Tesalónicasha keranguemulachi

Pabloꞌ pilla kiika main

1

Uraꞌ dejusa tindu

1   Lala,

Pablo bain, Silvano bain, Timoteo bain entsa kiika ñullanu Tesalónica pebulusha kerangueꞌ waku wakudimulachi piikendetsuyu, ñulla Dioschi bain, Bale Ruku Jesucristochi bain dejuꞌ ma bulu juu chumulanu. Dios ñullanu estyaꞌ keewareꞌ, tiba bulla jutyu uraꞌ dechuwaasa tenve.

2 Naa-uwanuba

Tesalónicasha keranguemula naake uraꞌ dekeñuba

Diosba kuinda kendu ñullanu tengaya jujuutu, kumuinchi ñullaꞌ mitya Diosnu yuj urave tiitindetsuyu. 3 Naa-uwanuba lalaꞌ Apa Diosaꞌ ajuusha ñullanu tengaya juju deeyu, ñulla keenguemu dejuꞌ tiba uraa kiidekiñu, estyamu dejuꞌ ti taawashaba kiidekiñu, tsenmin uwain Bale Ruku Jesucristo tsanguenu tsuve tenna dejuꞌ, yanu washnaꞌ tsaaren jindetsuñuꞌ mitya bain. 4 Keranguemu naatalala, Dioschi estyanu chachilla, naa Diosya ñullanu yaꞌ chachi detirenu miꞌkeꞌ kañuba lala mideeyu, 5 matyu lala ñullanu Diosaꞌ mika ura kuinda mijakaatu, ne palaachin patiꞌmujchi Espíritu Santo tsanguikaañu, naa tiba tsamantsaa keꞌ keewara juula bain dekeꞌ keewaayu, uwain keengueꞌ tsanguendu. Tsenmin lala naa naadejuñuba ñulla tsaanu katataa mijamuwa deeve, lala tsanguendu ñuichi uraanuu kendaa tsanguendetsuñu bain. 6 Tsejtu ñulla vetaꞌ pensa dekeꞌ, lala naadejuñuba juntsaa tiya deive, Bale Ruku naajuñuba tsangues jijiindu. Tsejtu naa taaju indu bain, juntsa mijakara kuindanu sunden demeenguive, Espíritu Santo naake sundyawaamu juꞌba tsangue sundyawaantsuñu. 7 Ñulla entsaitaa, naa Macedonia tusha bain,  

 

 

 

 

614

 615

1 TESALONICENSES 1​, ​2

naa Acaya tusha bain keenguen chumulanu naa naaju chunuu juñuba tsangue dekeewaave. 8 Tsenmin ñullaꞌ mityan Bale Rukuꞌ kuinda ne jundalan mijaindetyuꞌ, ñulla Diosnu naake keenguemu deeñuba juntsa kuinda nukaba demija deiñuve. Tsa deeñuꞌ mitya, lala yalanu kayu tiba manbatinuu meneste dejutyuyu. 9 Tsenmin nuka bain chachilla kuinda keꞌ, lala ñullaꞌ junga dejañu, ñulla naake uraꞌ mikamuwa deeñu bain, tsenmin naaketaa chi dyusnu demandyaiketu, uwain chumu Diosnaa dekeengueꞌ, yachee tiba kiikemu detiyañuba yalaren papadetive. 10 Tsenmin ñulla, Diosaꞌ Na Jesús peyañuren Dioschi mangujtamu Jesús, selusha puꞌ tusha maanu juve tyaꞌ dekeenañu bain kuinda kiidekive. Jesúsya, naa chachilla bene kavitu iꞌ taaju inuu dejuñuba, lalanuya livee kemu juve.  

