Tesalónicasha keranguemulachi

Pabloꞌ pilla kiika pallu

1

Uraꞌ dejusa tindu

1   Lala,

Pablo bain, Silvano bain, Timoteo bain entsa kiika ñullanu Tesalónica pebulusha kerangueꞌ waku wakudimulachi piikendetsuyu. Ñulla lalaꞌ Diosaꞌ mitya bain, Bale Ruku Jesucristoꞌ mitya bain ma bulu juu buunamula deeve. 2 Lalaꞌ Apa Dios bain, Bale Ruku Jesucristo bain ñullanu estyaꞌ keewareꞌ nejuu tiba bulla jutyu uraꞌ dechujtiꞌ jintsusa tenve.  

Jesús maanmala Dios ujcha lamulanu kavitu kenu juve.

3 Keranguemu

naatalala, naa-uwanuba ñullaꞌ mitya Diosnu yuj urave tiꞌ papatinu dejuyu, matyu ñullaꞌ keranguenutala bain, tsenmin vetaꞌ vetaꞌ estyanutala bain kayu awaiñu indetsuñu, tsandiñaa urañu. 4 Naamika ñullanu veela bendaa dekeꞌ firuꞌ kendetsuñu taaju kendetsuꞌ bain, ñulla kayu kerangueꞌ jindetsuñuꞌ mitya, lala ñullanu laapuꞌ kuinda keꞌ patu, Diosnu kerangueꞌ vee vee mujtu waku wakudimulanu sundenna papatindetsuyu. 5 Entsaa jumulaa naa Dios deechuꞌ kavitu kemuñuba juntsa keewara juve. Tsejtu entsangueꞌ challa ñullanu taaju iwaandaa, Diosnu ñullaꞌ rei juu tananuu dejuve tiꞌ keewaandunguive. 6 Tsajuꞌ Diosya ñullanu taaju iwaamulanu taaju ma-iwaamu juñu urave, 7 tsenmin naa ñulla taaju iꞌ puimulanu bain laaba lekakaañu urave. Tsaaren entsa tsaa puimiya Bale Ruku, yaꞌ pude anjeelaba selusha ñi unjele lluka majaꞌ katawanu malunaa tsainu tsuve. 8 Tsaiꞌ maatu naa Diosnu keeminchanguemulanu bain, naa lalaꞌ Bale Ruku Jesúsꞌ mika ura kuindanu meenguityulanu bain taaju de-iwaanu tsuve. 9 Tsejtu yala naa-uwanuꞌ mityaba taaju iwarantsunu dejuve, tsejtu Bale Rukuꞌ ajuusha pun jutyu, tsenmin yaꞌ tsamantsa naraa piꞌkelaa pudee ajuusha bain pun jutyu kelaraꞌ baasha eranu detsuve. 10 Juntsa malunu Bale Ruku  

 

 

 

 

 

 

620

 621

2 TESALONICENSES 1​, ​2

yachin juu chachillaꞌ kejtsapala balenguranu maanmalaya, kumuinchi keranguen chumu chachilla keenbashiintsunu dejuve, tsenmala ñui bain lala kuinda dekiñu meengueꞌ keranguemu deꞌ mitya, tsanguenu detsuve. 11 Tsejtu entsaꞌ mityaa lala naa-uwanuba ñullaꞌ mitya Diosba kuinda kiikendetsuyu, tsenmalaa lalaꞌ Dios ñullanu entsangueꞌ mikatu, uwain tsanguenuu juñaa mikañuve tyakaanu tirenu, tsenmin ñulla keengues jindu tyee uraa kiikenu detyañu bain, ñullanu yaren tsa tsanguikaanu. 12 Entsa dekenmalaa ñullaꞌ mityan lalaꞌ Bale Ruku balenguranmala, ñui bain yaꞌ mityan balenguranu detsuve, matyu Dios bain, Bale Ruku Jesucristo bain ñullanu naake uraꞌ dekisa tyañu bain juntsaitu.  

