Judasꞌ

pilla kiika 1 Iya,

Uraꞌ dechusa tindu

Judas, Jesucristochi taawasha kemu ruku, matyu Santiagoꞌ naatala, lalaꞌ Apa Diosren estyaꞌ yaꞌ chachi detirenu mikañuya, Jesucristochi washaa chumu chachillanu entsa kiika piikentsuyu. 2 Ñullanu Dios mika tenbikereꞌ, tiba bulla jutyu uraꞌ dechujtiꞌ, estyaꞌ keewares jintsusa tenve.  

Anbuda mijakaamula

3 Estennu keranguemu naatalala, naa ñui bain, naa i bain livee inu judeewashu juntsa kuindatalaa ñullanu wandiꞌ piikenu ajchundenmuñu bain, challa entsangueꞌ piikentsumiya ñullanu matyu Dioschin juu chachillanu, ma bijee dewainñu kuindanu ñulla naake deechuꞌ keengueꞌ jinduba juntsandi uraꞌ pakas jindetsusa tenñaa piikentsuyu. 4 Matyu mantsa chachilla anbutiꞌ ñullaꞌ kejtsapala dus vijaꞌ dechuve. Kaspee tinbunun Diosaꞌ Kiikanu patu, juntsaa chachilla defaleꞌ Dioschi taaju inu detsuve timuwaave. Yalaa Diosnu balenguutyu dejuꞌba, Diosya mika aa ura rukuve timu deꞌ mityaa, tinuba jelajtu dejuꞌ, tyee kendyaꞌba tsanguen chumu deeve, tsenmin yaren main juu jumu lalanu tanamu, lalaꞌ Bale Ruku Jesucristonu bain yaa juntsa jutyuve tiꞌ pamu deeve. 5 Naa ñulla yumaa mideeñu bain, mandengaapunu tenve, Bale Rukuya Israel chachillanu livee keꞌ Egipto tunu mangalareꞌ bain, yanu keranguityu Israel chachillanuya bene millangue tuꞌve. 6 Tsenmin naa anjeela bain yala nukaa chumu dejuꞌba junga deshuikeꞌ jatu firuꞌ dekeꞌ, naa naaju chunuu dejuꞌba juntsaa chun jutyuu tiyamu anjeelanuya, Dios yumaa tsamantsa yapijurunainsha naa-uwanuba tsananu peesu pukeꞌ tanave, yachi kavitu dekenu malu jangama keenatu. 7 Tsajuꞌ juntsa anjeela tsaaya, entsa chachillaya naa Sodoma pebulunu bain, naa Gomorra pebulunu bain, naa juntsa keetala chumu kaa pebulutala bain, naꞌbaasa tsa tsa-in dechuꞌ, naa chachiitala tiba tsanguen jutyuu bain ken chumuwa  

 

 

 

 