 

 

2

1   Keranguemu

Tesalónicasha Pablo tyee kiikeñuba

naatalala, ñulla mideeve, naa lala ñullaꞌ junga jatu uraaya de-ikaañu bain. 2 Lala kaspele ñullaꞌ pebulusha kayu jaindyutu, Filipos pebulubi firuꞌ pakayaꞌ, naa tituba taaju imuwa deeñu bain ñulla mideeve. Tsejtu ñullaꞌ pebulusha dejañu, veela kundaa tyantsumuwa deeñu bain, Dios lalanu daj pensa manguñuya, ñullanu yaꞌ mika ura kuinda mijakaamuwa deeyu. 3 Tsejtu lala Diosaꞌ palaa mijakaandu ne detujlaa kuinda kendetyuꞌ, ne Dioschi firuꞌ kuraa tirekaanu tsandindetyuꞌ, tsenmin munu bain anbukuinda keranguikaanu tenñu tsandindetyuwayu. 4 Tsa jutyuꞌ, Diosren lalanu tsangueꞌ yaꞌ mika ura kuinda mijakares nenu tireñaa tsa detiyu, tsejtu chachiitala uraꞌ katawanu miꞌkiꞌmujchi, lalaꞌ tenbuꞌ pensasha bain keemu Diosnu uraꞌ tyawaanaa tsandindetsuyu. 5 Tsenmin ne lalaa uraꞌ katawanu tenna dejuꞌ uumeraꞌ palaachi papatindetyuꞌ, ne tsangueꞌ lushi kanu bain tsanguendetyuñuba ñulla mideeve. Tsa deeñu Dios bain mive lala uwain tsaa pensa dejutyuñuba. 6 Tsenmin naa-uwanuba lalaya naa muchi bain, naa ñuichi bain, naa veelachi bain balengurachi tenna miꞌkes nendetyuyu, 7 naamika lala Cristoꞌ mitya kuinda kenu laraꞌ eramu deetu, ñullanu naake uudenguendenñuba tsanguenuu dejuꞌ bain. Tsa jutyuꞌ, lalaya ñullanu ma shinbu yaꞌ kaillanu uraꞌ washkemu juuñuu jumuwa deeyu. 8 Tsenmin ñullanu tsamantsa estyamu detiyaꞌ mitya, Diosaꞌ mika ura kuindaren mijakaakiꞌmujchi, naa ñullaꞌ mitya bain peyainuu juñuya peyainuuya dejuyu, ñullanu tsamantsai estyamu detiyaꞌ mitya. 9 Keranguemu naatalala, ñulla tengaya deeve lala naake taawasha keꞌ taaju kindaa laachi finutsumi kan chumu deeñuba, naa mandala bain, naa kepe bain taawasha kiikentsumuwa deeyu, tsejtaa lala Diosaꞌ mika ura kuinda mijakaren chungama ñullanu bulla kiikentsun jutyu. 10 Tsenmin ñui bain, naa Dios bain mive naa lala ñuiba, keranguemulaba bulu chutu naake Dioschi uraꞌ ken chumu deeñu bain, tsenmin ne urajtu depave tiꞌ naꞌbaasa pakayainuu dejutyuñu bain. 11 Tsenmin ñulla uraꞌ mideeve, naa lala, ma apa yaꞌ nalanu naake uraꞌ kiikemuñuba ñullanu main main tsa tsanguentsumuwa deeñu bain, 12 matyu  

 

 

 

 

 

 

 

 

 

 

1 TESALONICENSES 2​, ​3  616

ulendinaꞌ bain, sunden pensa juu mandirenaꞌ bain, tsenmin Dios naaju dechusa tyañuba tsanguen chukaanu bain papatintsumuwa deeyu, matyu yaa rei juꞌ tsamantsaa chuinsha bulu puveꞌnu mikantsuñuꞌ mitya. 13 Tsejtu lalaya naa-uwanuba Diosnu yuj urave tinchin judeeyu, matyu lala demijakaañu, ñulla Diosaꞌ mika ura kuinda demeetu, ne chachillaꞌ kuinda jutyuve detyaꞌ, uwain Diosaꞌ kuindave tyaꞌ demeenguiñuꞌ mitya. Tsenñu juntsa kuindaren ñulla keenguemulanuya uraꞌ kekaantsuve. 14 Keranguemu naatalala, ñulla, ñullaꞌ chachillachin desuraꞌ firuꞌ iꞌ puitu, kaspele Judea tusha chumu Diosaꞌ chachilla, Jesucristonu keranguemula, judío chachiitala naa-i desuraꞌ firuꞌ iꞌ puimuwa deeñuba, ñui bain juntsaaya de-ive. 15 Juntsa judíolaa Bale Ruku Jesúsnu tuꞌmu dejuꞌ, naa Diosaꞌ mitya pamu rukulanu bain tuꞌmuwa deeve, tsenmin lalanuya majukaꞌlaamuwa deeve. Yalaa Diosnu uraꞌ tyawaanuu kityu dejuꞌ, naaju chachillanu bain tiꞌ mityaba kundaa kemu deeve. 16 Tsejtu lala judío chachi jutyulanu kuinda keꞌ livee kenu detyañu bain, tsanguikaatyu dejuꞌ yala juntsaatu, kayu yalaꞌ ujcha seewaakendetsuve. Tsaaren Dios yalanu ajaatyaꞌ, yumaa taaju iwaangumanave tsanguindetsuñu dyaꞌkawaanu.  

