Segunda carta de San Pablo a los

Tesalonicenses Jesucristore yiꞌyurã Tesalónicakarãroꞌsi Ᵽablote ᵽaᵽera ᵽũataeka ate

1

Jesucristore yiꞌyurã Tesalónicawejeakarã, ¿yaje mija ime? Yiꞌi Ᵽablo, suᵽabatirã majeyomarã Silvano, Timoteoᵽitiyika ika ᵽaᵽera mijaroꞌsi yija ᵽũatayu, Maᵽaki Tuᵽarãrirã, maiᵽamaki Jesucristorirãoka mija imamaka. 2 “Jia Tesalónicakarãre mija baabe”, ãrĩwaꞌri Maᵽaki Tuᵽarãte, suᵽabatirã maiᵽamaki Jesucristoreoka mijaroꞌsi yija jẽñerijayu. Iꞌsuᵽakajaoka yija baayu jia dako okamirãmarĩaja mijare nimarũjeokaroꞌsi. 3 Mija ãꞌmitiᵽe yijeyomarã, jiibaji Jesucristore yiꞌriwaꞌri, ĩꞌrãrĩmi uᵽakaja jiibaji mija wayuĩabuꞌarijayua simamaka “Jia mibaayu Tuᵽarã”, kire yija ãrĩrijayu mijareka yija ᵽuᵽajoaika rakakaja. Suᵽa imarĩ, iꞌsuᵽaka Tuᵽarãte yija ãrĩrijayua jia sime. 4 Iꞌsuᵽakajaoka, yija eyarijayurõꞌõrã, aᵽerã Jesúre yiꞌyurãte iꞌsuᵽaka mija imakaka jĩjimakaᵽi yija bojarijayu. “Tesalónicawejeakarã jia Tuᵽarãte yiꞌyurã imarĩ, kire yiꞌririjaꞌatabeyurã. Iꞌsuᵽakajaoka wayuᵽiꞌribekaja, okajãjia ᵽuᵽajoairã nime, aᵽerãte baꞌiaja nare baakoꞌomakaja, sanarakajeᵽããrijayu”, ãrĩwaꞌri nare yija bojayu. 5 Tuᵽarãte yiꞌyurã mija imamaka, aᵽerãte baꞌiaja mijare baayu. Iꞌsuᵽaka simakoꞌomakaja “Tuᵽarãte ãñu uᵽakaja kibaarãñu”, ãñurã imarĩ kire mija yiꞌririjaꞌatabeyu. Suᵽa imarĩ “Baꞌiaja nare imabeyua”, mijareka ãrĩwaꞌri ritajare kijãꞌmerãka ᵽoto kika mijare kimarũjerãñu. Iꞌsuᵽaka Tuᵽarãte baarũkia õrĩwaꞌri, “Rita, jia oyiaja baaiki kime”, ãrĩwãrũirã maime. 6 Jia wãjioyiaja baaiki imarĩ, baꞌiaja mijare baairãte baꞌiaja kibaarãñu. 7 Maekaka baꞌiaja jũairã imariᵽotojo iꞌsuᵽaka oyiaja imajiᵽarũkimarĩrã mija ime, ĩꞌrãrĩmi sakitiyetarãka simamaka. Iꞌsuᵽakajaoka yijaroꞌsi baꞌiaja yija jũakoᵽeika kitiyetarãñu. 1 

 

 

 

 

 

 

