Primera carta de San Pablo a

TIMOTEO

1

Nuédacaniu jinácu

1   Nuyá,

Pablo, após­tolu Jesu­cristo shínaa, bánuerriu Dios wána­caala nácu wáse­deerri wayá, Wawá­cali Jesu­cristo, washínaa wanén­dani wayáca. 2 Nutána jirrú liáni cáashta Timoteo, yáawayi nucúulee éebi­dani nácu, nuwówai Dios Wasá­li­jinaa ya Cristo Jesús washínaa Wawá­cali yáa jirrú liwíteu, jishínaa carrúni jináatai ya sáic­tac­taca jiwówa yáca.  

Nuíiwani jirrú lijúnta náaꞌa éewidenai jócani yáawaiyii

3  Léjta

jinísa numá jirrúi quéechaꞌinaa jóctanaa nuáu chaléeni cáinabi jíꞌineerri Mace­donia, quéewiqueꞌe jimáa­cacoo chacáalee jíꞌineerri Éfeso, quéewiqueꞌe bánua nalí chóni­wenai quéewiqueꞌe jócu néewida báawatai wítee­shica, 4 uꞌéemi nachuáni náaꞌa náiiwa­de­da­ni­mica ya chuánshi jócai amáarra nanácu náaꞌa nawérri­nai­bi­mica. Liáni wíteeshi téenai bácai nacáita yáacaqueꞌiu, jócai éewa liwána liwáalia néebi­dauca liáꞌa Dios wówaini limé­daca. 5 Liáꞌa Dios wówaini liméda liájcha liáni rúnaa caníinaa wacába yáacacoo, liájcha liáꞌa caníi­naabee íinuerri áabai wówashi masá­culai, áabai wíteeshi sáicai, ya áabai wéebi­dani yáawai­yica. 6 Áabi jiéneu báawa­chala liúcha liáni ya yúqueneu cáita yáaqueneu, jócai áanama nácueji. 7 Nawó­waini namé­dacoo quée­wi­da­cani liáꞌa ley Dios shínaa, ne jócai néemi liáꞌa namá­nija, ne jiní liáꞌa néewi­dani jicáꞌa liáꞌa yáawaiyi namáca. 8 Wáa léenaa liáꞌa ley sáicai wérri, chácta waméda léjta liwówai limé­ daca, léjta liyáyuꞌu. 9 Rúnaa wédacanicoo, jiní ley náa nalí náaꞌa médenai sáicaica. Liáꞌa ley náani quéewiqueꞌe náa léenaa náaꞌa médenai máashii ya náaꞌa jócani éemi, ya náaꞌa máashii­ca­nica ya cají­co­naa­nica, náaꞌa jócani cawáunta Diosru ya liáꞌa éebi­dani nácu, ya náaꞌa íinuenai nashínaa nasá­li­jinau ya natúwa, quiní­nama íinue­naica. 10 Ya náaꞌa médenai  

 

 

 

 

 

 

289 Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.

1 TIMOTEO 1​, ​2  290

máashii náiinaa yáaj­chau, ya náaꞌa washiá­li­cuenai médenai máashii náajcha wáacoo, ya náaꞌa íinaca médenai máashii nayá wáacoo lécchoo, ya náaꞌa nawénda ya nawéni chóni­wenai, ya náaꞌa canúma yúwi­ca­nica; ya náaꞌa júre­naiu mawéni; liáni liwó­waiyu limáca, náaꞌa médenai liáꞌa yáirrico éewi­denai sáicai júnta. 11 Ya liáni sáicai éewi­dani léewa wáii­nuni sáicai wérri chuánshi, léewi­dani wayá nácu wéewaunaa wáacoo áacairra, liáꞌa Dios sáicai wérri máacani nulí.  

