuñuba yai bain tsanguen dechuñuba ñulla mideꞌ mitya. 10 Tsaaren ñulla jayu tinbuꞌ mitya taaju de-iꞌ pullanmalaya, Diosya ñullanu kasa juuñuu detireꞌ, puluꞌ chunañuu detireꞌ, deraañuu detireꞌ, tiba deechuꞌ kiikemu detirenu tsuve. Entsa Diosya mika estyanchin Jesucristoꞌ mityan ñullanu mikaꞌ naa-uwanuba yaꞌ tsamantsaa chuinsha yaba bulu punuu detiremu ruku juve. 11 Tsaꞌ mitya yaa naa-uwanuba tsamantsaa kemu jusa. Tsaasa.  

 

12 Inchi

De-insha palaa

uraꞌ keranu keranguemu naatala, ti bain uraꞌ tsanguenuu juve tyanu ruku Silvanonu, iya naatinu tenñuba tsandipaꞌ entsa kiika ka jayu piikikaataa ñullanu eeyu, tsejtaa ñullanu jayu ulenu, tsenmin ñulla entsaiꞌ Dioschi tyeeba uraꞌ iꞌ pullantsulaya ñullanu Dios uwain estyamu juꞌba tsangue keewarendaa tsanguentsuñu bain juntsa wainnu. ¡Tsajuꞌ ya ñullanu juntsai estyantsuñu tsaikutyaꞌ jintsudei! 13 Babilonia pebulusha chumu keranguemula bain r ñullanu uraꞌ chusa tindetsuve, yalanu bain ñullanu tsaaya Diosya miꞌkeꞌ kave. In na juuñuu jumu keranguemu Marcos bain ñullanu uraꞌ chusa tintsuve. 14 Naa ñui tene bain vetaꞌ vetaꞌ estyaꞌ keewarendu uraꞌ dechusa tiitidei. Ñulla Cristochi jumulaya kumuinchi tiba bulla jutyu uraꞌ chudei.  

 

r 5.13 Kiikanu palaameemee pensanguiñuya, ne entsa pillave: Babiloniasha chunashu juntsa. Entsandimiya Roma pebulunu keranguen chumulanu laapuꞌ pataa tsandive. Kaspee tinbunu judío chachilla peesu dekayaꞌ jiꞌ, tinbu jumu Babilonia tusha chumuwa deeve Diosaꞌ mitya pamu ruku Jeremías chunu tinbutala.