259 Porciones del Nuevo Testamento en Letuama de Colombia, 1a ed., © 2013, Liga Bíblica Internacional

2 Tesalonicenses 1–2

260

Maiᵽamaki Jesús, kiángelrãka tẽrĩtaka baawãrũirãᵽitiyika kiꞌtarãka ᵽoto iꞌsuᵽaka kibaarãñu. Maboꞌikakuriᵽi kiꞌtarãñu, ᵽeka jũꞌrẽika uᵽaka jãjia yaaboaika watoᵽekaᵽi. 8 Torãjĩte Tuᵽarãte õrĩriyaᵽabeyurã imarĩ, Jesúrika bojarirokaoka ãꞌmitiriᵽeꞌyoirãte baꞌiaja kibaarãñu. 9 Baꞌiaja jũajiᵽarũkirã nimamaka, Maiᵽamakire imarõꞌõ táꞌteka oyiaja naroꞌsi imajiᵽarãka. Tẽrĩwaꞌribaji kirikaᵽi jiitaka kiyaaboaika ĩarũkimarĩrãroꞌsi nimarãñu. 10 Iꞌsuᵽaka kibaarãñu Jesúre ate etarãñurĩmi. Suᵽa imarĩ jĩjimakaᵽi kirirãte kire eꞌetorirãñu. Kire ĩatirã “Jiitaki kime. Tẽrĩwaꞌribaji jia mare baaiki kime”, ãrĩwaꞌri kire najiyiᵽuᵽayeerãñu. Mijare yija wãrõraᵽaka yiꞌyurã imarĩ, naka mija imarãñu mijaoka. 11 Ika ᵽuᵽajoawaꞌri Tuᵽarãte mijaroꞌsi yija jẽñejiᵽarijayu. Kiyaᵽaika uᵽakaja baairã mija imaokaroꞌsi mijare kiakaeka. Suᵽa imarĩ, kiyaᵽaika uᵽaka mija baamaka ĩawaꞌri “Nare yakaikaᵽi ãrĩwaꞌri yirirã najayua jia sime mae”, kẽñaokaroꞌsi, kire yija jẽñerijayu. Suᵽabatirã “Simauᵽatiji jia baarika nayaᵽaika nabaawãrũokaroꞌsi nare mijeyobaabe. Suᵽabatirã mire yiꞌriwaꞌri nabaarijayua jia saweiokaroꞌsi mirikaᵽi nare mijeyobaabe”, ãᵽaraka kire yija jẽñerijayu. 12 Iꞌsuᵽaka ᵽoꞌimajare ĩarãka wãjitãji jia mija baamaka ĩawaꞌri maiᵽamaki Jesucristore najiyiᵽuᵽayeerãñu. Kirirã mija ima simamaka, iꞌsuᵽakajaoka mijare kibaarãñu. Tuᵽarã, maiᵽamaki Jesucristoᵽitiyika jia mijare nabaamaka iꞌsuᵽaka mijaroꞌsi simarãñu.  

 

 

 

 

2

Ikuᵽaka simarãñu Jesucristore etaerã baarãka ruᵽu

Mija ãꞌmitiᵽe yija jeyomarã. Maiᵽamaki Jesucristore etarãñu ate kika maimaokaroꞌsi mare rẽarĩ. Iꞌsuᵽaka simarãka simamaka ketarũkirĩmikaka mijare yiwãrõerã baayu mae. 2 Ikuᵽarõꞌõᵽiji, “Koᵽakaja Jesúre etarijẽꞌraka seyatiyu”, ãrĩwaꞌri ĩꞌrãrimarãre mijare bojaᵽakimaka ãꞌmitiritirã, õrĩᵽũabeyurã uᵽakataka rukubaka mija ᵽuᵽajoaꞌsi. Suᵽabatirã “Rita mijare ñañu. Esᵽíritu Santo yijare sõrĩrũjeraᵽaki”, narĩᵽakikoᵽemakaoka nare mija yiꞌriaꞌsi. Iꞌsuᵽakajaoka “Ᵽaᵽeraᵽi Ᵽablote yijare sabojayu”, naᵽakãꞌã nare mija ãꞌmitiriᵽẽaꞌsi. 3 Iꞌsuᵽaka mijare ãrĩkoᵽeirãte mija bojaᵽakirũjeaꞌsi. Ketaerã baarũki ruᵽu ikuᵽaka simarãñu: Tuᵽarãte jaꞌatatirã “Kimajamarã yija ime”, ãrĩwaꞌri ᵽoꞌimajare kire yiꞌribesarãñu. Iꞌtojĩte Baꞌiaja baarimijikaka jãꞌmeikite etarãñu. Ikiji kime “Baꞌiaja imarika tiyibeyurõꞌõrã yiᵽũatarũkika”, bikijarãja Tuᵽarãte ãrĩkaki. 4 Ikuᵽaka Baꞌiaja baarimijikaka jãꞌmeikite baarãñu: Ritaja jiyiᵽuᵽaka ᵽoꞌimajare õrĩrijayua imakoᵽeika nareka kijãjibaarãñu. Tuᵽarã majamaki kima imarĩ, “Tẽrĩrikiji ñime, yire takaja mija ãꞌmitiriᵽẽabe”, ᵽoꞌimajare kẽrĩrãñu. Iꞌsuᵽaka 1 