709

JUDAS  710

deetu, naa-uwanuba manbetyu ñichi tene millai dejupeve, tsenmalaa naajula bain tsanguen chumulaya juntsainu dejuve tiꞌ keewara junutsu. 8 Tsaren juꞌ entsa firuꞌ chachilla ñullaꞌ kejtsapala dus vijamula, matyu kipibi juuñuu chumulaya, yala naꞌbaasa tsa tsanguen dechuꞌ, yalaꞌ bulunu Dioschi urajtu dekeꞌ, naaju balelanuba meenguen chutyu dejuꞌ, naa selusha ti pudeelanu bain kentsureꞌ pamu deeve. 9 Naamika Miguel, aa bale ruku anjee juꞌ bain, Moisésꞌ ujkun buluꞌ mitya Dyabuluba vinguendu ne kentsureꞌ patibandityuꞌ: ¡Bale Rukaa ñunu nepasa! tiꞌ ne patimuwaave. 10 Tsaanuren entsa chachillaya titala bain, naa uraꞌ miba jutyularen kentsureꞌ pan chumu deeve, tsenmin tyeeba jayu yalaꞌ pensasha midejuꞌ, mu bain juntsaya minuu dejuñaa miꞌ bain, tandiyanchi tene dekeꞌ animaa juuñu dejuꞌ, ti keꞌba yaichi kuipa vinuuya kiiken chumu deeve. 11 ¡Yalaa mika taaju iꞌ puinu dejuve! matyu tinbunu chumu Caín naakemuwaañuba juntsaa kendetsuꞌ mitya. Tsenmin Balaam tsaaya lushee kayu mutyamu dejuꞌ, lushiꞌ mityan tupiyaꞌ jiiñuu kiidekive. Tsenmin Coré tsaaya Moisésnu kundaa keꞌ peyan tsainu dejuve. 12 Tsenmin juntsa chachillaya ñulla keenguemuutala estyaꞌ debuudiꞌ panda finsha bain yujpewaanuu kiiken pumu deeve, munuba balenguutyu dejuꞌ, yalaya vejanlanu pensajtu dejuꞌ, yaichin uraanuuya kiikemu deeve. Tsa dejuꞌ yalaya shuwa eetyu ñivijcha juuñu dejuꞌ ishuwachi naꞌbaasa takan tsaimu ne judeeve, tsenmin chi juuñuu dejuꞌ, yumaa puka iinuu dejuꞌba, jaiba indetyuꞌ de-ejkee juꞌ, pai bijee peyaañuu dejuꞌ, yumaa demuyaꞌ tsuraa chi juuñu deeve. 13 Tsenmin ajaa lamaa pisunda juuñu dejuꞌ yaichi uu yujtyanuu jumaa lamaa chinbijpu eꞌlaren tsa tsanguemu deeve. Tsenmin tupiyaꞌ naꞌbaasa nentsumu makara juuñu dejuꞌ, naa-uwanuba tsamantsa yapijurunainsha neneintsunuu tiwara junu detsuve. 14 Tsenmala Adánnu seraꞌ jimin mandishmain bijeesha seraꞌ faamu ruku Henoc, Diosaꞌ mitya paꞌ, entsa chachillanu laapuꞌ patu entsandive: Meedidei, Bale Ruku yaꞌ anjee pureꞌ miyaa jantsuve, 15 naaju chachillanu bain kavitu dekeꞌ kuipa punu, yala tiba firuꞌ kiikeꞌ naꞌbaasa ken chun mitya bain, tsenmin yala ujcha lan chumu chachilla dejuꞌ, ti panduba pensanguiꞌmujchi Diosnu tituba depan mitya bain yalanu taaju depuiwaanu, tive. 16 Yalaa tiꞌ mitya bain paviyaken chumu dejuꞌ, titala bain urajtaa tiꞌ naꞌbaasa pan chumu deeve, tsenmin yaichi tyee keꞌ uraꞌ tyamu dejuꞌba juntsaaya ken chumu jula. Tsenmin tsamantsa dajtyaꞌ pamu dejuꞌ, veelanu aa ura kureꞌ pamiya, yai tene uraꞌ iinuu miꞌkenaa ne tsandimu deeve.  

 

 

 

 

 

 

 

 

17 Tsaaren

Keranguemu chachillanu uleꞌ pañu palaa

ñulla, estennu keranguemu naatalalaya, Bale Ruku Jesucristoꞌ mitya kuinda kenu laraꞌ eramu rukula naadetiñuba mandengakidei: 18 Tu de-inu malu kalenainsha Diosaꞌ palaanu uukapumu chachilla faanu detsuve,  

 711

JUDAS

tsejtu yalaꞌ firuꞌ pensachi naa naakeñaa uraa tyaꞌba ne tsa tsanguen chunu dejuve, timuwa deeve. 19 Entsa chachillaa ñuitalan ajaavikaapuꞌ naꞌbaasa develaꞌ chukaamu deeve. Yalaya ne chachilla naaken chunu tyamu deeñuba juntsaaya ken chumu deeve. Diosaꞌ Espíritu bain tajdetuve. 20 Tsaaren ñulla, estennu keranguemu naatalalaya, Diosnu daran kerangues jijiintsudei, tinuba pulla baleñuꞌ mitya. Tsejtu Diosba kuinda kiikentsudei, Espíritu Santo deechuꞌ tsanguikaantsuñu. 21 Tsejtu Dios naa-i estyamuñuba, juntsangue keewares jijiintsuꞌ, naamaa lalaꞌ Bale Ruku Jesucristo mika tenbityamu juꞌ, lalanu naa-uwanuba Diosba uraꞌ chunuu tirenu juñuba juntsainu keenadei. 22 Mantsalanuya naa uraꞌ keranguityu deeñuba tenbipuꞌ uwain tsaave tenna keenguikaanu kiikidei. 23 Mantsalanuya ñinbaasha viinuu dejuñuba mangalaakeñungueꞌ livee kidei; tsenmin mantsalanuya tenbityaꞌ keewaamu judei, naamika yala tyee firuꞌ kiikemu deeñuba juntsanuya pashkakeñuu dekityuꞌ, tejan dekeenaꞌ, ñulla juntsachi chiꞌkayaiñuu in jutyu kiikendu bain.  

 

 

 

 

De-insha palaa

24 Diosren

tsanguendyatu keenaꞌ washkemu juve tiba urajtu kikaatyuꞌ, ti ujchaba mayijtuu tananu, tsenmalaa ñulla yaꞌ tsamantsaa ajuusha mika sunden juu jinudetsu. 25 Tsaꞌ mitya main juu jumu Dios, matyu lalaꞌ Bale Ruku Jesucristoꞌ mityaren lalanu livee kemu Dios, yaa naa-uwanuba tsamantsa aawa juve, pude juve, tiba tsanguenuu bain juve naa kaspele bain, naa chaikama bain, naa naa-uwanuꞌ mitya bain. Tsaave.