Segunda carta de San Pablo a
TIMOTEO
1
Nuédacaniu jinácu
1 Nuyá
Pablo, apóstolu Jesucristo shínaa, bánuerriu Dios wána caala nácu, chaléjta Dios máyuꞌu liáꞌa cáwicashii Cristo Jesús nácu. 2 Nutána jirrú liáni cáashtaca liáꞌa Timoteoca, caníinai nucábaca jicáꞌa nucúulee. Nuwówai Dios wasálijinaa ya Wawácali Jesucristo liá jirrú jidá nani ya carrúni jináatau ya sáicai wérri jinácu.
Wáiiwadedau Cristo nácu
3 Nuédacaniuꞌinaacu
séewirrinaa jáicta nusáta nuyáwai Dios yúcha, ya nuá sáicai Diosru éerrinacu ya táayee, liáꞌa nushírruedanirru sáica nuwítee, léjta nashírruedaumi náaꞌa nuwérrinaibimi lécchoo. 4 Nuéda caniu séewirrinaa jituí yáabi nácu, ya nuwówaiyu ta nucába jiyá, quéewiquinicta sáicta wérri nuwówa. 5 Níwata nuédacaniu jéebidau machácani, quéechanacumi ruéebida ruwáalia ruáꞌa jirruída Loidaca ya jitúwa Eunice, ya nuyá éebiderri lécchoo jiyácala chái wáaliacajani jéebidauca. 6 Tánda linácue nuárra jiyá, quéewiqueꞌe ujínda liácoo jiúcha liáꞌa jiwítee sáicaica Dios yáani jirrú, quéechaꞌinaami nusáta jinácu nuchánaa nucáajiu jinácu. 7 Ne Dios jócai yáa liyá walí áabai wíteeshi cáarruica, yáairriu walí áabai wíteeshi cadánani, caníinaa wacábaca ya wéewa watúyacoo wayá jájiu. 8 Ubái jiyá jíiwadeda sáicai wawácali nácu, ubái jiyá nunácueji lécchoo, nuyá naníquini cuíta manúmai rícula linácu liáꞌa Jesús bánuani wamédaca; báawachata, liáꞌa danáanshi Dios yáani jirrú, jiwánta liáꞌa carrúni jináatabee íinuerriꞌinaaca linácueji liáꞌa chuánshi sáicaica. 9 Dios wásedeerri wayái ya limáida wayá quéewiqueꞌe wamáacaqueꞌe licáaji rícu quinínama wacáwicau, jócaita linácu liáꞌa wanísani wamédacai, níwata léwa liwówau jáni ya caníinaaca licába wayá Cristo Jesús nácueji. Dios caníinaa licába wayá quéechaꞌinaa
297 Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.
2 TIMOTEO 1, 2 298
jiní éerri újnibii. 10 Dios íyaderri walí caníinaa licába wayá chóqueꞌe, quéechaꞌinaa líinu Jesucristo téerriꞌinaa wayá áacairra, liáꞌa márderri máanalicai dánani, ya lirrícueji liáꞌa Dios chuánica lijéda jucámarranaa liáꞌa cáwicaishica jócai amáarra. 11 Dios máaquerri nuyá nuíiwaqueꞌe liáni chuánshica, ya libánua nuyá léjta apóstolu ya qéewidacaica. 12 Tánda linácueji liáni carrúni jináata nuyá quinínama. Ne jócu bái nuyá linácueji, níwata nuá léenaa tánashia nácu nuéebidai, ne nuyá yáairri léenaa liyá wáalierri liwítee dánaniu quéewiqueꞌe nuíiwa lichuáni mamáarraca, cáashia líinuctalaꞌinaa liáꞌa amáarracta cáinabi. 13 Jéewidau léjta jicábau nuéewida liáꞌa chuánshi yáawaiyiica, liáꞌa jinísani jéewidacoo nácu nuájcha, ya jéebidaqueꞌe mamáarraca, ya liáꞌa níinaashi wawáalianica wayáyuca macábaita Cristo Jesús nácueji. 14 Espíritu Santo dánaniyui yáairri wanácu, jitúya linácu liáꞌa chuánshi machácanica liáꞌa Dios máacani jirrú. 15 Léjta jiáyu léenaa, quinínama cáinabi Asia shínaa ítesana, namáaca nuyái bácai, náiibicha náaꞌa Figelo ya Hermógenes. 16 Wawácali carrúni jináataqueꞌe licába náaꞌa léenajinai liáꞌa Onesíforo, níwata liyá íchabachu líinu liyúda nuyá, ne jócu bái líinu licába nuyá yáairri cuíta manúmai rícula. 17 Báwachata, jáiꞌinaami líinu Romalai, lichánau limúrru nuyái jócai wówa íyabau cáashia líinu nunácu. 18 Wawácali carrúni jináataqueꞌe licábacani, liyáali éerri jáicta amáarra cáinabijoo. Jiyá jái yáa léenaa íchabachuca liyúda wayá Éfeso rícu.