 

 

 

Porciones del Nuevo Testamento en Letuama de Colombia, 1a ed., © 2013, Liga Bíblica Internacional

261

2 Tesalonicenses 2

kiᵽuᵽaka ima simamaka Tuᵽarãte jiyiᵽuᵽaka õrĩriwiꞌiarã kãkatirã imatiyairõꞌõrã eyaruᵽaritirã, “Tuᵽarãja yiꞌi”, kẽrĩᵽakirãñu. 5 Mijaka ñimaraᵽaka ᵽoto iꞌsuᵽaka imarũkiakaka mijare yibojawãrõtiraᵽe. “Yeꞌkariribeyurã nimarijiyu”, mijareka ñarĩᵽuᵽajoayu. 6 Baꞌiaja baarimijikaka jãꞌmeiki iꞌtawãrũbeyukajika maekaka. “Ikuᵽaka simamaka kiꞌtawãrũbeyu ruᵽu. Ketarũkirĩmi ruᵽubajirãja ketakoreka kire satáꞌteyu ruᵽu”, ãrĩwaꞌri mijare yibojaraᵽaka õñurã mija ime. 7-8 Suᵽa simakoꞌomakaja, ᵽoꞌimajare õrĩwãrũbeyuaᵽi, baꞌiaja wejeareka Satanáre baaũꞌmutiyu. Iꞌsuᵽaka baariᵽotojo, wããrõꞌõrãja etarũkikate etawãrũbeyu ruᵽu. Kire táꞌteikite kire ĩaᵽẽabesarãka ᵽoto ᵽuri ritaja ᵽoꞌimaja wãjitãji Baꞌiaja baarimijikaka jãꞌmeikite etarãñu. Iꞌsuᵽaka kima imakoꞌomakaja maiᵽamaki Jesúre kire tẽrĩrãñu. Ketarãñurĩmi tẽrĩwaꞌribaji kibaawãrũika beawaꞌri, kiᵽuritarãkaᵽiji kire kiriatarãñu. 9 Ika yibojaika ruᵽubajirã, ikuᵽaka simarãñu: Satanárikaᵽi ãrĩwaꞌri Baꞌiaja baarimijikaka jãꞌmeiki ritaja maikoribeyua ᵽoꞌimajare beaᵽakirĩ etarãki. 10 Ritaja baꞌiaja baawãrũiki imarĩ, baꞌiaja imarika tiyibeyurõꞌõrã aꞌrirũkirãte saᵽi kiᵽakirãñu. Tuᵽarãrika bojariroka yiꞌririyaᵽaberiwaꞌri, baꞌiaja imarika tiyibeyurõꞌõrã naꞌrirãñu. Kirika bojariroka nayiꞌririkareka ᵽuri saᵽi natãrĩrũkia simajããeka. 11 Sanayiꞌriberika simamaka, Tuᵽarãte rukubaka nare ᵽuᵽajoarũjerãñu Baꞌiaja baarimijikaka jãꞌmeiki ᵽakirimajaroka nayiꞌyaokaroꞌsi. 12 Tuᵽarãrika bojariroka ãꞌmitiriᵽẽabekaja, jĩjimakaᵽi baꞌiaja baarijayurãte baꞌiaja imarika tiyibeyurõꞌõrã aꞌyaokaroꞌsi iꞌsuᵽaka kibaarãñu.  

 

 

 

 

 

 

Ikuᵽaka Jesucristore yiꞌyurãte ime

Mija ãꞌmitiᵽe yija jeyomarã, jia Maiᵽamakire wayuĩairã. Wejea kiᵽoꞌijiaeka ᵽotorãja kitããrũkirã mija imaokaroꞌsi Tuᵽarãte wãꞌmatikarã mija ime. Suᵽa imarĩ, Esᵽíritu Santore mijare jeyobaaikaᵽi baꞌiaja baarika jaꞌatatirã, kirika bojariroka yiꞌriwaꞌri õñia mija imajiᵽaokaroꞌsi iꞌsuᵽaka Tuᵽarãte baaeka. Iꞌsuᵽaka mijaroꞌsi simaeka ᵽuᵽajoawaꞌri “Jia mibaayu Tuᵽarã”, mijaroꞌsi yija ãrĩjaꞌatabesarãñu. 14 Jesucristorika bojariroka mijare yija wãrõekaᵽi ãrĩwaꞌri Tuᵽarãte mijare wãꞌmaeka. Iꞌsuᵽaka simamaka, maboꞌikakurirã maeyarãka ᵽoto ritaja ima tẽrĩwaꞌribaji kirika maiᵽamaki Jesucristore bearãñu. Iꞌsuᵽakajaoka simarãñu mijaroꞌsioka kika. 15 Yijeyomarã, iꞌsuᵽaka imarũkirã imarĩ, Jesucristore mija yiꞌyua jaꞌatarimarĩaja mija imabe. Ritaja wãjirokakaka mijare yija wãrõraᵽaka, suᵽabatirã ᵽaᵽeraᵽi mijare yija oꞌoraᵽakaoka mija ãꞌmitiriᵽẽarijaᵽe. 16-17 Jia Maᵽaki Tuᵽarã mare baaiki, suᵽabatirã 13  

