Juanꞌ

pilla kiika main

1

Ajkeꞌ Palaa

1   Tiba

ajkeꞌ depeepunu uwanun yumaa chumunaa laapuꞌ piikendetsuyu, lalaꞌ meeñu jumunu, lalaꞌ kapukachin katañu jumunu; tsenmin ya naajuñu bain dekataꞌ, lalaꞌ tyaapachiren taꞌkamu dejuꞌ, Palaa mumu puushu juntsa chuwaamunaa laapuꞌ pandetsuyu. 2 Juntsa chuwaamu naajuꞌba entsai katawañu lala katamu deeyu, tsejtu lala juntsaave tis neꞌ, naa-uwanuba Diosba uraꞌ chunuu tiyanu dejuve tis nendetsuyu, yaꞌ Apaba bulu chutun lalanu entsai katawañu. 3 Tsajuꞌ lala tyee kataꞌ, meemu dejuꞌba juntsaa ñullanu waindetsuyu, tsenmalaa ñui bain laaba ma bulu ju dejuꞌ, laa bain naadejuꞌ Diosba ma bulu juumin, naa yaꞌ Na Jesucristoba bain ma bulu judeeñuba juntsaanudetsu. 4 Ñullanu entsaa piikentsulaya kumuinchi lala mika sundyaa junaa tsa dekiyu.  

 

 

Diosya ñillu juuñuu.

5 Entsa

kuindaa lala Jesucristonu demereꞌ, ñullanu mijakaandetsuyu: Diosya ñillu juuñu juꞌ, yanuya tiba dishkejtsa juu jutyuve. 6 Lala yaba bulu dejuyu tituren, dishkejtsa neiñuu dejushu juntsaa, anbutimu dejuꞌ anbuda juuya kendetsuyu. 7 Diosya ti kikeꞌ bain tiba naa naajuñuba tsa tsangue kemuve. Tsaañuꞌ mitya laa bain juntsaa chunuuya dejuyu. Tsajuꞌ lalanu Dios naaken chudei tiꞌ keewaañuba tsanguen dechushu juntsaa, lala vetaꞌ vetaꞌ buluu chumu tiyanu dejuyu, tsenñu yaꞌ Na Jesucristoꞌ asaya lalanu ti ujchaba demanbitsaamu juve. 8 Lala ti ujchaba tajtuyu detishu juntsaa, lalaren anbutikayandetsuꞌ, anbutimu deeyu. 9 Tsaaren lalaꞌ ujcha dewainshu juntsaa, yaa naake uraꞌ kemu juꞌba tsanguenu juꞌ, lalaꞌ ujcha bain, naa tiba urajtu jumula bain demanbitsaamu juve. 10 Lala ti ujchaba laindetyuyu tishu juntsaa, Diosnaa anbutimu kurendetsuyu, tsajuꞌ yaꞌ palaanu uwain meenguityu dejuꞌ bain tsangue keewaandetsuyu.  

 

 

 

 