2
1 Ya
Báqueerri soldado sáicai Jesucristo shínaa
jiyá, Timoteo, nucábani jicába nucúulee, jéderri danáanshiyu liáꞌa Jesucristo yáani jirrú. 2 Liáꞌa jéeminica numáca íchaba chóni wenai náneewa, jéewidani náaꞌa washiálicuenaica jíisainica, náaꞌa éeneenai néewidaca áabi. 3 Jiyá sáicai wérri léjta soldado Jesucristo shínaa, éewerri jiyá sáicai áawita carrúni jináata naméda jiyá linácueji. 4 Jiní báqueerri soldado éewerri liwína áabai tráawaju, arrúnaa liyá linácuja éewaqueꞌe sáicta liwácali cábacani. 5 Chacábacanaa, liáꞌa caséwicacaica, jócai éewa lirrí shibia liáꞌa premioca, jóctacala liséwica léjta licábacanaa liséwicauꞌinaa. 6 Liáꞌa tráawajeerri bacháida lícu, quéechanacu arrúnaa litráawajaaca, quéewiqueꞌe liáwinaami léewa liáwaqueda líta liáꞌa liáabananica. 7 Jéda caniu linácu liáni numánica jirrú, liáꞌa wawácalica liwánaminaa jiá léenaaca quinínama. 8 Jédacaniu Jesucristo nácu, cáwerrimicoo máanalicai yúcha, David táqueerrimi; léwa chuánshi léewidani wayá nácu, wéewaunaa wáacoo áacairra ya nuíiwadedani. 9 Linácu liáni chuánshica nuwánta carrúna tabee, ya nabáji nuyá léjta báqueerri cáiinuacai; ne liáꞌa Dios chuánica
Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.
299
2 TIMOTEO 2
jócai bájiu. 10 Tándawa nuwánta quinínama, quéewiqueꞌe numédaqueꞌe sáicai nalí náaꞌa Dios wínanica, quéewiqueꞌe nayá néenaaqueꞌe náacoo áacairra, liáꞌa sáictai wérrica, ya jócai amáarra Cristo Jesús nácu. 11 Liáni yáawaiyii wérri: Máanalicta wayá linácu, cáwiminaa wayá liájcha lécchoo; 12 Carrúni jináatacta wayá linácu, wawáaliaminau washínau liájcha liwánacaalactalaca; ya wabáyacta lináwa wáa léenaa linácu, chacábacanaa libáya wanáwa lécchoo; 13 jócta machácani wayá, liyá mamáarracai méda machácanii, níwata jócai éewa limáaca licábacanau, le licábacanaaja liérra.
