Sant Josemaría Escrivá Opus Dei-cho Sthapnnar
MAGNNEM Dhonia-Deva, Sant Josemaría, hea Tujea iodnik-padrik, Tuvem, Bhag’evont Ankvar Morie-vorvim, hispabhair kurpechim dennim favo kelim. Opus Dei-hem Deva-Kar’eo thapcheak bhov visvaxi sadhon koxem Tuvem taka venchun kaddlo. Tem kar’eo mhollear dor-eklea Kristanvan korchelea sadhea kortov’eokornneam-ni ani dispott’ttea vavrant povitrtai zoddpachi ek rit. Hanv-ui mhojea jivitantleo sogleo ghoddnnuko ani poristhiti dhorun, Tuzo mog korcheak ani IgorzMathe-chi, PapSaiba-chi ani soglea atmeanchi khoxien ani sadheponnan seva-chakri korpak mellche sondim-ni tancho bodol korcheak xikum, ani oxem bhavartan ani mogan dhortore-chea vattanr uzvadd fankonv, he vixim Tum formai, Saiba. Sant Josemaría-che vinovnnen hanvem magil’lo upkar mhaka favo-so kor… (hangasor tumchem magnnem korat). Oxem zanv. Amchea Bapa, Noman Morie, Onod Bapak…
“Zoim zoim tum’che anvdde, tum’cho vavr, tum’che maiemog asat, thoim ani teach suvatanr tum’kam disadispott’ttim Krista-chi bhett zatli. Dhortore-velea choddantchodd bhoutik oxea gozalim-vostum modench ami Devachi ani soglea loka-chi seva korun amkam povitr korunk zai. Mhojea putam-dhuvam-no, Prithvi ani Sorg mellun dharer ekamekant vilin zatat. Punn ekamekak mellttat tim khoreaninch tumchea kallzam bhitor, jen’na tum’chem dispott’ttem jivit tumi povitr kortat.” Sant Josemaría Escrivá, Khotkhotean sonvsara-cho mog korcho, hea provochon-antlean, Otumbrache 8ver, 1967. Sant Josemaría Escrivá Espanha-ntlea Barbastro ganvant, 1902-ntlea Janera-che 9ver zolmole. Zaragossa xarant Marsa-che 28ver, 1925, tanni padri-chi dikxa ghetli. 1928-chea Otumbrache 2rer, Deva-gele sfurtin, tanni Opus Dei thapli. 1975-antlea Juna-che 26ver, Saibinn-Maim-chea chitrar apli nimanni mogall nodor lavn, te avchit bhair poddle. To meren Opus Dei-chem kar’eo panch bhuim-khonddam-ni patllil’lem ani te sonvsthe-che 60,000 voir-uch vangddi 80 desam-ni ximpoddil’le. PapSaiba ani Bhismam kodden purai ekchar zo Sant Josemaría-n apleponnan pallil’lo, tech bhavnen tim soglim IgorzMathe-chi seva-chakri kortat. Bhag’evont Bap Juanv Paul II, PapSaiban Opus Dei-chea Sthapnnarak Otumbra-che 6ver, 2002 Sant mhonnum sobhemazar porgottailo. Tachi porob Juna-che 26-ver kortat. Sant Josemaría-chi povitr kudd Roma xarantlea 75, Viale Bruno Buozzi, hea rostea lagil’le Sovostkaie-Saibinni Bhisma-Igorjent visovta. Sant Josemaría Escrivá-vixim odhik khobor zai asot zalear ti: www.josemariaescriva.info www.escrivaworks.org hea pot’tear kaddchi. Sant Josemaría Escrivá-che vinovnnen konnak upkar favo zalear, tannim Opus Dei Dhorm’odhikarea-chea hea pot’tear kollonvchem, oxem magtat: Opus Dei Prelature, P. O. Box 4559, New Delhi 110 016. IgorzMathe Odhikarean-chi man’eotai asa.