697

1 JUAN 2  698

2

Cristaa lalanu balelaꞌ pamu

1   Keranguenu

mijantsumu chachilla, ñullanu entsaa piikentsumiya ujcha delatyusa tenñaa tsanguentsuyu; tsaaren mallee ujcha delashu juntsaa, lalaꞌ Apaꞌ ajuubi lalaꞌ mitya balelaꞌ pamu, Dios naakesa tyañuba tsanguemu ruku Jesucristonu lala miya deeyu. 2 Jesucristaa tutaꞌ keewarave, tsenmalaa kumuinchi lala, lalaꞌ ujcha manbitsalaa junudetsu, tsejtu lalaꞌ ujchaꞌ mityan jujutyuꞌ, kumuinchi chachillaꞌ ujcha depitsaanaa tsaive. 3 Lala Dios naa naakidei tiñuba tsanguen dechushu juntsaa, uwain yanu kera deeyu tyanu dejuyu. 4 Tsaaren mallee patu: Iyaa Diosnu kerayu, titun, yaꞌ uudennu meenguityu jushu juntsaa, anbutimu juꞌ, deechuꞌ palaanu meenguityu juve. 5 Tsaaren mun Diosaꞌ palaanu meenguemu juꞌ bain, Diosnu naa-i estyanuu juñu bain uwain tsai estya mijañuve. Tsajuꞌ lala Diosba uraꞌ jindetsuñu juu keewara jumuya entsaa juntsave: 6 Mun Diosba ma bulu juuyu timu juꞌba, Jesús naa-in chumuwaañuba ya bain juntsaa chunu juve. 7 Estennu keranguemu naatalala, ñullanu tsa tsanguidei titu kasa palaa juuya manbiikendyuꞌ, ajkeꞌ depeepunu uwanun ñulla kakemuwa deesu juntsaren juꞌ, kaspele naatimuwaañuba ñulla meekemuwa deesu juntsa kuindaren juve. 8 Tsaaren ura pañuya entsa pilla kentsaashu juntsaya kasa uuden juuñuu juve, tsejtu juntsa uuden uwain juntsajuꞌ Jesucristoꞌ mitya bain, ñullaꞌ mitya bain juntsaa keewara juve, matyu yapijuruuñuu jumuya de-iꞌ pullantsunmala, ura ñillu juuñuu jumaa yumaa danguikeñuu kentsuñuꞌ mitya. 9 Mun Diosba buunaꞌ ya naaken chudei tiꞌ keewaañuba tsanguen chumuyu titun yaꞌ naatalanu tyutyashu juntsaa, chaiba yapijurunainsha chunañuu juuve. 10 Mun yaꞌ naatalanu estyamuya danjurunainsha chunañuu juuve, tsajuꞌ yanuya tiba ujcha lawaakenuu jumu jaiba kataatyu juve. 11 Tsaaren yaꞌ naatalanu estyatyuya, chaiba dishkejtsa chunañuu juꞌ, dishkejtsan neiñuu juve, tsajuꞌ nuka jinduba mijtu juve, matyu dishkejtsaren yanu kapuka dandajtuu tirekeñuꞌ mitya. 12 Keranguenu mijantsumu chachilla, ñullanu entsa piikiyu, Jesucristoꞌ mityan ñullanu Dios ñullaꞌ ujcha demanbitsaañuꞌ mitya. 13 Keranguemu rukula, ñullanu piikentsuyu, matyu tiba depeepuꞌ inu uwanun, yumaa chumu Jesucristonu ñulla dekeemijañuꞌ mitya. Keranguemu unnala, ñullanu bain piikentsuyu, matyu firuꞌ jumunu depuiñuꞌ mitya. 14 Keranguenu mijantsumu chachilla, ñullanu piikentsuyu, ñulla maa Diosñu bain dekeemijañuꞌ mitya. Tsenmala rukula, ñullanu bain piikentsuyu, tiba depeepuꞌ inu uwanun yumaa chumu Jesucristonu ñulla dekeemijañuꞌ mitya.  

 

 

 

 

 

 

 

 

 

 699

1 JUAN 2

Tsenmala ñulla unnalanu bain piikentsuyu, ñullaya dera dejuꞌ, Diosaꞌ kuindanu demeengueꞌ, naa firuꞌ jumunu bain depuiñuꞌ mitya. 15 Entsa tusha tiba firuꞌ kekaakenuu jumunu bain, naa tiba firuꞌ jumu entsai kataamulanu bain estyatyudei. Tsajuꞌ mun entsa tusha tiba firuꞌ kekaakenuu jumunu estyamushu juntsaa, Diosapanu estyatyutaa tsaanu dejuve, 16 matyu tiba firuꞌ jumu entsai kataamulaya, naa lalaꞌ buluchi tiba kendyanu juu bain, kapukachi kereꞌ firuꞌ kendyanu juu bain, tsenmin tiba detadiꞌ dajtyanu juula bain, juntsalaya Diosnaa faleꞌ jamu dejutyuꞌ, tiba firuꞌ kekaakenuu jumunu faleꞌ jamu deeve. 17 Tsajuꞌ tiba firuꞌ kekaakenuu jumu bain, naa tiba firuꞌ jumu entsai kataamula de-iꞌ pullandetsuñuba, mun Dios naakesa tyañuba tsanguen chumu dejuꞌ bain, juntsalaya naa-uwanuba chunu dejuve.  