 

 

 

Keranguemulanu Pablo mangueejinu kiikemi.

17 Keranguemu

naatalala, lala jayu tinbuꞌ mitya debaꞌkeꞌ mijiꞌ ñullanu katandetsutyuꞌ bain, ñullanu pensa jumuwa deeyu. Tsejtu yuj majaꞌ keenu teja tejaimuwaave. 18 Tsejtu majaꞌ keenu kiidekiyu, ura iya, Pabloya, pureꞌ bijee majaꞌ keenu kiñuren, Satanásya lalanu eekaanu kityu jujuuve. 19 Tsaaren Bale Ruku Jesús maanmalaya lalaa ñullaꞌ mitya yaꞌ ajuusha sunden keenanu detsuyu, ñullaa laachi uraꞌ dekiñu daj keewara junu deeñuꞌ mitya. 20 Tsajuꞌ uwain ñullaa lalanu dajtyawareꞌ sundyawaanuu jumula deeve.  

 

 

3

Timoteo erami.

1   Tsejtu

ñullanu manguerajtu tsa denaꞌ naaken tsandenñu, laa tene Atenas pebulubi shuwanu tiyatu, 2 lalaꞌ keranguemu naatala Timoteonaa de-eewayu; ya bain Diosaꞌ mitya laaba Cristoꞌ mika ura kuinda mijakares nemu juve. Tsanguilaya ya jiꞌ ñullaꞌ keenguenutala kayu deraꞌ mandireꞌ sunden pensa manguikaanaa tsa dekiyu, 3 tsenmalaa mu bain entsa-iꞌ taaju de-iꞌ bain, bengaꞌ tyullaa iꞌnudetsu. Ñulla mideeve naa kumuinchi lala entsai taaju iꞌ pulla pullainu dejuꞌba. 4 Tsenmin kaspele ñuiba bulu chuumalaren naa lala keenguemulaya taaju iꞌ puinu dejuꞌba ajkesha tsainu tsuve tiꞌ mijakaamuwa deeyu. Tsenñu uwain tsaa de-iꞌ puiñu bain ñulla mideeve. 5 Tsejtu kuinda mamijanu tenñun, naaken tsaa jutu, Timoteonaa eewayu ñullaꞌ keenguenu pensa naaju jintsuñu bain mijanu, matyu ujcha lawaamu Dyabulu ñullanu ujcha lawaanmalaya, lalaꞌ taawasha tsaa nejuu tiyainu juñuꞌ mitya.  

 

 

 

 617

1 TESALONICENSES 3​, ​4

Timoteo Tesalónicasha jiꞌ maami.