Yáirri sáicai nácu liáꞌa carrúni jináatai Dios shínaaca

12  Nuá

sáicai washínaa Wawá­cali Jesu­cristo, liyá yáirri nulí danáanshi, níwata cáberri nuée­bida linácu limáaca nuyá nuyúdaqueꞌe lishínaa tráa­ waju nácu, 13 báawita nuyá quéecha numá chuán­shii máashii liná­cula, nucá­na­que­dani ya nucái­tani. Ne liyá Dios carrúni jináata licába nuyá, níwata nuyá újnibi jócai éebida linácu ya jócu nuá léenaa liáꞌa numé­da­ nica. 14 Cháwa jáni washínaa Wawá­cali yáa nulí liwíteu máanui wérri, ya liá nulí liáꞌa nuée­bi­dani nácu, ya liáꞌa caníi­naabee wawáa­lia­nica washínaa rúneerriu Cristo Jesúsru. 15 Liéni yáawaiyi wérri, quiní­nama rúnaa néebi­da­cani: liáꞌa Cristo Jesús íinuerri cáinabi ítala quéewiqueꞌe litée náaꞌa cají­co­naa­nica áacairra, náucha nárra nuyá quée­cha­nacu sái. 16 Tándawa, Dios wáalia carrúni jináata licába nuyá; quéewiqueꞌe Jesu­cristo íyada nunácu quiní­ nama sáica wítee­shica. Nuyá íinue numé­dacoo núya­dacoo nalí náaꞌa rúnaa néebida linácu, quéewiqueꞌe wéewa nawáalia liáꞌa cáwi­caishi jócai amáarra. 17 ¡Wáa lirrú máanui licá­bacoo, ya cadá­na­nibee wérri mamáarraca éerri, lirrú liáꞌa rey jócai amáarra, liáꞌa jócai éewa máana­ lica, jócai wéewa wacá­baca liyá bácai Dios! Cháca­jani. 18‑19 Timoteo, nucúulee, nuá jirrú liáni tráa­wa­juca quéewiqueꞌe jíinua yáacacoo sáica liáni íinua yáaca­shica jéebi­dani nácu, ya sáicai wítee­ shiyu, léjta liáꞌa namáni quéecha náaꞌa éena­jinai náaꞌa táania­naimi jinácu lijíꞌinaa lícu Diosca. Áabi jócta néemi jiwá­na­caala nashínaa nawíteu yúqueneu nashínaa néebi­dani nanácu. 20 Liéni bésu­neerriu nalí náaꞌa Himeneo ya Alejandro, náani néejueda Wawá­si­mirru quéewiqueꞌe néewi­ dacoo jócu­beecha namá máashii chuánshi Dios júnta.  

 

 

 

 

 

 

2

Chítashia arrúnaa isátacoo Dios yúcha.

1   Quée­cha­nacu

numáca irrú iméda isáta Diosru, isáta Dios yúcha, isáta íchaba ya yáa sáicai Diosru quiní­nama nanácu náaꞌa chóni­ we­naica. 2 Arrúnaa wasáta Dios yúcha nanácu náaꞌa wána­ca­lee­naica, ya náaꞌa bánue­naica, quéewiqueꞌe wéewa sáicta wawówa ya wacá­ wica machú­nuca, ya jiní íinua yáaque­naiu, cawáunta wayá Diosru, ya cawáuntaqueꞌe quiní­nama licá­ba­canaa. 3 Liáni sáicai ya licába sáictai liáꞌa Diosca téerri wayá áacairra. 4 Liyá wówerri quéewiqueꞌe quiní­nama  

 

 

Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.