 

 

Cristonu kundaa tyamula

18 Keranguenu

mijantsumu chachilla, yumaa de-inu malu jave. ¿Ñulla mideetyuika naa Cristonu kundaa kemu main faanu juñuba? Tsenñu uwain Cristonu kundaa kemula challa pureꞌ faledekive, tsenñaa mijakeeve de-inu malu yumaa jantsuñu bain. 19 Yalaya lalaꞌ chundalan defaave; tsaaren lalaꞌ chachilla jutyuwa deeve, tsa juꞌba jutuya laaba chaiba bulu chunuu dejuve. Tsaaren entsaimiya uwain laaba bulu dejutyuñuba juntsa keewaanaa tsaive. 20 Ñullanuya Dioschin juu jumu, Cristo, Espíritu Santo kuwañuꞌ mitya, tyee minuu dejuꞌba juntsaatalaya aseeta dejuve. 21 Tsajuꞌ ñullanu entsaa piikentsumiya, anbuda jutyu kuindanu mijdetuñaa piikentsutyuꞌ, uwain ñullaya yumaa mideeñuꞌ mityaa piikentsuyu; tsenmin ñullaya mideeve naa tiba anbukuindaya ura kuindanu faatyuñu bain. 22 Tsejtu ¿maa anbutimu juñanga? Matyu mun Jesúsnu, yaa Dioschi Miꞌkeꞌ Kayamu Na jutyuve timu juꞌba juntsaa anbutimu juve. Tsajuꞌ yaa Cristonu kundaa chachi juve, matyu naa Diosnu bain, naa yaꞌ Nanu bain keenguityuꞌ mitya. 23 Mun Diosaꞌ Nanu, uwain yaꞌ Na jutyuve tiꞌ keenguityu juꞌba, yaꞌ Apaba buunatyu juve, tsaaren mun Diosaꞌ Nanu uwain yaꞌ Nave tiꞌ keenguemu juꞌba, yaꞌ Apaba buunave. 24 Tsajuꞌ ajkeꞌ depeepunu uwanun ñulla tyee mereꞌ keenguemu chachi tiyamu dejuꞌba, naa-uwanuba tsa tsanguen chudei. Tsejtu tsanguen dechushu juntsaa, naa-uwanuba yaꞌ Naba bain, naa yaꞌ Apaba bain bulu chunu dejuve. 25 Tsejtu Jesucristoya naa-uwanuba Diosba uraꞌ chunuu jumaa kuwanbera kenu tsuyu tive. 26 Ñullanu challa entsaa piikentsumiya, tujlekaanu kemulanu laapuꞌ piiketaa tsanguiyu. 27 Tsaaren ñullaya, Jesucristoꞌ kuwañu Espíritu Santo tadejuꞌ, muba demijakaasa menestejdetuve, matyu Jesucristoꞌ kuwañu Espíritu Santoren ñullanu aseetanguekaantsuñuꞌ mitya. Tsajuꞌ yaꞌ mijakaraya anbukuinda jutyuꞌ ura kuinda deeve. Tsaꞌ mitya ya naake mijakaañuba pashtyumujchi tsaa dechuꞌ, Cristoba ma bulu juu chudei.  