 

2

Bale Ruku maantsu naajunuuñu bain

1   Keranguemu

naatalala, uwain lalaꞌ Bale Ruku Jesucristo maanu juñu bain, tsenmin lala yaba uwain bulu waꞌdiinu dejuꞌ bain laapuꞌ kuinda kenu tenve. 2 Veelachi jei tujlekutityudei, naa Bale Rukuchi yumaa maanu malu jave detiꞌ, Diosaꞌ mitya pamu rukulaa tsandiyu detiñu bain, naa mulaa mijakareꞌ paꞌ tsa detiñu bain, naa lalaꞌ pilla kiikaa detanayu tiꞌ, junaa tsandive tiꞌ, tsa detiñu bain wapantyudei. 3 Muchiba jaiba anbukuinda ityudei, matyu Bale Ruku kayu majaindyuren Diosnu kundaa dekenu malu janu tsuve, tsenmala Diosnu Kundaa jumu ruku, matyu Dioschi yumaa kuipa puꞌ de-iꞌ piyainuu jumu ruku jaꞌ katawanu tsuve. 4 Tsejtu entsa rukaa, tinaa chachilla Diosve detyañu bain, tsenmin tinaa Dioschin juu dejuñu aawa kureꞌ keewaanu deeñu bain, juntsalanu kundaa junu tsuve. Tsenmin yaa kayu Diosnu pulla aa baleyu tyaꞌ yanu dekeenguisa tyatu, naa Diosaꞌ pupunanu yashaba viꞌ chuꞌ, Dios juuñungue dekurekaanu kenu tsuve. 5 ¿Ñullanu mandejatyun iya ñuiba putu entsa kuinda kiikemuñuba? 6 Ñulla yumaa mideeve, kayu yachi entsai katawanu malu jaindyuya yanu tyeeba daatanañunaꞌ entsangue katawakaanuu jutyuñu bain. 7 Tsajuꞌ entsa munuba wandyajtu firuꞌ kiikenuu jumu yumaa firuꞌ kenuu tirave, tsaaren tsanguekaan jutyu daatanañunamunu kalarendyuren tsaa juunu tsuve. 8 Tsaaren kalaanmalaya juntsa ti uudentalaba meenguityu ruku entsai katawanu tsuve, tsenñu Bale Ruku Jesús maatu, yaꞌ fiꞌpaꞌ ishuwachi juntsa rukunu juipuꞌ tuꞌnu tsuve, tsejtu tiba jutyungue keꞌ pirenu tsuve, yaꞌ piꞌjuruuchi maatu. 9 Juntsa ti uudentalaba meenguityu rukuya, Satanás tyee kemu juꞌba tsanguiveꞌñu tsamantsa pude janu tsuve, tsejtu naa Diosyaa tsanguekaantsuve tyainuu bain, naa keenbashiinuu bain dekeꞌ keewareꞌ, anbuda dekeranguikaanu tsuve. 10 Tsejtu naa-uwanuba taaju ken chuinsha jinuu jumulanuya tituba firuꞌ juu dekeꞌ keewareꞌ anbudan dekeranguikaanu tsuve, matyu yalaya anbuda jutyu kuindanu mutyatyuꞌ demeenguityuꞌ livee iinuu dejutyuñuꞌ mitya. 11 Tsenñaa yala tujla deeñu, Diosren yalanu anbukuindanu keranguikaanuke tirenu tsuve, 12 tsenmalaa mu bain anbuda jutyu kuindanuya keenguityu dejuꞌ, tiba firuꞌ juunu tene aindyaꞌ kiikemulaya kavitu de-iꞌ kuipa vinudetsu.  

 

 

 

 

 

 

 

 

 

 

2 TESALONICENSES 2​, ​3  622

13 Tsaaren

Dios lalanu livee kenu miꞌkeꞌ kave.

lalaya naa-uwanuba ñullaꞌ mitya Diosnu urave tiꞌ papatinu detsuyu. Keranguemu naatalala, Dios ñullanu estyamuꞌ mityaa, yumalan livee kenu miꞌkeꞌ kave, uwain anbuda jutyu palaanu keenguikareꞌ Espíritu Santochi yaꞌ chachi juu detiretu. 14 Lala ñullanu Diosaꞌ mika ura kuinda demijakaañaa, Dios ñullanu livee kenu miꞌkeꞌ kave. Tsanguemiya ñulla lalaꞌ Bale Ruku Jesucristochi tiba tsamantsaa juinsha bulu depuveꞌsa tyataa tsanguive. 15 Tsaꞌ mitya keranguemu naatalala, lala ñullaꞌ ajuusha paꞌ demijakaañutala bain, naa kiikachi piikeꞌ demijakaañutala bain juntsai deechuꞌ jindetsuꞌ jaiba pashtyudei. 16 Lalaꞌ Bale Ruku Jesucristoren, tsenmin lalaꞌ apa Dios bain tsamantsa ura ruku juꞌ, lalanu estyatu, kayu naa-uwanuba sunden keenanu tireꞌ, 17 ñullaꞌ tenbukasha sundyawareꞌ uraꞌ deelawaasa. Tsenmin ñulla tyee uraa padetiñu bain, uraa kidekiñu bain naa-uwanuba ñullanu tsa tsanguikaasa.  