14 Jédacaniu
Báqueerri catráawajaacai sáicai wérri
séewirrinaa nalí linácu liáni: Limá nalí Dios náneewa uꞌicáita yáacau linácu jiliérra chuánshi. Náaꞌa cáitenai jócai sáicai, méderri máashii nalí náaꞌa éemenai nayácani. 15 Jiméda quinínama tánashia jéewani jimédaca, Dios náneewa jicáꞌa báqueerri washiálicuerri catráawajaacai méderri sáicai, jócai éewa báica, éewiderri sáica léjta licá bacanaa liáꞌa Dios chuánica yáawaiyiica. 16 Ujitáania chuánshi máashii cáinabi íta sái, jiní wéni, léca liáꞌa natáaniani nácu cha, yúquerri nayá mawí máashiiquictala, 17 ya liáꞌa néewidacalaca cáarralerriu chaléjta liáꞌa bálinacaalashi cachánaninica. Léwa libésunau liáni náajcha náani washiálicuenai najíꞌinaa Himeneo ya Fileto, 18 náawa yáainiu náani báawachala liúcha liáꞌa yáawaiyiica; namáꞌee linácucha liáꞌa wacáwiac tacoo jái bésunacuwai, ya jínaneneu nacáarraleda chacábacanaa náaꞌa áabi éebidenaica. 19 Ne Dios máaca áabai liárrubai cadánaniyaca, tánda litánaa nalí: “Liáꞌa wawácali yáirri léenaa náaꞌa lishínaaca”, ya “Quiní nama náaꞌa sátenaicoo Dios yúcha, arrúnaa nashírriqueꞌiu liúcha liáꞌa jíconaashica”. 20 Waméda áabai cuíta máanui cábacanaa: Áabai cuíta máanui, jócai bábajuta oro yáca ya warrúwa ái néeni jáꞌa, lécchoo áicuba ya bádani caishi, áabi namédaniyu sáicai, ya áabata mawí cuíta lícu sái. 21 Cháwa libésunacoo áꞌa cuíta wawácali shínaaca. Ne wayácta majíconaa quiní nama máashii yúcha, cháiminaa léjta liáꞌa cawéninamaica, yáairri sáica wawácali cáaji rícu, méderriꞌinaa quinínama méenaami sáicaica. 22 Jidánau liúcha liáꞌa máashiica icúlinai wíteeca. Jimúrru jiyá machá caniyu ya jéebida mawí, caníinaa jicába, ya sáictaqueꞌe jiwówa, náajcha náaꞌa quinínama chóniwenai wáalianai nawówau masácula nasátacoo Wawácali yúcha. 23 Ujiméda liwánacaala náaꞌa cáitenai matuínaami, jicáꞌa náaꞌa chóniwenai mawíteeni, jái jiá léenaa índeerri íinua yáacashi. 24 Báqueerri washiálicuerri tráawajeerri wawácalirru, jócai jínaniu líinua yáacacoo, báawachata, arrúnaa sáica limédacoo quinínama yáajcha,
Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.
2 TIMOTEO 2, 3 300
arrúnaa éeneerri léewida sáica, ya arrúnaa liwántaa quinínama. 25 Ya jiárra imíyayu jiwówa yáajchau náaꞌa médenai lijúnta máashii, jínda Dios náawida nawíteejoo náaqueꞌe léenaa liáꞌa yáawaiyiica. 26 Nawítee cáwiaqueꞌiu, néewaqueꞌe najiácoo liúcha liáꞌa cachálujuedacaica Wawá simi wáalierri nayá mawítee, limédaqueꞌe náajcha léjta liwówainica.
Chítashia nacábacanaa náaꞌa chóniwenai urrúnictala amáarra cáinabi
3
1 Ya
lécchoo arrúnaa jiá léenaa, liáꞌa éerdi éenamicojoo líinumi naajoo éerri carrúnataiꞌinaa. 2 Náaꞌa chóniwenaica cadéniminaa nayájoo, caníinaaminaa wérri nacáꞌa nawárruaniu, wachósuni ya cábade deenaicoo nayá jájiu. Natáaniaminaajoo máashii Dios nácu, jócuminaajoo néewidajoo nasálijinaarru; nayáminaa quiníꞌinaajoo máj nalí, quiní nabústanijoo, jócaꞌinaa náaꞌa licáarruninaa liáꞌa Dios máni nácucha. 3 Jiní caníinai nacábacoo, jiní carrúni jináataca nacába áabi, nayá catáa niacani, nanúma yúwicau, jócuminaa néenaa nawánacaalacojoo liúcha liáꞌa máashiica; nayá liyájurricani, najínaiꞌinaa quinínama liáꞌa sáicaica. 4 Nayá cachálujuedacani, jócani cawáunta, nayáminaa cashiámuni wítee wachósuni, namúrruminaa léjta nawítee máashii wówauꞌu, méewanita múrru Dios. 5 Namédaminaa újnii jicáꞌa náaꞌa éebidenaica ne újni namá nayáca, ne íyada nayá léja liáꞌa máashii namédanica. Níwata nayá jócai néebida Dios chuáni dánani. Oꞌiwína yáacoo náajcha nárra chóniwenaica. 6 Níwata nayá néenaa náaꞌa wárruenai lirrícula liáꞌa cuítaca nachálujueda náaꞌa májinani íinaca, cashiámuni jíconaa, liárdanica quinínama wíteeshi máashiica, 7 nayá séewirrini éewidacoo, ne jócu néenaa náa léenaa linácu liáꞌa yáawaiyiica. 8 Chaléjta náaꞌa camálicai jíꞌineenai Janes ya Jambres, jáiwa naméda máashii Moisés júntai, léquichoo náaꞌa chóniwenaica jócu néewida liáꞌa yáawaiyiica. Jiníwata washiálicuenai nawítee máashii wérri najíconaiyu, máashiderriu, jócani éebida linácu. 9 Ne quiníꞌinaa namédani bájialajoo, níwata náaꞌa quinínama náa léenaajoo chóniwenai mawíteeni, chaléjta nabésunaucoo náaꞌa chámataca Janes ya Jambres Moisés júnta.