 

 

 

 

 

 

 

 

1 JUAN 2​, ​3  700 28 Tsaꞌ

mitya keranguenu mijantsumu chachilla, Jesucristoba ma bulu juu tsanadei, tsejtaa ya majaꞌ mangatawanmala yaꞌ ajuusha uwain tsaatuuve tenna juꞌ, ne yujkaꞌ kakenuu jukeyaiꞌnutsu. 29 Kumuinchi ñulla mideeve naa Cristoya Dios naakesa tyañuba tsanguen chumu juñu bain, tsajuꞌ aseeta judei, mu bain juntsanguen chumulaya Diosaꞌ chachi deeñuba.  

3

Diosaꞌ na deeyu.

1   Pensangueꞌ

keesai; Diosya lalanu tsamantsai estyamu juꞌba juntsaa keewareꞌ, lalanu Diosaꞌ na tikayanuu detireve, tsenñu uwain yaꞌ na deeyu. Juntsaañaa ujcha lan chumu chachillaya lalanu keemijdetuve, naa Diosnu bain keemijaindetyuꞌ mitya. 2 Estennu keranguemu naatalala, lala challaya Diosaꞌ na deeyu, naa bene tyee junu dejuꞌba juntsaya mijtu dejuꞌ bain, tsaaren Jesucristo maanmala ya naajuñuba tsaanu dejuꞌba juntsaa mideeyu, matyu ya naajuñuba tsangue katanu dejuꞌ mitya. 3 Tsajuꞌ mun juntsainu keenaꞌba, maalin Dioschi uraꞌ kuraa tiya tiyaintsuve, Jesucristo naajuꞌ Dioschi uraꞌ kuraa juñuba juntsainu. 4 Mu bain ujcha lamulaya Diosaꞌ uudennu kundaa kendetsuve, matyu ujchaya yaꞌ leinu kundaa jumuꞌ mitya. 5 Tsenmin ñullaya yumaa mideeve, naa Jesucristoya entsa tusha jatu lalaꞌ ujcha manbitsaanaa jañu bain, tsenmin yaa ti ujchaba jutyuñu bain. 6 Tsajuꞌ mun yaba buunamu juꞌ bain ujcha lan chutyu juve; tsaaren mun ujcha lan chumu juꞌ bain, juntsaya Cristonu keemijaindyuve. 7 Keranguenu mijantsumu chachilla, mu bain ñullanu anbuda dekeranguikaatyusa; mu bain Dios naakesa tyañuba tsanguen chumuya Dioschi mutyaꞌ keran chumu chachive, Jesucristo naajuꞌ Dios naakesa tyañuba tsanguemu juñu, juntsaatu. 8 Tsaaren ujcha lan chumu chachiya Dyabuluchive, matyu Dyabuluya uma ajkeꞌ depeepunu uwanun ujcha lan chumuñuꞌ mitya. Tsenñuren Diosaꞌ Naya, Dyabuluꞌ kiikenutsumu mushkaapunaa entsa tusha jave. 9 Mu bain Diosaꞌ naya ujcha lan chutyu juve, yanuya Dios kasa chachi juuya tireñu ujcha lan chun jutyuuya juꞌ mitya. 10 Entsaañaa naajulaa Diosaꞌ nala deeñu bain, naajulaa Dyabuluꞌ nala deeñu bain aseeta imu juve: naajulaa uraꞌ kiiken chutyu dejuꞌ bain, tsenmin naajulaa yaꞌ naatalalanu estyatyu dejuꞌ bain, juntsalaya Diosaꞌ nala dejutyuve.  

