Filipossha keranguemulachi Pabloꞌ pilla kiika

1

Uraꞌ dechusa tindu

1   Pablo,

Timoteoba, lala Jesucristoꞌ mitya taawasha kemu chachilla, Filipos pebulunu Diosnu keranguen chumulanu, matyu Jesucristoba ma bulu juu jumulanu, entsa kiika piikeꞌ uraꞌ dejusa tindetsuyu. Naa keranguemulanu washkemu bale rukulanu bain, naa keranguemulachi tyeeba kemu chachillanu bain uraꞌ dejusa tindetsuyu. 2 Lalaꞌ Apa Dios bain, Bale Ruku Jesucristo bain ñullanu estyaꞌ keewareꞌ nejuu tiba bulla jutyu uraꞌ dechujtiꞌ jintsusa tenve. 3 Iya naa-uwanu ñullanu mandengaꞌ bain Diosba kuinda kiikeꞌ, yaa yuj uraꞌ kive tiitiyu. 4 Tsejtu naa-uwanu Diosba kuinda kikeꞌ bain, kumuinchi ñullaꞌ mitya sunden papatintsuyu, 5 ñulla neiꞌba kerangueꞌ, Diosaꞌ mika ura kuinda jumunu inu bulu kiveꞌmin chaikama bain tsanguendetsuñu. 6 Uwain Diosya ñullanu yaꞌ mika ura taawasha keꞌ peepuꞌ jindu, kayu ajkesha bain tsaren uraꞌ kes jintsumiya Jesucristoꞌ maangama millangue deechuꞌ dejuu tananu juve tenna juyu. 7 Tsejtu iya ñullaꞌ mitya tsaa pensa juñu yuj uraa tenna juyu, ñullanu estyamuꞌ mitya. Tsenmin ñullaya naa iya peesu puñu bain, naa bale rukulaꞌ ajuusha balelaꞌ pakakentsuñu bain, naa Diosaꞌ mika ura kuinda wandintsuñu bain, ñui bain, i bain tsaren Dioschi uraꞌ i-iimu dejuꞌ, ibaren bulu punañuu juju deeve. 8 Tsenmin Diosya mive, Jesucristo tsanguikaañu, iya ñullanu mika estyamuñu bain. 9 Tsejtu Diosba kuinda ketu, ñuitala mika estyamu tiyanu mijakaasa tiꞌ, naa uraꞌ aseetaju bain, naa kayu uraꞌ mi bain tiresa tiꞌ papatintsuyu, 10 tsenmalaa tyee urañu bain, tyee urajtuñu bain juntsaatala keemi detiyamiya, tiba uraa tene kiikenudetsu, tsejtaa Cristoꞌ maanu malunchi kuipa tajtu dejuꞌ, tinu laapuꞌ kuipa pun tsaa junudetsu. 11 Ñullaꞌ uraꞌ kiikeñu jumulaa ne pukaaba juꞌ chinu pureꞌ namu jun tsaanu tsuve. Juntsaya Jesucristaa ñullanu tsanguikaanu tsuve, tsenmalaa chachilla Diosnu tsamantsaave tiꞌ balengureꞌ keewaanudetsu.  

 

 

 

 

 

 

 

 

 

599

FILIPENSES 1  600 Jesucristoꞌ mityan juu chuyu.