 

 

 

Porciones del Nuevo Testamento en Letuama de Colombia, 1a ed., © 2013, Liga Bíblica Internacional

2 Tesalonicenses 2 –3

262

mare wayuĩaiki imarĩ, jĩjimaka ᵽuᵽajoabaraka maimaerã mare kijeyobaaeka. “Kika õñia maimajiᵽarãñu”, ãrĩwaꞌri sataꞌabaraka jia jĩjimaka mare ᵽuᵽarirũjeiki kime. Suᵽa imarĩ, jia oyiaja baabaraka, baꞌiaja jairimarĩaja mija imaokaroꞌsi mijare kijeyobaarũ maiᵽamaki Jesucristoᵽitiyika. “Yijaroꞌsi Tuᵽarãte mija jẽñeĩjirijaᵽe mijaroꞌsioka”, Ᵽablote ãrĩka

3

Mae ᵽiyia mijare yibojaerã baayu yijeyomarã. Ñojimarĩji Maiᵽamakirika bojariroka aᵽerõꞌõrã yija bojaᵽibaokaroꞌsi Tuᵽarãte mija jẽñebe. Suᵽabatirãoka kirika bojariroka ãꞌmitiriwaꞌri jia jĩjimaka samija yiꞌraᵽaka uᵽakaja aᵽerãte sayiꞌyaokaroꞌsi. 2 Iꞌsuᵽakajaoka, baꞌiaja baairãte baꞌiaja yijare baakoreka, Tuᵽarãte nare táꞌterã yijaroꞌsi kire mija jẽñebe. Iꞌsuᵽaka mija baabe rĩkimarãja aᵽerã Jesucristore ãꞌmitiriᵽẽariyaᵽabeyurãte ima simamaka. 3 Iꞌsuᵽaka imarijayurãte ima simakoꞌomakaja mare jaꞌatabeyuka kime Maiᵽamaki. Iꞌsuᵽaka imaki imarĩ kire mija yiꞌririjaꞌatakoreka mijare kijeyobaarãñu. Suᵽabatirã Satanáre baꞌiaja mijare baakoreka, mijaroꞌsi kire kitáꞌterãñu. 4 “Kẽñu uᵽakaja baaiki kime Maiᵽamaki. Suᵽa imarĩ, kire yiꞌyurã nimamaka, jia oyiaja Tesalónicakarãre baawãrũokaroꞌsi nare kijeyobaarãñu. Iꞌsuᵽaka simamaka nare yija ãrĩka uᵽakaja nayiꞌririjarirãñu”, mijareka yija ãrĩrijayu. 5 Suᵽabatirã “Tuᵽarãte nare wayuĩaika norĩwãrũrũ. Suᵽabatirãoka baꞌiaja jũariᵽotojo mirakajeᵽããeka uᵽakaja sanarakajeᵽããwãrũokaroꞌsi nare mijeyobaabe”, ãrĩwaꞌri maiᵽamaki Jesúre mijaroꞌsi yija jẽñeĩjirijayu. 1 

 

 

 

 