6 Tsaaren

challa Timoteo ñullaꞌ junga jiꞌ maatu, ñulla Diosnu uraꞌ keranguenutala bain, estyanutala bain naadejuñuba mijaꞌ maatu, uraa kuinda manjave. Tsejtu ñulla naa-uwanuba lalanu estyaꞌ tengaya dejuꞌ, lalanu mangatanu ajchundyandetsuꞌ, laa bain naatyandetsuñuba ñui bain juntsa deeve tive. 7 Tsaañaa keranguemu naatalala, naa lala taaju iꞌ pullandu bain, ñulla kerangueꞌ uraꞌ jindetsuñu mamijatu, lalanu yuj sundenve. 8 Matyu ñulla Bale Rukunu uraꞌ keengueꞌ jindetsuñuba mamijataa, challa uraꞌ demachuyu. 9 Tsejtu ñulla lalanu tsamantsa desundyawaañu, ¿kayu naa titaa Diosnu ñullaꞌ mitya yuj urave tinaanga? 10 Lala ñullanu mangatakaasa tenñu naa mandala bain, naa kepe bain Diosnu pake pakekendetsuyu, tsejtaa ñulla Diosnu keranguendu tyee kayu mika aseeta dejuiꞌñu bain millangue aseetanguikareꞌ deraꞌ keenguemu tirenu. 11 Tsajuꞌ, lalaꞌ Apa Dios bain, tsenmin lalaꞌ Bale Ruku Jesucristo bain lalanu kiveꞌsa, tsenmala lala ñullaꞌ junga majaꞌ keenudetsu. 12 Tsenmin Bale Ruku ñullanu kayu seewareꞌ ñuitala bain, tsenmin kayu veelanu bain estyawaasa, lala ñullanu naa-i estyandetsuñu bain juntsaju. 13 Lala tsandi paꞌlaya, ñullaꞌ tainsha Dios deraꞌ ju tireꞌ, ñullaꞌ tenbuka ujcha tajtu juꞌ, lalaꞌ Apa Diosaꞌ ajuusha yachin juu dekatawanu tiresa tenñaa tsa detiyu, tsenmalaa Bale Ruku Jesús kumuinchi yachin juu jumulaba maanu uranu sekuwaju keenanudetsu.  

 

 

 

 

 

 

4

1   Keranguemu

Naaju chuñaa Dios uutyamuñu bain

naatalala, Bale Ruku Jesúsnu pakaꞌ, ñullanu entsaaya kide tindetsuyu: lala ñullanu Dioschi naaju chuñaa urañuba yumaa demijakaañu, ñulla naaken dechuꞌba kayu malumere tsangues jintsudei. 2 Ñulla yumaa mideeve, lala ñullanu Bale Ruku Jesúsꞌ mitya dewandiꞌ, naakenu juve detiñu bain. 3 Diosya ñullanu yachin juuya dechuꞌ, naꞌbaasa tsa tsa-in dechutyusa tyave, 4 matyu main main luꞌtsaꞌ shinbuba a naake deechuꞌ chunuu juñuba tsanguen dechuꞌ, ujcha lainuu kityuꞌ, Dioschi uraꞌ kurainuuya ken dechuꞌ, 5 Diosnuya keranguityu, tsenmin Diosnu kerajtu chachilla tsaa, mika firuꞌ pensa dejuꞌ naakemu deeñuba, ñullaa tsanguen chutyudei. 6 Tsajuꞌ mu bain entsaatalaya vejan keranguemu naatalanu firuꞌ kikenuu kityudei. Lala ñullanu yumaa wandiꞌba detyeesu Bale Rukuya entsangueꞌ firuꞌ kemulanu taaju iwaamuve, 7 matyu Diosya lalanu yachi firuꞌ kuraa jumu ken chunu mikaindyuꞌ, lalanu yachin juuya dechunu mikave. 8 Tsajuꞌ mun entsaa mijakaranu meenguityuꞌ bain, chaꞌ rukunaa meenguindyuu jutyuꞌ, ñullanu yaꞌ Espíritu Santo kuwamu Diosnaa meenguindetyuu juve. 9 Tsenmala keranguemu naatalaatala vetaꞌ vetaꞌ estyanutalaya ñullanu piikenu menestejtuve, ñulla Dioschin yumaa demijakarave vetaꞌ vetaꞌ  

 

 

 

 

 

 

 

a 4.4 luꞌtsaꞌ shinbuba tityumujchi, luꞌtsaꞌ bulu tiꞌ aseetanguikara bain junu juve.

1 TESALONICENSES 4​, ​5  618

naa-i estyanuu juñuba. 10 Tsejtu ñulla kumuinchi vejan keranguemu naatalalanu Macedonia tu kuraa chumulanu yumaa tsanguendetsuve. Tsaaren keranguemu naatalala, naa ñulla tsanguendetsuñu bain, kayu estyaꞌ keewaren dechusa tiꞌ pandetsuyu. 11 Tiba bulla jutyu uraꞌ chudei, veelanu bulla ken chutyuꞌ, ñullaꞌ tyaapachi kenu taawashanu pensaa dejuꞌ, lala naadetiñuba juntsaaya ken chudei. 12 Tsanguen dechunmalaya keranguityu chachilla ñulla naaken dechuñuba keenaꞌ balenguunu dejuve. Tsejtaa ñulla tiꞌ mityaba veelanu menestee jun dejutyuve.  