 

 

 

 

 

 

 

 

11 Uma

Vetaꞌ vetaꞌ estyanu

ajkeꞌ depeepunu uwanu ñullanu mijakara kuindaya vetaꞌ vetaꞌ estyan chudei tiñu jumaa juntsave. 12 Caínya Dyabuluchi juwaatu, yaꞌ bennanun tuꞌmuwaañu, lalaya juntsaa jutyusai. Tsen, ¿nenñaa Caín yaꞌ bennanu tuten? Yaa tuꞌmiya, yaꞌ keñu jumulaya urajtu deenmala, yaꞌ bennachiya ura deeñaa tsanguive. 13 Keranguemu naatalala, naa ujcha lan chumu chachilla ñullanu detyutyañu bain, nenñaa ne tsaatu den tyatyudei. 14 Naa lala kaspeleya pemu  

 

 

 701

1 JUAN 3​, ​4

juuñuu dejuꞌba, challaa chumu demandiyaꞌ bain lala mideeyu, matyu lalaꞌ naatalalanu estyamu deꞌ mitya. Tsajuꞌ mu bain estyatyuya chaiba pemu juuñuu juve. 15 Mun yaꞌ naatalanu tyutyamu juꞌ bain, chaꞌ tuꞌmu juuñuu juve, tsenñu ñulla mideeve muba chaꞌ tuꞌmuya naa-uwanuba Diosba uraꞌ chunuu jumu tadinu jutyuñuba. 16 Jesucristoya lalaꞌ mitya tuꞌkutimuwaañaa uwain mika estyaꞌ tsaimuñuba lala mideeyu. Tsaañuꞌ mitya naa laa bain peyainuuba jushu juntsaa, lalaꞌ naatalalaꞌ mitya tsainuuya dejuyu. 17 Tsaaren main tyeeba tanaꞌ bain, yaꞌ naatala tiba meneste juu chuñu kataturen, tiba laꞌkaveteiꞌshu juntsaa, ¿nejtaa Diosnu estyamu junu jun? 18 Keranguenu mijantsumu chachilla, lala estyamu deeyu tishu juntsaa, palaachin ne tsandimu jutyusai; tsa jutyuꞌ, estenve tishu juntsaa uwain tsa tsangue keewaasai. 19 Lala entsanguen chutaa mijanu dejuyu uwain anbuda jutyu jumunaa bendaa jintsuꞌ, Diosaꞌ ajuusha ti kuipaba jutyu pensa junu dejuꞌ bain. 20 Tsaaren lalaꞌ pensaren tyeeba kuipa juyu tyashu juntsaa, kayu Diosya lalaꞌ tenbukanu depullaa juꞌ, tiba demiive tyanu dejuyu. 21 Tsaaren in estennu keranguemu naatalala, lalaꞌ pensasha ti kuipaba jutyuyu tenshu juntsaa, kayu jela putyu Diosnu kalen miꞌnajinuu dejuyu. 22 Tsenmala yaa lala ti depaꞌñu bain dekuwanu juve, matyu ya naa naakidei tiñuba lala meenguendetsuꞌ, tyee keñaa uutyamuñuba tsaaya kiikendetsuñuꞌ mitya. 23 Tsenmin entsaaya kidei tive: yaꞌ Na Jesucristonu dekeenguisa tyaꞌ, ya naa naakidei tiñuba tsangueꞌ laatala bain vetaꞌ vetaꞌ estyan dechusa tyave. 24 Mun ya naa naakidei tiñuba meenguen chuꞌ bain Diosba bulu chuve, tsenmala Dios bain yaba bulu chuve. Tsenmin uwain ya bain laaba bulu chuñuba milaya yaꞌ Espíritu Santo kuñuꞌ mityaa mideeyu.  

 

 

 

 

 

 

 

 

 