Maimauᵽatiji baꞌirabebaraka oyiaja maimajĩkareka jia sime

Mija ãꞌmitiᵽe yijeyomarã. Maiᵽamaki Jesucristore mare jãꞌmemaka, ikuᵽaka mijare yija jãꞌmeyu: Ĩꞌrĩka Jesúre yiꞌyuka imariᵽotojo baꞌiraberiyaᵽabeyukaka mija jeyoariaꞌsi. Yija wãrõeka uᵽaka baabeyuki kime. 7 Mija ᵽõꞌirã yija imaraᵽaka ᵽoto baꞌirabebekaja imaberaᵽarã yija. Iꞌsuᵽaka yija baaraᵽaka mija ĩaraᵽaka simamaka, iꞌsuᵽakajaoka mija baabe mijaroꞌsi. 8 Suᵽabatirã mijabaꞌarika waᵽamarĩaja yija baꞌaberaᵽe. Mijare takaja jẽñebekaja, ĩmiareka, ñamiarekaoka, jãjia yija baꞌiraberaᵽe yija yaᵽaraᵽaka yijare mija ĩjikoreka. 9 Mijare wãrõrimaja yija imamaka, yijare mija jeyobaarũkirã imariᵽotojo mijare sayija jẽñeberaᵽe. Yijare ĩatirã “Nuᵽakaja mabaayeꞌe maroꞌsioka”, mija ãñaokaroꞌsi suᵽa yija baaraᵽe. 10 Mijaka yija imaraᵽaka ᵽoto, “Baꞌiraberiyaᵽabeyuka ᵽuri baꞌabekaja kimarũ”, mijare yija ãrãᵽe. 11 Iꞌsuᵽaka yija ãrãᵽaka simakoꞌomakaja “Maekaka ĩꞌrãrimarã nawatoᵽekarã baꞌirabebekaja imarã. Suᵽabatirãoka aᵽerã jia baꞌiraberijayurãte najoꞌayuꞌre”, 6 

 

 

 

 

 

Porciones del Nuevo Testamento en Letuama de Colombia, 1a ed., © 2013, Liga Bíblica Internacional

263

2 Tesalonicenses 3

ãrĩwaꞌri yijare nabojayu. 12 “Jia imaokaroꞌsi, aᵽerãte joꞌarimarĩaja mija baꞌirabebe mijaroꞌsiji, mija baꞌiraberiwaᵽaᵽiji mija yaᵽaika mija waᵽaĩjiokaroꞌsi”, ãrĩwaꞌri nare yija jãꞌmeᵽũayu, maiᵽamaki Jesucristore jãꞌmeka uᵽakaja. 13 Mija ãꞌmitiᵽe yijeyomarã. Jia mija baarijayua mija rũrĩaꞌsi. 14 Ĩꞌrãrimarã ika ᵽaᵽera yoꞌoeka yiꞌribeyurã imarã jeꞌe aᵽeyari. Iꞌsuᵽaka nimamaka “Ĩꞌrã imarã Ᵽablote jãꞌmeika yiꞌririyaᵽabeyurã”, ãrĩwãrũtirã naka mija jeyoariaꞌsi. Iꞌsuᵽaka nare mija baarãkareka niꞌyoᵽiꞌrirãñu. Iꞌsuᵽaka mija baabe naᵽuᵽaᵽeꞌrirũ ãrĩwaꞌri. 15 Iꞌsuᵽaka nare baariᵽotojo nare mija majamarãriaꞌsi. Jesúre yiꞌyurã nimamaka, nare mija okajããbe baꞌiaja nabaarijarikoreka.  

 

 

 

“Jia mija imabe”, ãᵽaraka Ᵽablote naroꞌsi oꞌotiyika

Jia maimaokaroꞌsi mare jeyobaaiki kime Maiᵽamaki. Iꞌsuᵽaka simamaka, ĩꞌrãkuri uᵽakaja jĩjimakaᵽi jia mija imaokaroꞌsi mijare kijeyobaarũ. Suᵽabatirã ritaja mijaka kimajiᵽarũ. 17 “Jia nimarũ”, ãᵽaraka yiꞌi Ᵽablo yiᵽitakaᵽi ika mijaroꞌsi yoꞌoyu. Iꞌsuᵽakaja satiyiyu ᵽaᵽera yoꞌoika. Iꞌsuᵽaka oꞌoiki ñime. Sĩawaꞌri “Rita oka Ᵽablote ᵽũataeka sime”, mija ãrĩwãrũokaroꞌsi. 18 Ritaja mija imauᵽatireje jia maiᵽamaki Jesucristore baajiᵽarũ. Iꞌtojĩrãja sime ruᵽu. 16  

 

 

Porciones del Nuevo Testamento en Letuama de Colombia, 1a ed., © 2013, Liga Bíblica Internacional