Juanꞌ

pilla kiika pallu Uraꞌ dechusa tindu

1 Iya,

keranguemulaꞌ bale ruku, Dioschi miꞌkeꞌ kaya ma bulu chachillanu, matyu Jesúschi mika ura kuindaꞌ mityan uwain in estyanu chachillanu piikentsuyu, tsenmin iren estyaityu juꞌ, naajulaba anbuda jutyu Jesúschi mika ura kuinda meenguemulaya estyamu deeve. 2 Tsajuꞌ Jesúschi mika ura kuinda ñullaꞌ kejtsapala chuñuꞌ mityan ñullanu estyamuyu, tsenmin Jesúschi juntsa mika ura kuinda naa-uwanuba laaba tsananu juve. 3 Apa Dios bain, naa Diosaꞌ Na Jesucristo bain, ñullanu estyaꞌ keewareꞌ, tenbityaꞌ, nejuu tiba bulla jutyu chujtinu dejuve, ñulla mika ura kuindanu meengueꞌ estyandetsunmalaya.  

 

Estyan chudei.

4 Iya

mika sunden puiyu, ñuiba bulu keranguemu mantsa chachilla anbuda jutyu Diosaꞌ mika ura kuindanu meengueꞌ, Apa Dios naakide tiñuba tsanguen dechuñu katatu. 5 Challa, keranguemu naatalala, vetaꞌ vetaꞌ estyan dechusai tiꞌ uꞌtandinu tenve, tsaaren entsangue piikenduba tsa tsanguidei tiꞌ kasa juu piikendyuꞌ, uma ajkeꞌ depeepunu uwanu ñullanu mijakara kuindaren juve. 6 Estyan chunuya Dios naa naakidei tiñuba tsanguen chunuuya juve. Tsenmin entsaa juntsave: vetaꞌ vetaꞌ estyan chudei, tive, matyu uma ajkeꞌ depeepunu uwanu ñullanu naake demijakaañuba juntsa. 7 Entsa tusha anbukuinda kes nemula pureꞌ faledekeꞌ, Jesucristo entsa tusha jatu ma chachi naajuñuba tsaa tiyaꞌ jaindyuve tiidetive. Tsandimulaya anbukuinda kes nemula, Cristonu kundaralaa tsandimu deeve. 8 Pashkanu kityuꞌ keenadei, tsejtaa lalaꞌ daran taawasha keñuꞌ mitya kumuinchi bene uraa dekanu juꞌba, ne depirekeñuu ken jutyu. 9 Mun Cristo tyee mijakaañuba tsanguen chutyuꞌ, maali Cristoꞌ mijakaatyunu kuindaa kiiken chushu juntsaa Diosnu yaba chujtiꞌ tanatyuve, tsaaren mun Cristo naake mijakaañuba juntsaaya kentsushu juntsaa Diosnu bain, naa yaꞌ Nanu bain  

 

 

 

 

705

2 JUAN  706

yaba chujtiꞌ tanave. 10 Mallee ñullaꞌ junga yaa jitu, Cristoꞌ mijakara kuinda jutyu, vee kuindaa tajishu juntsaa, ñullaꞌ yasha mikatyudei, naa: ¿Naaju dejayu? tibaindityudei, 11 tsajuꞌ mun tsaa chachillanu: ¿Naaju dejayu? detiꞌ bain, yala tyee urajtu kendetsuñuba yaiba tsanguivetekeñuu juve.  

 

12 Ñullanu

De-insha palaa

kuinda kenu pureꞌ tanayu, tsaaren kiikanu piikeꞌ depatinu tendyuve, tsajuꞌ iren ñullaꞌ junga jaꞌ kajuꞌtalanataa dekuindakenu tenve, tsejtaa kayu mu bain sunden puinu. 13 Keranguemu vejan bulula, entsa tenasha ñuichi keranguemu naatala juu chumula, yai bain Dioschi miꞌkeꞌ kayamula, ñullanu uraꞌ chusa tindetsuve.