4

1   Estennu

Anbutitun Diosaꞌ mitya pamuyu timula

keranguemu naatalala, ne naajulaa Diosaꞌ Espíritu tsandikaañaa tsandintsuyu detiñuba tsa tsai meedityuꞌ, uwain uraꞌ pantsuñuba mijanu keꞌ keedei, matyu entsa tusha anbutitun Diosaꞌ mitya pamu chachi deeyu timula puredenañuꞌ mitya. 2 Ñulla entsanguitaa mijanu dejuve uwain Diosaꞌ Espírituchee tsandintsuñuba: Mun uwain Dioschi Miꞌkeꞌ Kaya Jesús entsa tusha jatu chaꞌ ruku juuya jave timu juꞌba, juntsaa Diosaꞌ Espíritu tave. 3 Tsaaren mun Jesús Dioschi Miꞌkeꞌ Kayamu jutyuve timu juꞌba, juntsaya Diosaꞌ Espírituchee tsandityu juꞌ, Cristonu kundaa kemu chachive; tsenmin ñulla meemuwa deeve naa entsa tusha Cristonu kundaa kemu janu tsuve detiñu bain, tsenñu challa yumaa jaꞌ puve. 4 Keranguenu mijantsumu chachilla, tsaaren ñullaya Diosaꞌ chachi dejuꞌ, entsa anbutis nemulanu puimuwa deeve, matyu ñuiba buunamuya entsa tusha uudenguen chumunu kayu pullañuꞌ mitya. 5 Yalaya tiba firuꞌ kekaakenuu jumu naaken chusa tyañuba tsanguen chumu dejuꞌ mityaa, juntsaatala pamu deeve, tsenmala juntsaa ken chumulaya meenguemu deeve. 6 Tsaaren lalaya Dioschi deeyu, tsenñu Diosnu keralaya lala tyee depañuba meenguemu deeve, tsaaren Diosnu kerajtulaya lalanu  

 

 

 

 

1 JUAN 4​, ​5  702

meenguityu deeve. Entsaañaa mijamu deeyu naajulaa Diosaꞌ Espírituchi pamu deeñu bain, naajulaa Diosaꞌ Espírituchi jutyu pamu deeñu bain. Diosya estyamuve.

7 Estennu

keranguemu naatalala, laatala vetaꞌ vetaꞌ estyan chusai, matyu estyanu pensaya Diosnaa faleꞌ jamuñuꞌ mitya. Tsajuꞌ mu bain estyamulaya uwain Diosaꞌ na dejuꞌ, Diosnu kera deeve. 8 Tsaaren estyatyulaya Diosnu kerajdetuve, matyu Diosya estyamuñuꞌ mitya. 9 Diosya entsanguitaa naa lalanu estyamu juꞌba keewaave: Diosya lalanu estyaꞌ mityaa, yaꞌ Na main juunuren entsa tusha eeve, tsenmalaa lala yaꞌ mityan naa-uwanuba chumu tiyanudetsu. 10 Juntsa estyanu keewaraya entsaave: ne lala Diosnu deestyañaa, lalanu estyanchin yaꞌ Nanu engu ereꞌ, ujcha manbitsaanu lalaꞌ mitya peyakarendyuve; tsa jutyuꞌ, yaa lalanu estyanchin tsanguive. 11 Tsajuꞌ estennu keranguemu naatalala, Diosren lalanu estyaꞌ entsanguishu juntsaa, laa bain vetaꞌ vetaꞌ estyanuu dejuyu. 12 Mu bain Diosnuya kataꞌ kerajdetuve, tsaaren laatala vetaꞌ vetaꞌ estyan dechushu juntsaa, Dios laaba buunaꞌ chuve, tsajuꞌ ya naa-i estyamuñuba laatala estyataa juntsaa keewaanu dejuyu. 13 Lala Diosba bulu dejunmala, ya bain laaba buunañuba keewara jumiya, yaꞌ Espíritu lalanu kuwañuꞌ mityaa, juntsaa juve. 14 Tsenmin lalaya katamu deꞌ mityaa, uwain Dios yaꞌ Nanu entsa tusha eetu, ujcha ken chumu chachillanu livee kenaa eeve tiꞌ pandetsuyu. 15 Mu bain uwain Jesúsya Diosaꞌ Nave tiꞌ keenguemulanuya, Diosba buunanmala Dios bain yaba buunaꞌ chuve. 16 Entsaitaa naa lalanu Dios estyamuñuba mijaꞌ dekeenguiyu, matyu Diosya estyamuñuꞌ mitya. Tsenmala mun estyan chumu juꞌba Diosba buunanmala Dios bain yaba buunaꞌ chuve. 17 Lalaꞌ estyanu pensa awañu, lala deechuꞌ ken chumu tiyamiya, kavitu dekenu malunu jee pensajtu keenanu dejuyu, matyu Jesús entsa tusha naaju chumuwaañuba laa bain juntsaa dechuꞌ mitya. 18 Uwain narai estyamuya jee pensa putyu juve, tsajuꞌ uwain estyanu pensaya jee pensajtungue tiremuve, matyu jee pensa pushu juntsaa kuipa juñaa tsaanu juñuꞌ mitya. Tsajuꞌ mun chaiba jee pensa pushu juntsaa uwain narai estyanu mijaindyutaa tsaanu juve. 19 Lala estyanu demijayu, matyu yaa lalanu ajkeꞌ estyamuwaañuꞌ mitya. 20 Mu bain Diosnu estenve tituren, yaꞌ naatalanuya estyatyushu juntsaa, anbutimu chachive. Tsajuꞌ, yaꞌ katan chunu naatalanun estyatyushu juntsaa, ¿kayu naajutaa naa kataaba ityu Diosnaa estyanuu jun? 21 Dios lalanu entsaaya kidei tiꞌ shuikive: mun Diosnu estyamushu juntsaa, naa Diosnu keranguemu naatalanu bain estyade, tive.  