Pablo íiwa Timoteorruni liáꞌa limédaniꞌinaaca
10 Ne
jiyá Timoteo, jái éewidacuwai linácu liáni nuéewidau chóniwenai, léjta nucábacanaa yáayu, nuwówaini numéda séewirrinaa, nuéebidanica, nuyá jócai íiwirri wówa áawitate naméda nulí máashii, ne caníinaa nucába chóniwenai, ya nudánani nuwántaqueꞌe quinínama, 11 léjta nacánaquedau nuyá ya carrúni jináata numácoo. Jiá léenaa quinínama liáꞌa nubésunaucoo áꞌa Antioquía, ya Iconio, ya Listra, nacánaquedau nuyá carrúni jináata, ne nuyá liáꞌa wawá cali túyerri nuyá quinínama yúcha. 12 Yáawaiyii waliáni, quinínama náaꞌa wówenai nayáca sáicai wérri Cristo Jesús yáajcha, nabésunedaminaa carrúni jináatabee. 13 Ne náaꞌa máashiinica, ya náaꞌa cachálujuedacanica mawíminaa máashii náacojoo, nachálujuedaminaa ya áabi chálujueda nayá lécchoo.
Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.
301
2 TIMOTEO 3, 4
14 Jiyá
yáairri cabálini quinínama linácu liáꞌa jéewidanicoo nácu, yá jéebidauꞌuni. Jiníwata jiyá ái yáa léenaa tánashia éewida jiyái. 15 Jéda caniu samálitaꞌinaami jiyá yáirri léenaa Dios chuáni, jái éewa léewida jiyá ya litée jiyá áacairra, jéebidauca Cristo Jesús nácu. 16 Quinínama liáꞌa Dios chuáni tánerricoo sáicai wérri, ya Dios yáani walí, sáicai léewidaca ya liárra wayá, quéewiqueꞌe lichúni wayá, léewidaqueꞌe wayá, áabai wíteeshi machácaniyu, 17 quéewiqueꞌe liyá washiálicuerri Dios shínaaca, éeneerri limédaca quinínama, wáaleerri quinínama liwíteu ne yáirri léenaa léewaqueꞌe liméda quinínama méenaami sáicai. 1 Dios náneewa ya Cristo Jesús náneewa, líinuminaa jicáꞌa reyjoo, líiwa najíconaajoo, náaꞌa cáwinica ya náaꞌa máanalinica ne numá jirrú bájiala, 2 jíiwa Dios chuáni liáꞌa sáicaica, ya mamáarraca jiyáca jáicta léerdi ya jócta léerdi, jiwána léewidaca, jiárrani, ya jiá jidánani, jéewidau cawáunta ya uꞌíiwirri jiwówa. 3 Líinuminaa léju liáꞌa léerdica, náaꞌa chóniwenaica jócu nawánta néewida sáicai chuánshicojoo, namé daminaa nawíteeyu liáꞌa nawówaini namédaca; namúrruminaa manuába qéewidacani néewidaminaa léjta nawówau néemicani. 4 Nanáawida nawójunaa lirrú liáꞌa yáawaiyiica, namédaminaa quinínama liwána caala liáꞌa chuánshica. 5 Ne jiyá wáalierri séewirri liáꞌa sáicai wíteeshica, jiwántaqueꞌe carrúni jináatabeeca, jiméda mamáarraca jíiwa Dios chuá nica, jiméda machácani jishínaa tráawaju. 6 Jái urrúni náiinua nuyái, nucáwica nuáni Dios cáaji rícu. 7 Nuyá yáairri machácani nuéebidaca mamáarraca, áawita cacháninabee íinu nútala, léjta báqueerri washiálicuerri íinua yáaquerriu jináwiu rícu. Nunísa nuíinu chaléeni nuéewactala nuíinuca, nuyá jócai numáaca nuéebidauca Dios chuáni nácu. 8 Chóqueꞌe nushínaa premio nénda nuyá, nugáananica, ne liáꞌa nuwácali liáꞌa chóniwerri éewerri licábaca liáꞌa máashii o liáꞌa sáicaica, liyáali éerri liáminaa nulíjoni. Léeminaa liáꞌa nulí ya nalí náaꞌa quinínama náaꞌa caníinaani cába liyá, néndenai liyá cáashia líinuca.