 291

1 TIMOTEO 2​, ​3

náiinu náa léenaa yáawai­yiica, ya náaqueꞌiu quiní­nama áacairra. 5 Ái bácai rími Dios jáꞌa; ái báqueerri Washiá­li­cuerri éeneerri litée quiní­nama washiá­li­cuenai quéewiqueꞌe nayá Dios yáajcha, lijíꞌinaa liáꞌa Washiá­li­ cuerrica Jesu­cristo. 6 Níwata Jesu­cristo éejue­derri licá­wicau quéewiqueꞌe quiní­nama chóni­wenai éewa náacoo áacairra, léjta liáyu chuánshi liyáali léer­dimi rícu. 7 Tándawa nuyá Dios máacani téerriꞌinaa lichuáni ya após­ tolu, ya namáaca nulí quéewiqueꞌe éewi­derriu linácu éebi­dani, ya liáꞌa yáawa­yiica náaꞌa jócani judío. Ne liéni numáni yáawaiyi waliérra; jócaita númashi yúwica. 8 Cháwa jáni, nuwówai náaꞌa washiá­li­cue­naica nasáta Dios yúcha quiní­nama matuí­naami, ya naná­cuda nacáajiu Diosru wówashi masá­ culai, jiní íiwirri wówa ya jiní cáiteerri 9 Ya nuwówai quéewiqueꞌe náaꞌa íinaca nasúwa nábalau léjta íina íibala cába­canaa, imíyaiyu ya sensí­yuiyu lécchoo; quéewiqueꞌe nachú­nicoo ne jócai jiérri ruwítau quéewiqueꞌe nacába ruyá, jiní óroyu, ya íiba cawé­nini, jiní íiba­lashi cawéni wérri, 10 arrúnaa iméda sáicai, léjta arrúnaa naméda náaꞌa íinaca máaqueneu nayáu Diosru. 11 Ruáꞌa íinetoo rúnaa ruéemi liáꞌa néewi­dani nácu manú­ mata, cawáuntaqueꞌe quiní­nama ruyá náajcha wána­ca­lee­naica; 12 ya jócu nuínda quéewiqueꞌe ruáꞌa íinetoo éewida íchaba chóni­wenai náneewa, ya jócaqueꞌe ruwá­na­cala liáꞌa washiá­li­cuerrica. Nuwówai ruyáqueꞌe manú­ mata, 13 níwata Dios méderri quée­cha­nacu Adán, liáwi­naami ruáꞌa Évaca; 14 ya Adán jócaite Wawá­simi chálu­jueda, ruyá­wani ruáꞌa íine­tooca, lichá­ lu­jue­date ruyá rucáu jíco­naashi rícu­late. 15 Dios méetua­minaa rují­conaa ruáꞌa íine­tooca ya táminaa litée ruyá áacairra, rumé­dacta quiní­nama sáica léjta túwashi, ya ruée­bi­dacta mamáarraca, caníi­naabee nácu, jiní rují­conaa ya imíya ruyá.  

 

 

 

 

 

 

 

 

 

 

3

Chítashia rúnaa namédacoo náaꞌa wánacaleenaica iglesia rícu

1   Liéni

yáawaiyii waliáni: Báqueerri wówerricta liárru iglesia rícu liwánacaalaqueꞌe, wówerri áabai tráa­wajo sáicai. 2 Tádawa, liáꞌa licá­ba­canaa liáꞌa wáaleerri liáꞌa wána­caa­la­shica léjta wána­ca­leerri jiní jíconaa. Arrúnaa liwáalia bácau rími líinuwa, ya liyáqueꞌe áabai cáwi­caishi cawáuntai, áabai chuá­nija, catráa­wa­jaacai ya jóca lisé­wica yáarru. Arrúnaa léewa liwína chóni­wenai líibana rículau mamáarraca; arrúnaa léewa léewi­daca. 3 Jócai arrúnaa cáirra­ca­lai­cani, jiní liwó­waica líinua yáacacoo, arrúnaa sáicai wérri liyá, machú­nucai ya jócai máaca liwówau warrúwa nácu. 4 Arrúnaa léewa liwá­na­caala líibana rícu sána, ya léewidaqueꞌe léenibiu jumé­nani nayá ya cawáun­tani quiní­nama. 5 Ne jócta­cala léewa liwá­na­caala chúnsai líibana rícu sánaca, ¿chítate quéewauꞌu jíni litúya liáꞌa iglesia Dios shínaaca? 6 Tándawa, liáꞌa wána­ ca­leerrica jócai éewoo báqueerri wáalii éebi­daca, carrú­na­taca máanui licá­bacoo, ya licáacoo léjta Wawá­simi cáayuꞌu lirrí­cula liáꞌa cachá­ni­  

 

 

 

 

Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.

1 TIMOTEO 3​, ​4  292

naica. 7 Arrúnaa cawáunta nacá­ba­cani náaꞌa jócani éebida Dios nácu, quéewiqueꞌe jócu licáu báinabee rícula naná­neewa náaꞌa chóni­we­naica, ya licáꞌechau Wawá­simi shínaa máashii rícula.  