 

 

 

 

 

 

 

 

 

 

 

 

 

5

1   Mun

Deraꞌ keenguemulaa ujchanu puinu dejuve.

Jesúsya, Dioschi Miꞌkeꞌ Kayamuve tyaꞌ keenguemu juꞌba, uwain Diosaꞌ nave; tsenmin mun ma apanu estyamushu juntsaa, naa yaꞌ nalanu bain tsaren estyanu juve. 2 Tsajuꞌ lala Diosnu estyaꞌ, ya naa  

 703

1 JUAN 5

naakidei tiñuba tsangue demeenguishu juntsaa, naa Diosaꞌ nalanu bain tsaren estyanduba mideeyu. 3 Lala Diosnu estyanuya ya naa naakide tiñuba meenguenaa juve; tsenmin ya naa naakidei tiñuba juntsala tsa tsanguenu taajuꞌ dejutyuve, 4 matyu Diosaꞌ na jun mityan entsa tusha tiba firuꞌ jumulanu puimu juve. Tsenmin lala keenguemu dejutaa entsa tusha tiba firuꞌ jumulanu puimu deeyu. 5 Tsajuꞌ mun uwain Jesúsya Diosaꞌ Nave tyaꞌ keenguemu juꞌba, juntsaya entsa tusha tiba firuꞌ jumulanu puimu juve.  

 

 

6 Jesucristo

Dios yaꞌ Naꞌ mitya pamuwaami.