 

 

Bale Ruku maanu juve.

13 Keranguemu

naatalala, pemulanu laapuꞌ panmalaya naa naajuñuba uraꞌ demijasa tenve, tsejtaa ne veela tsaa bene tyee inuuñuba mijdetuꞌ, ñui bain juntsangue llakinguiiken chuiꞌnudetsu. 14 Lalaya uwain Jesús peyaturen mangujtañuba keenguemu deeshu juntsaa, tsaren Jesúsnu keenguen chuꞌ peyamulanu bain Dios mangujteꞌ Jesúsba bulu chukaanuu juñuba juntsa bain keranguenuu dejuyu. 15 Tsaꞌ mitya Bale Rukuren tsandimuwaañu, lala ñullanu entsaaya mijakareꞌ pandetsuyu: lala Bale Ruku majangama chumulaya yaba waꞌdinu, peyamulanu pullai ajkeꞌ jinu dejutyuyu. 16 Juntsa uranu Bale Ruku uudengueꞌ pañu meejaꞌ, aa bale anjee pan tsandinu tsuve; tsenmin Diosaꞌ tyujtyu pakaanu uranu Bale Rukuren selusha puꞌ pajanu tsuve. Tsenmala Cristonu keranguen chuꞌ peyamulaya ajkeꞌ mangujtanu detsuve. 17 Tsenñu lala peyaiꞌmujchi chumulaya yaiba ñivijchasha mabuudinu kayaꞌ jiꞌ Bale Rukunu katajinu detsuyu. Tsejtaa naa-uwanuba Bale Rukuba tsananu detsuyu. 18 Tsaꞌ mitya entsaa kuindaa kiidekeꞌ, vetaꞌ vetaꞌ sunden pensa manguwan chudei.  

 

 

 

 

5

Bale Ruku maanu juñu jinu keenadei.

1   Keranguemu naatalala, naamaa tsainuuñu bain, tsenmin naaju tinbutalaa

tsainuuñu bain juntsaya piikenu menestejtuve. 2 Ñulla yumaa nara mideeve naa Bale Rukuya ñulla dekeenaiꞌnu malunaa maanu juñu bain, tsejtu taamu rukaaba juꞌ kepe jan tsainu tsuve. 3 Tsejtu chachilla: Tiba bulla jutyu, uraꞌ dechuyu, tindetsunmalaa, wajturen tsamantsa taaju de-ikareꞌ mijakaakenu tsuve, matyu ma shinbu nakanu ura tiyañu kityaꞌ mijan tsa-iꞌ, nakaiꞌmujchiya livee in jutyu jun tsaanu tsuve. 4 Tsaaren, keranguemu naatalala, ñullaya dishkejtsa juuñuu dechutyuꞌ, juntsa malunu dekeenaꞌ, taamu rukulanu kataꞌ wapanan tsainu dejutyuve. 5 Kumuinchi ñullaya mandala juuñuu tene dejuꞌ, dishkejtsa juuñuutala nemu dejutyuve. 6 Tsajuꞌ veela tsaa kasuꞌtsun tsa denatyuꞌ, viñaa jutyuꞌ nara tengaya dejuꞌ, tiba jutyu keenanu kisai. 7 Kasmulaya kepee kasmu deeve, tsenmala viñamula bain kepee viñamu deeve. 8 Tsaaren lalaya, mandala juuñuu chumu dejuꞌ mitya, nara tengaya chunu kisai. Tsejtu Diosnu keengueꞌ estyandaa ma suutadu ruku yaꞌ jeru jali tenbapunu panan tsanguisai. Tsenmin Diosyaa uwain livee kemu juve tenna dejuꞌ, ma suutadu ruku yaꞌ mishpukanu tiba ikaan jutyu jeru  

 

 

 

 