Chítashia rúnaa namédacoo náaꞌa nayúdenai pastor iglesia rícu

8  Chacá­ba­canaa,

náaꞌa yúdenai pastor iglesia rícu, rúnaa washiá­li­cue­ nai­cani cawáun­tani, ya séewirrinaa naméda liáꞌa namá­nica, ya jócani cáirra­ca­lani, jiní nawó­wai­cala nawáalia shínaashi méenaami naméda máashii chóni­we­nairru. 9 Arrúnaa nacháa­nacoo lirrú liáꞌa yáawaiyi náya­da­nica, liáꞌa wéebida nácu ya nawáaliaqueꞌe masá­culai wítee­shica. 10 Quée­cha­nacu arrúnaa néeneda nayá, ya liáwi­naami, ya jócta nawáalia nají­conau néewa­minau namé­dacoo léjta nayú­denai pastor iglesia rícu. 11 Chacá­ba­canaa, náaꞌa íinaca cawáun­tani wérri, jócani cáii­wa­de­da­ cani chuámshi shínanaa, cawáun­tani ya machá­cani quiní­nama nácu. 12 Báqueerri yúderri pastor iglesia rícu, rúnaa liwáalia bácau rími líinuja, ya léewa liwá­na­caala sáica wérri léenibiu ya lishínaa quiní­nama líibana rícu sána. 13 Níwata náaꞌa yúdenai pastor iglesia rícu, médenai sáica nashínaa tráa­wajo, náii­nuniꞌinaa nalíwoo áabai yáarruishi cawéni, ya chawí­teemi wérri jáꞌa néewa­minaa natáa­niaca néebi­dauca Cristo Jesús nácu.  

 

 

 

 

Liáꞌa yáawaiyiica íiyaderricoo linácueji liáꞌa wéebidani nácu

14  Nunénda

nuáacoo nucába jiyá; ne nutána jirrú liáni, 15 quéewiqueꞌe, báawita nudé­cudau, jiáqueꞌe léenaa chíta­shia jíni rúnaa jimé­dacoo Dios shínaa éena­jinai íibi, léwa liáni iglesia Dios cáwiica, liáꞌa iglesia wíneerri ya túyerri yáawai­yica. 16 Yáawaiyii atéwai jócu wéewa wáii­wa­de­daca liáꞌa wéebi­dani nácu bájialai máanui wérrica: “Cristo íinuerri cáinabi ítala limédacoo washiálicuerriyu, néenee Espíritu Santo íiyada majíconaiyu, ya náaꞌa ángelbini nacábani. Náiiwa nalí chóniwenai yáaine quinínama cáinabi ítaꞌaa, náaꞌa éebidenai linácu quinínama cáinabi, ya narríshibiani sáicai wérri áacairra.”  

 

4

Náaꞌa shírruedenai nawíteu liúcha liáꞌa néebidani nácujoo

1   Ne

liáꞌa Espí­ritu Santo limáꞌee jucá­marranaa, cha léꞌe amáarrac­ talaꞌinaa liyáca liáꞌa éerrica, áabi­minaa dánaujoo liúcha liáꞌa néebi­dani nácu, nasí­guia­minaa náaꞌa espí­ritu cachá­lu­jue­da­ca­nica ya néewi­dani nanácu náaꞌa íinuenai demonio néenee. 2 Namé­da­minaa nawá­na­caala náaꞌa chóni­wenai chámaini wíteeshi ya canúma yúwi­cani, nashínaa nawítee márquerriu nashínaa jíco­naashi újni jiárru­yu­cani. 3 Náani chóni­we­naica jócu naínda néda yáacacoo, ya jócu naínda náaya  

 

Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.

 293

1 TIMOTEO 4​, ​5

matuí­naami íyacaishi, ne Dios quénu­da­nica quéewiqueꞌe náaꞌa éebi­ de­naica ya lécchoo náaꞌa yáine léenaa liáꞌa yáawai­yica náayaqueꞌini, náaqueꞌe sáicai Diosru. 4 Ne quiní­nama liáꞌa Dios quénu­da­nica sáicai wérri; ya jiní wéewani wadánaa jiúcha warrí­shi­biac­tani wáa sáicai Diosru, 5 níwata liáꞌa Dios chuá­nica ya isáta Dios yúcha limé­dani mají­conaa.  