 

 

 

3

1   Keranguemu

Lalaꞌ mitya Diosba kuinda kiikidei.

naatalala, lalaꞌ mitya Diosba kuinda kiikidei, tsenmalaa Bale Rukuꞌ kuinda apain nukaba demijaꞌ, uwain ura palaave tyaꞌ mutyaꞌ keenguenudetsu, ñullanu naa-imuwaañu bain juntsaitu. 2 Tsenmin Diosba kuinda kiikidei lalanu firuꞌ chachilla tibanguiꞌnudetsu, matyu chachilla kumuinchi keenguemu tene dejutyuñuꞌ mitya. 3 Tsaaren Bale Rukuya naakenu tiꞌba tsanguemuꞌ mitya, yaa ñullanu deelawareꞌ washkentsuꞌ Dyabuluchi tiba ikaakaren jutyuve. 4 Tsenmin lala tyee ñullanu kenu demijakaañu bain, ñulla tsanguendetsuꞌ, kayu ajkesha bain ñullanu Bale Ruku tsangues jikaantsunu juve tenna dejuyu. 5 Tsenmin Bale Rukaa ñullanu Dios naa-i estyamuñuba juntsaa tirekaasa, tsenmin taaju de-iꞌ pullandaa Cristo tsaa jei kidandai paijtyu tiresa.  

 

 

 

6 Keranguemu

Mu bain taawasha kenuu dejuve.

naatalala, Bale Ruku Jesucristoꞌ mitya tiꞌ, naaju naatalalaa tituba firuꞌ kiiken dechuꞌ, a lala yalanu naake demijakaañuba tsangue meenguen dechutyuñuba, juntsalanu bakaꞌ jiidei tindetsuyu. 7 Ñulla mideeve lala naaken chumuwa deeñu bain, tsaꞌ mitya ñui bain juntsanguen chunuuya dejuve. Lalaya ñuiba bulu chutu tituba firuꞌ kiiken chutyuwa deeyu, 8 tsenmin muchiba panda paanguiꞌmujchin kaꞌ fityuwa deeyu. Tsa dejutyuꞌ, naa mandala bain, naa kepe bain taawasha kiikemuwa deeyu naa tyubaa dejuꞌba, tsejtaa lala ñullanu munu bain bulla kiiken chun jutyu. 9 Tsaaren lala ñullanu tyeeba  

 

 

a 3.6, 7 tituba firuꞌ kiiken dechuꞌ tityumujchi, ti taawashaba kindyatyu dejuꞌ tiꞌ aseetanguikara bain junu juve.

 623

2 TESALONICENSES 3

kuwakai tinuu jularen tsaawa deeyu, tsejtaa lala tyee dekiꞌba ñullanu juntsaa demijakareꞌ tsa tsangues jikaanu. 10 Tsejtu lala ñuiba bulu chutu entsaa pamuwa deeyu: mun taawasha kityu juꞌ bain, panda fin jutyu jusa. 11 Tsaaren challa demijayu, naa ñulla mantsa tiba kendyatyu dejuꞌ bain, veelachinuya titalaañuba bulla keꞌ kuwa kuwadekiñuve. 12 Tsejtu naajulaa tsaa chachilla deeñuba lala Bale Ruku Jesucristoꞌ mitya tiꞌ entsanguidei tindetsuyu: ñulla taawasha keꞌ, munuba bulla kiꞌmujchin panda atiꞌkaꞌ finu lushi laadei. 13 Tsaaren keranguemu naatalala, ñulla uraꞌ kiikenutalaya tyubaiꞌmujchi tsa tsangues jintsudei. 14 Tsejtu mulaa entsa lalaꞌ piikiñu palaanu meenguityunmalaya, maa juntsañu bain keetadiꞌ, yaba buudityudei, tsejtaa yanu yujtyawaanu. 15 Tsejturen kundaa juuñungue kuutyu dejuꞌ, naatala juuñungue kureꞌ uleꞌ papatidei.  

 

 

 

 

 

16 Tsenmin

De-insha palaa

ñullanu tiba bulla jutyu uraꞌ chuwaanu tiremu Bale Rukuren naa-uwanuba titalaba tiba bulla jutyu uraꞌ chuwaasa. Bale Rukuya kumuinchi ñuiba bulu jusa. 17 Iya, Pablo, enun in tyaapachi pillakeꞌ uraꞌ chudei tintsuyu; entsanguitaa kumuinchi in pilla kiikatalaya naa-uwanuba in mumu pupukiyu. 18 Lalaꞌ Bale Ruku Jesucristo ñullanu estyaꞌ keewares jintsusa.