lalaꞌ junga jave tiꞌ keewara señas jumulaya pi bain, asa bain judeeve; tsajuꞌ piren jujutyuꞌ, pi, asabaa a juve. Tsenñu Espírituren entsaive timu juve, tsenmin Espírituya anbutityu juve. 7 Uwain Jesúsya Dios eeñu jamuve tiꞌ keewaamula pema dejuve: 8 Espíritu bain, pi bain, asa bain, tsejtu entsa pema jumula ma pensaa judeeve. 9 Uwain lala, main veelaꞌ mitya depañuba meenguemu deeyu; tsaashu juntsaa, Diosaꞌ palaanaa kayu meenguenuu dejuyu, yachee kayu bale palaa juñu, tsenmin yaa yaꞌ Nanu laapuꞌ pamuwaañuꞌ mitya. 10 Mun Diosaꞌ Nanu keenguemu juꞌba, Dios yaꞌ Nanu laapuꞌ patu naatiñuba keenguemu juve. Tsaaren mun Dios naatiñuba keenguityushu juntsaa, Diosnaa anbutimu kurentsuve, matyu Dios juntsandiꞌ yaꞌ Nanu laapuꞌ pañu palaanu keenguityuꞌ mitya. 11 Tsen, ¿Dios yaꞌ Nanu laapuꞌ patu tyee mijakareꞌ pañanga? Entsaa mijakaave: Diosya lalanu naa-uwanuba yaba uraꞌ chunuu tireve, tsaaren naa-uwanuba Diosba uraꞌ chunuu jumiya yaꞌ Naꞌ mityaa tsainuu jumi. 12 Tsajuꞌ mun Diosaꞌ Naba buunashu juntsaa, naa-uwanuba Diosba uraꞌ chunuu juve, tsaaren mun Diosaꞌ Naba buunaiꞌshu juntsaa naa-uwanuba tsana chunuu jun jutyuve.  

 

 

 

 

 

13 Ñullanu,

De-insha palaa

Diosaꞌ Nanu keenguemulanuya entsa piikentsuyu, tsenmalaa ñullaya naa-uwanuba Diosba uraꞌ chunuu dejuꞌ bain mijanudetsu. 14 Lala uwain keengueꞌ Diosya tiba tsanguenu tsuve tenna dejushu juntsaa, tyee yanu depaꞌñuba yaa kuwamu juve, yachi bain tsangueñu urashu juntsaa. 15 Tsajuꞌ lala ti depaꞌñuba Diosya meetu uwain kuwamu juñuba mideꞌ mitya, lala ti depakeꞌ bain uwain kanbera kenu dejuyu tyaꞌ dekeenayu. 16 Tsandenna ma naatala tsai peyainuu jutyu ujcha kentsushu juntsaa, yaꞌ mitya Diosba kuinda kide; tsenmala Dios juntsa naatalanu naauwanuba yaba uraꞌ chunuu mandirenu tsuve, uwain tsai peyanuu jutyu ujchanmalaya. Tsaaren tsai peyanuu jumu ujchaꞌ mityaya Diosba kuinda  

 

 

a 5.6 pi asaba titu, pureꞌ chachilla entsangue aseetanguemu deeve: pinu laapuꞌ pamiya Jesús mungaramuwaañu, juntsanu laapuꞌ pataa tsandimu deeve; tsenmala asanu laapuꞌ pamiya Jesús tutamuwaañu, juntsanu laapuꞌ pataa tsandimu deeñu aseetanguemu deeve.

1 JUAN 5  704

kenuu juve tiꞌ laapuꞌ paindyuyu. 17 Uwain tiba firuꞌ keñu jumula ujcha deeve, tsaaren mantsa ujcha jumulaya tsai peyakaakenuu jutyu bain dejuve. 18 Tsenmin lala mideeyu, munu bain Dios yaꞌ na juu tiremunuya ujcha kiiken chutyu deeñu bain, tsenñu Diosaꞌ Na, Jesúsya yalanu washnamu juve, tsenmala firuꞌ jumu bain tibanguenuu jutyuve. 19 Lalaya mideeyu naa Diosaꞌ chachi dejuꞌ bain, tsenmala kumuinchi vejanlaya firuꞌ jumuchee uuden in dechuñu bain. 20 Tsenmin mideeyu naa Diosaꞌ Na engu jatu, lalanu aseetaju tireꞌ, uwain Diosnu keemijanuu tireñu bain. Tsenmin lalaya uwain anbuda jutyubaa debuunayu, ura patiñuya, yaꞌ Na Jesucristoba. Tsajuꞌ yaa uwain Dios juve, tsenmin naa-uwanuba Diosba uraꞌ chuwaanuu jumuve. 21 Keranguenu mijantsumu chachilla, tujletyuꞌ chi dyuslanu keenguenu kityudei.