 

Báqueerri sáicai catráawajaacai Jesucristorru

6  Ne

jéewi­dacta quiní­nama liáni nalí náaꞌa jéena­jinai, ya jíya liáꞌa Dios chuá­nica ya liáꞌa sáicai jéebi­da­nica nácu séewirrinai jiyá nácu, jiyá bácai cashírrue­dacai sáicai Jesu­cristorru. 7 Ne jócai jiméda liwá­na­caala náaꞌa chuánshi éerri rícu sánaca ya mawí­teeca. Jimáaca jicá­wicau Dios cáaji rícu mamáarraca; 8 áawita liáꞌa ejer­cicio sáicai wanáa­nairru máaya­baca, jimáaca jiyáu Diosru sáicai quiní­na­marru, níwata índa walí sáicai liáni wacá­wi­caca, ya liáꞌa wacá­ wica wabée­chala sáica. 9 Liáni yáawaiyii waliáni, arrúnaa quiní­nama néebi­da­cani. 10 Tándawa liáni, watráa­wajaa ya waméda wadá­naniu, níwata wamáaca wanén­daca liáni liáꞌa Dios cáwiica, liáꞌa wáse­deerri quiní­nama chóni­wenai, nalí chúnsai náaꞌa éebi­denai linácu. 11 Liáni arrúnaa jibánua ya jéewida áabi mawí. 12 Ujicába jiyáu jiníca jiwéni, báawita icúlirrijui jiyá, mawí jíyada jiwíteu nalí chaléjta éebi­derri Dios chuáni nácu, chaléjta jitáa­nia­cala, chaléjta jiyáyuꞌu jiwówa yáaj­ chau, ya jéebi­da­cala ya jicá­wica jiní jíconaa. 13 Nácula nuíinu jichána jiliá nalí náaꞌa chóni­we­naica liáꞌa Dios chuá­nica, jiá nadá­nani náaꞌa jéena­ jinai ya jéewida nayá. 14 Ujínda amáarraca liáꞌa sáicabee Dios yáani jirrú, quéechaꞌinaami Dios wána salí­naica iglesia ísanaca nachánaa nacáajiu jinácu. 15 Jimáaca quiní­nama jiwíteu linácu liáni, néewaqueꞌe nacába quiní­ nama léjta jidá­wi­nacoo jinácu. 16 Jitúyau jiyá jájiu, liáꞌa jéewidauꞌu áabi, jiáu cabá­li­ninaa quiní­nama nácu. Ne jimé­dacta chániꞌi, jéewa­minaa jiácoo áacairra jiyá jájiu, ya chacá­ba­canaa náaꞌa éemenai jirrú, néewa­ minaa náacoo áacairra lécchoo.  

 

 

 

 

 

 

 

 

 

5

Chíta éewauꞌu jiyá náajcha náaꞌa éebidenaica

1   Ujicáitadeda

liáꞌa salír­ra­nica, báawa­chata, jéewida liwítee chaléjta újni jisá­li­jinaa, jiyá náiibi náaꞌa icúli­naica ya jiá nawítee léjta jéena­ jinai. 2 Náaꞌa salí­tue­nica, jiyá ruájcha chaléjta jitúwa; ya náaꞌa miyá­canai, chaléjta jéena­jinai íina, wíteeshi mají­co­naiyu. 3 Jiyúda máanirri­nica náaꞌa jócani wáalia tána­shia yúderri nayái. 4 Ne báquetoo máanirriuc­tani ruwáalia rucúuleu jócta rutá­queerri, nayáwa quée­cha­nacu éewenaa néewi­dacoo naméda nacá­ba­canau náajcha náaꞌa chún­sana néena­ji­naica, caníinaaqueꞌe nacába nasá­li­jinau léjta caníinaa  

 

Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.