4
9 Jiméda
Pablo éewidacala bácai Timoteo
quinínama jíinuqueꞌe madéjcanaajoo jicába nuyá. 10 Ne liáꞌa Demas caníinai cába mawí liáꞌa éerri shínaaca, jáiwa limáaca bácai nuyái, jáiwa liáwai Tesalónica néerra, Crecente liáu déecuchala Galacia, ya Tito yáa Dalmacia néerra. 11 Bácai Lucas yáa nuájcha, jimúrru nulí Marcos ya jíndani jiájchawoo, níwata yúderriꞌinaa nuyá tráawajorru. 12 Liáꞌa Tíquico nubánuani Éfeso néerra. 13 Jáicta jíinujoo jínda nushínaa capa, numáacani Troas tána íibana néeni liáꞌa Carpo. Lécchoo jínda nushínaa cáashta, ya náaꞌa cáashta báinacu sánami, jíꞌineenai pergamino. 14 Alejandro jiárru shínanaa, máashii wérri médacoo nuájcha. Liyá wawácali lipáida liyájoo, léjta linácu liáꞌa limédanica. 15 Jitúyau jiyá
Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.
2 TIMOTEO 4 302
liúcha, níwata máashii médacoo wajúnta linácue liáni wéewidanicoo nácu. 16 Quéechanacu nutáania nubícaubaliu nanáneewa náaꞌa wánacalee naica quiní yúda nuyá, quinínama namáaca bácai nuyá. Nunénda Dios jócubeecha licóbra liúcha liáꞌa máashii namédanica. 17 Ne liáꞌa nuwáca lica liyúdawa nuyái, ne liá nudánani quinínama nutéequeꞌe liéni nuíiwa Dios chuáni, liáꞌa chuánshi sáicaica wásedeerrica, quéewiqueꞌe néemicani quinínama náaꞌa jócani judíobini. Cháwa wawácali túyerri nuyá liúcha liáꞌa carrúnatai újni cháawi quíirrai núma rícucha. 18 Liáꞌa nuwácali litúyaminaa nuyá quinínama liúcha liáꞌa máashiica, liwáaliaminaa nuyá lishínaa liwánacaalactaca éerri ítala. Wacábactala balíbalibee ne liyá yáawaiyii, cháiꞌinaa.
Nutáa jirrú ya nuá jirrú sáicai nuájumirrau
19 Nuédacaniu
Prisca nácu ya Aquila nácu, ya náaꞌa tána éenajinaica Onesíforo. 20 Erasto liáꞌa máacau Corinto néeni ya Trófimo numáaca bálinerriu áꞌa Mileto néeni. 21 Jimédawa jidánijoo jíinu uniábi béechajoo. Nabánua jirrú nédacaniꞌeewoo jinácu Éubulo, Pudente, Lino, Claudia ya quinínama éenajinai éebidenaica Cristo nácu. 22 Liáꞌa Wawácali Jesu cristoca liyá jiájcha. Dios cámusheda iyá liwíteeyu quinínama irrú.
Porciones del Nuevo Testamento en achagua de Colombia, 1a ed. 2013; © 2014, Wycliffe Bible Translators, Inc.