 

 

 619

1 TESALONICENSES 5

sunberu puken tsanguenu kisai, 9 matyu Diosya lalanu taaju de-iwareꞌ puitekaanaa kaindyuꞌ, lalanu lalaꞌ Bale Ruku Jesucristoꞌ mitya livee ikaanaa miꞌkeꞌ kañuꞌ mitya. 10 Jesucristaa lalaꞌ mitya peyave, tsejtaa naa lala dechuñu bain, naa lala peyaꞌ detsuñu bain, bene yaba bulu dechusa tyatu. 11 Tsaꞌ mitya vetaꞌ vetaꞌ sunden pensa manguwaꞌ deraꞌ mandimishtidei, challa naakendetsuꞌ bain tsa tsanguendu.  

 

 

Keranguemulanu ulemi.

12 Keranguemu

naatalala, ñullaꞌ kejtsapala Dioschi taawasha kemu bale rukula, ñullanu mijakareꞌ, naa uleꞌ papadetiñu bain balengureꞌ meenguidei. 13 Tsejtu yalaꞌ taawashaꞌ mitya yalanu estyaꞌ balenguredei. Ñuitala vetaꞌ vetaꞌ tiba bulla jutyu uraꞌ chudei. 14 Tsenmin keranguemu naatalala, entsaatala uraꞌ kidei tindetsuyu: pañu meetyu naꞌbaasa kes nemu chachillanu nepadei; sundengajtu chumulanu bain sunden mandiredei; naajulaa yai teneya naaken tsaa dejuñuba, juntsalanu laꞌkaveteꞌ baleladei; tsenmin munu bain jei kidandai paijtyu judei. 15 Ñuitala uraꞌ dejuꞌ, ma ruku firuꞌ kiñu bain, vej mitya tsangue firuꞌ mannu jutyudei. Tsa jutyuꞌ, naa-uwanuba vetaꞌ vetaꞌ uraꞌ ken chuꞌ, ñuitala bain, naa veelanu bain uraꞌ ken chudei. 16 Naa-uwanuba sunden juu chudei. 17 Naa-uwanu bain Diosba kuinda kiikidei. 18 Tyee iꞌ puindu bain Diosnu yuj urave tiꞌ papatidei, matyu ñulla Jesucristonu keenguemulanuya, Dios juntsaaya kesa tyamuñuꞌ mitya. 19 Diosaꞌ Espíritu Santo naakekaanu tyañu bain, ñulla tsanguityuꞌ dyaꞌkakaakenuu kityudei. 20 Diosaꞌ mitya pamu rukulaꞌ panu palaanu balejtu juu kuutyudei. 21 Tsejtu tinuba tejan depensangueꞌ uraꞌ aseetanguetu, urajtunmalaya tsanguityuꞌ, naajaa urañuba juntsaya tsanguenu mijadei. 22 Ti bain urajtu juulanuya tsanguen jutyu dejuꞌ, tsaa bakaꞌ jiiñude-iꞌ meranguityudei. 23 Tiba bulla jutyu uraꞌ chuwaanu tiremu Diosren ñullanu naa naadejusa tyamu juꞌba tsaa detireꞌ, yachin juu detiresa. Tsenmin ñullanu naa ñullaꞌ espiritu bain, naa ñullaꞌ aama bain, naa ñullaꞌ bulu bain Diosya washkisa, tsenmalaa Bale Ruku Jesucristo maangama tiba urajtu juu jutyu katawanudetsu. 24 Ñullanu mikamu Diosya naakenu tiꞌ bain uwain tsanguenbera kemu juve, tsaꞌ mitya ti bain kumuinchi tsanguenu tsuve. 25 Keranguemu naatalala, naa lalaꞌ mitya bain Diosba kuinda kiikidei. 26 Kumuinchi keranguemu naatalalanu uraꞌ dechusa tiꞌ, Diosaꞌ mitya estyaꞌ keewaadei. 27 Bale Rukuꞌ mitya tiꞌ entsandinu tenve: Kumuinchi keranguemu naatalalanu entsa kiika delengueꞌ meewaadei. 28 Lalaꞌ Bale Ruku Jesucristo ñullanu estyaꞌ keewaasa tenve.