 

1 TIMOTEO 5  294

nacába nayá lécchoo, léwa sáicai liéni, sáicai Dios cába lécchoo. 5 Ne ruáꞌa yáawaiyii máanirriuca, ruáꞌa máaque­chooca bácai, máaque­choo ruwówau Dios nácu, jócau íiyabau rusá­tacoo Dios yúcha éerri jútainchu ya táayee lécchoo, quéewiqueꞌe Dios yúda ruyá. 6 Ne ruáꞌa máanirriuca méde­choo léjta éerri wówau, máanaliu yáca rucá­wica yáaj­chau. 7 Jibánua nalí náaꞌa quiní­nama liáni, quéewiqueꞌe jócu­beecha arrúnaa nacáida íiwanaa. 8 Ne liáꞌa jócaita túya léenaaca, mawíꞌinaa chún­sana léena­ji­ naica, jócai méda nacá­ba­canaa náaꞌa éebi­denai Dios chuáni, chái jicáꞌa liáꞌa mawí cachá­ninai wítee náucha náaꞌa jóca éebida Dios nácu. 9 Táshia natá­nacta najíꞌinaa náaꞌa máanirri­nica, arrúnaa nayáca bácai nája náaꞌa wáalenai mawí sesenta camuí, ne ruáꞌa wáale­choomi bácairrimi rúnirrijau. 10 Néewani náa léenaa nácu liáꞌa sáicai rumé­da­ nica: Dáwi­ne­choo sáica ruée­nibiu, sáica wítee náii­nucta rúbana rícula, báde­dee­choo náiiba náaꞌa éebi­de­naica, ruyú­dacta náaꞌa carrúni jináa­ ta­nica; ne lécchoo, ruwówa rumé­daca quiní­nama sáicai. 11 Ne jócu tána najíꞌinaa néeni náaꞌa máanirri­nica wáalianai píitui camuí, níwata ruíinaa wána rushírricoo Cristo yúcha, wówainai nawína yáacacoo wáaliiyu bániu, 12 nawáalia nají­conaa nayá jájiu, jóca naméda léjta namáyu nalí quée­cha­nacu. 13 Ne lécchoo nají­naniu cuíta jútainchu, ya naméda náinuniu lécchoo, ne jóca­nita íinu bácai canúma yúwi­cani lécchoo, níqueneu quiní­nama nácu ya náii­wa­deda jócai sáica­nata náii­wa­de­daca. 14 Tánda nuwówai náaꞌa máanirrini miyá­ca­naica ruéewa ruéda yáacacoo wáaliiyu, nawáaliaqueꞌe néenibiu, natúyaqueꞌe nábanau léjta íina, jócu­ beecha náa lirrú yáarrushi liáꞌa nají­naica. 15 Ne áabi náaꞌa máanirri­nica najiáu Jesu­cristo yúcha, jáiwa náawai Wawá­simi yáajcha. 16 Ne báquetoo íinetoo éebi­de­choo Cristo nácu, ruwáa­liacta ruée­na­jinai máanirrini íibiu, arrúnaa iyúda­cani, jócu­beecha cadú­cuni liyá iglé­siarru; cháminaa iglesia éewa liyúda nayá náaꞌa máanirri­nica jiníni yúda mawí. 17 Náaꞌa salí­naica wána­ca­leenai sáica iglesia, éewenai cawáunta icába mawí, náaꞌa yáawai­yi­nica íiwa ya éewi­denai Dios chuáni. 18 Ne liáꞌa Dios chuáni limáꞌee: “Uꞌibáji linúma liáꞌa pacáaca jáicta litráa­wajaa liyá cái”. Néꞌe limáꞌee lécchoo: “Liáꞌa tráa­wa­jeerrica iglesia rícu, éewerri lirrí­shibia liwéniu lécchoo”. 19 Ujiméda nawá­na­caala náaꞌa táanianai lijúnta liáꞌa salírrani éewi­derri iglesia rícu, jócta liwáalia chámata jócta matá­litai cábenai liyá. 20 Náaꞌa médenai náacoo nají­conau, arrúnaa náarra­cani quiní­nama náneewa, quéewiqueꞌe chacá­ba­canaa cáarru náaꞌa áabica. 21 Nubánua jiyá Dios náneewa, Jesu­cristo náneewa ya náaꞌa ángel­ bini Dios wínani lécchoo, jiméda quiní­nama liáꞌa nuwá­nani jimé­daca, ya machá­cani jiyá quiní­nama yáajcha, jicába quiní­nama áabenaa. 22 Ujichánaa jicáajiu áabi nácu jóctanaa jiá léenaa liwítee sáica, jócu­beecha jiméda jijí­conau náajcha. Jitúyau liúcha liáꞌa quiní­nama máashiica.  

 

 

 

 

 

 

 

 

 

 

 

 

 

 

 

 

 

Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.

 295

1 TIMOTEO 5​, ​6

23  Níwata

éerri jútainchu báli­nacoo jiáwai nácu, ujíirra shiátai bácai liyáwoo, jéewa jíirra píitui vino lécchoo. 24 Nají­conaa náaꞌa áabica, nacá­bani jucá­marranaa jóctanaa náau liyác­ tala cáberri yáawacta cají­co­naa­jani, ne áabata náani léenaa liáwi­naami. 25 Ne chaléc­choo, liáꞌa sáicai namé­dani lécchoo nacá­bani jucá­marranaa; ya liáꞌa jócai nacába, jócaꞌinaa máacau libá­yacoo séewirrinaa. 1  Náaꞌa arrú­naani tráa­wa­jaaca nawá­ca­nairru mawéni, arrúnaa náaꞌa nacáarruniꞌinau nawá­ca­lirru, arrúnaa cawáunta nayá, jócu­beecha licáida náii­wanaa Dios jíꞌinaa nácucha, jiní natáa­nia­cala máashii linácu liáꞌa wéewi­dani nácu. 2 Ne áabi wáaliacta nawá­canai éebi­denai Dios chuáni, néewaqueꞌe cawáuntaqueꞌe nayá, níwata néena­ji­nai­wa­jani éebi­ derri Jesu­cristo chuáni nácu; tádawa, arrúnaa iyúda nayá sáicai wérri mawí, tándawa náaꞌa ríshi­bianai nashínau sáicai tráa­wa­juca, éebi­denai lécchoo, ya éena­jinai caníinaa icába nayá.  

 

6

 

 

Rícucaishi yáawaiyiica

Jéewida ya jíiwa nalí liáni: 3 Ne áabi éewi­dacta iyá báawatai liúcha liáꞌa léewi­dani iyá nácu, ya jócu áabenaa liyá liájcha liáꞌa yáawai­yica néewi­dani nácu, Wawá­cali Jesu­cristo nácue sáica, ne jócani éewida léjta wawítee, 4 ne báqueerri sáictai cábacoo liyá jájiu liwítee rícuejiu, ne jiní yáani léenaa. Íiserri litáania nanácu náaꞌa chuánshi jócani sáica licá­ baca, ne yáairri linácu chaléjta báli­na­caa­lashi; ne léwa líinuc­teji liáꞌa cadéni nacába yáacacoo, jócu áabenaa nawítee, máashii linúma, jócu léebida linácu, 5 ya líinua yáacau éerri jútainchu áabi yáajcha, náajcha náaꞌa chóni­wenai máashii wítee, ya jócai liá léenaa liáꞌa yáawai­yica, wíneerri liáꞌa wítee­shica chájiꞌi warrúwa nácueji. 6 Ne jucá­marrai yáaca liáꞌa wawí­teeca, yáawaiyii cawéni wérrica, ne bácai lirrú liáꞌa sáictai wówa liájcha liáꞌa liwáa­lia­nica. 7 Táda jiní waín­dani lítala léji liéni cáina­ bica, jiníꞌinaa wéewani watée­cojoo. 8 Áicta wáaya­nijaa ya ái wába­lajaa, ta éewa sáicta wawówai liájcha liáni. 9 Náaꞌa wówenai nawáalia máanui wérri warrú­waca, jócu néenaa nawánta liáꞌa máashii méda nawówa lícu, ya liwána napénsaa áabata matuí­naami mawí­teeyu, ya liáꞌa máashiica téerri washiá­li­cuenai carrúni jináatactalaꞌinaa nayá, ya chaléeni náucaquictalaꞌinaacoo. 10 Níwata lináinaa liáꞌa warrú­waca, náawi­derri nawítee náaꞌa washiá­li­cue­naica, namédaqueꞌe máashii liyú liáꞌa warrú­ waca, náaꞌa sáic­tani cába­cani liáꞌa warrú­waca, lináa­wida nawítee liúcha liáꞌa néebi­dauca. Jáiwa carrúni jináata naméda nacá­wica nayá jájiu.  

 

 

 

 

 

 

 

11 Ne

Liáꞌa sáicai íinua yáaquerricoo linácu liáꞌa léebidauca

jiyá, washiá­li­cuerri Dios shínaa, jimáaniu liúcha liáni quiní­ nama máashiica. Jitée cáwicau machá­cani, máaquerri jiwówau Dios nácu, jiwáa­liaca jéebi­dauyu, caníi­naaca jicá­ba­cani, uꞌíinu jiyá nuchuáni Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.

1 TIMOTEO 6  296

nácu mamáarraca, jiáu jibée­chalau, imíyaiyu jiwówa yáaj­chau. 12 Jíinua yáacoo linácue liáꞌa sáicaica jéebidau Dios nácu, ujínda liácoo jiúcha liáꞌa cáwi­cashi jócai amáarra, liná­cue­jiwa Dios máida jiyá, tánda liná­ cueji líiwa jirrú quiní­nama naná­neewa náaꞌa chóni­we­naica. 13 Chócajaꞌa, Dios náneewa, yáairri nacá­wica quiní­nama yáanai lirrícu liáni éerrica, ya Jesu­cristo náneewa, cha lécchoo liméda áabai líiwa nalí sáicai, ya líiwa sáicai chuán­shica liná­neewa liáꞌa Poncio Pila­toca; nubánua jiyá, 14 jimédaqueꞌe chaléjta nubá­nuau, jócai jéewa jiwána nanáa­wi­ daca, jócu­beecha arrúnaa nucáita jiyá. Jiméda cháni cáashia líinuc­tala liáꞌa Wawá­cali Jesu­cristoca. 15 Dios méda quiní­nama áabenaa licá­ba­ canaa chaléjta limáyu, liyáwa bácai Dios sáicai wérri yáairri quiní­nama ítaꞌaa, náii­bicha náaꞌa reye­bi­nica liyá mawí máanui náucha ya náii­ bicha náaꞌa wána­ca­lee­naica, liyá mawí máanui náucha. 16 Liyáwa bácai jócai máanali, yáairri áabai cámarra­shiyu jinícta éenaa lirrú­nicoo. Jiní báqueerri washiá­li­cuerri éeneerritee licá­ba­cani, jócaiꞌinaa léenaa licá­ba­ cani. ¡Bácai Dios yáairriꞌinaa mamáarraca éerri! Cháwa­jani. 17 Náaꞌa wáalianai warrúwa lítaꞌaa liáni cáina­bica, jibánua nalí jócu­ beecha máanui nacá­bacoo, jócu­beecha namáaca nawówau linácu liáꞌa nanén­dani nayáca warrúwa nácu, níwata liáꞌa warrú­waca éewerri amáarraca, jiní wéni. Imáaca iwówau Dios nácu, liyá­minaa yáa walí quiní­nama liáꞌa warrú­naaniꞌinaa walíwoo, quéewiqueꞌe liméda walí sáicai. 18 Jiwána naméda liáꞌa sáicaica, quéewiqueꞌe namé­dacoo rícu­ bi­niyu naméda sáicaica. Jíiwa nalí nanéndaqueꞌe nayúdauꞌinaa náaꞌa carrúni jináa­ta­nica. 19 Cháwa­minaa nawáalia rícubiniqueꞌe nayá, liáminaa nalí nadá­nani, yáairriꞌinaa nalí cabá­li­ninaa nabée­chalau, náii­ nu­minaa liáꞌa nacá­wica jócai amáarra.  

 

 

 

 

 

 

 

20  Timoteo,

Líiwa lirrú báitaa liáꞌa Timoteoca

túya sáica liáni nuáni jirrú jicáaji rícu. Ujéemi chuánshi matuí­naami éerri rícu sái mawé­niica, jiní jiácala liwí­banaa nalí náaꞌa chóni­wenai máinai náacala léenaa, ne jiníni yáani léenaa; 21 ne áabi náaꞌa nanáa­wida nawíteu, liúcha liáni nawítee jócai yáawaiyi, shírreneu liúcha liáni léebi­dauca. Nusáta Dios yúcha irrúꞌinaa liáqueꞌe irrú sáicabee inácuꞌinaa.  

Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.