12 Keranguemu

naatalala, inu tyee iꞌ puiñuba juntsaren Diosaꞌ mika ura kuinda kayu keꞌ jiinuu tireñu bain ñulla demijasa tenve. 13 Iya entsaiꞌ peesu viñaa kumuinchi romano uñiꞌ yasha washnamu suutadula bain, naa kayu veela bain demijave, naa iya Cristoꞌ mityaa tsaintsuñuba. 14 Tsejtu iya entsanaꞌ peesu puñu, kayu seranju keranguemu naatalala Bale Ruku tsanguemishtinu juve tenna dejuꞌ, daj pensa demangueꞌ, Diosaꞌ kuinda kayu jelajtu mijakares jijiindetsuve. 15 Uwain mantsalaya Cristoꞌ kuinda mijakareꞌ bain inu kishtyaꞌ, kundaa tyataa tsanguendetsuve. Tsaaren mantsalaya uraꞌ kenu pensa jutaa tsanguendetsuve. 16 Tsejtu uraꞌ kenu pensa juꞌ mijakaamulaya Cristonu estyataa tsanguemu deeve, matyu Dios entsangueꞌ inu engu peesu pukaatu, yaꞌ mika ura kuinda mijakaranu balelaꞌ pakakaanaa tsanguiñuba demijaꞌ mitya. 17 Tsaaren mantsalaya uwain tsandinu tyaꞌ patyumujchi, maali balenguranu tyataa tsandintsuꞌ, iya peesu puñu inu kayu taaju iwaanu tyataa ne tsandindetsuve. 18 Tsejtu uraꞌ kenu pensa jutyun tsandiꞌ, yalaa balenguranu tyaꞌ pandetsuñu bain, inchiya juntsaa nejuuve, yala tsanditu Cristoꞌ uraꞌ kuindaren pandetsuñuꞌ mitya. Tsenñu inuya sundenve. Tsaaren kayu sundyanu tsuyu, 19 ñulla Diosba kuinda kiikendetsuñu, naa Jesucristoꞌ Espíritu bain kivetentsuñu, kumuinchi entsaiꞌ depullantsuñu jumulaa naa iya uraꞌ kentsuñuba entsangue dekeewaanu juve tenna juyu. a 20 Iyaa uwain Dios tsanguenu tsuve tenna juꞌ, inu yujpewaakenuuya ken jutyuve pensa juyu. Tsejtu challa bain naakentsuꞌba, tsenmin kaspele bain naakemu juꞌba tsangueꞌ jintsuꞌ, in mitya Cristo naa-i balenguranuu juꞌ bain tsai katawantsunu juve, naa iya chuñu bain, naa iya peyañu bain, 21 matyu inchiya naa chuꞌ bain Cristochee chuꞌ, peyaꞌ bain kayu tyeeba uraa kanu juꞌ mitya. 22 Tsaaren entsa tunu chutaa Bale Rukuchi uraanuu taawasha kayu keꞌ jintsunuushu juntsaa, naaken tsandengaa juuyu. 23 Tsajuꞌ pai pensa jumunu yuj liꞌpuꞌ tenve. Ma pensaya inu peyanu tenve Cristoba bulu chunu tenñuꞌ mitya. Tsaitu inchiya kayu uranu juve. 24 Tsaaren kama pensaya iya ñullaꞌ mitya kayu chudiꞌ jintsunu aa menesteve. 25 Tsejtu iya ñuiba chunu aa menesteñuba miꞌ mitya, kayu chudiꞌ jintsuꞌ, ñullanu kiveteꞌ kayu ajkesha jimishtiꞌ, ñullaꞌ keranguenu pensa sundyawareꞌ jintsunu tsuyu. 26 Tsajuꞌ ñulla in mityan iya ñuiba mangatawanmala, Jesucristoba bulu dejuꞌ, tsamantsai sundyanu detsuve. 27 Tsejturen tiꞌ mityaba entsaatalaa tengaya chudei: Cristoꞌ mika ura kuinda naake mijakareꞌ pañu bain tsa tsanguen chudei. Tsanguen dechushu  

 

 

 

 

 

 

 

 

 

 

 

 

 

 

a 1.19 kumuinchi entsaiꞌ depullantsuñu jumulaa naa iya uraꞌ kentsuñuba entsangue dekeewaanu juve tenna juyu tityumujchi, inu livee ikaakenuuya juñuba iya miꞌ mitya tiꞌ aseetanguikara bain junu juve.

 601

FILIPENSES 1​, ​2

juntsaa naa iya majaꞌ kereꞌ bain, naa majaꞌ keetyuꞌ bain, ñulla deechuꞌ keꞌ ma pensa juu dechuꞌ, Diosaꞌ mika ura kuindanu tsangue keengues jindetsuve tiñu kuinda mijanu tenve. 28 Tsejtu ñulla jaiba ñullaꞌ kundaalachi jeekaaviꞌmujchi dechuꞌ, keengues jindetsushu juntsaa, naa yalaya de-iꞌ piyainuuya dechuñuba yalanu keꞌ keewaandetsuve. Tsenmala ñullaya juntsaa dejutu livee inuuya dejuñu bain yai bain mijanu detsuve. Kumuinchi entsaya Diosya tsanguekaamu juve. 29 Tsajuꞌ mika uraꞌ keꞌ, ñullanu Cristonu keenguenun tirekindyuꞌ, naa yaꞌ mitya taaju inu bain tireve. 30 Tsenñu challa Jesucristoꞌ mityan naa ñui bain, i bain juntsa taajuren kendetsuyu; kaspele naake taaju kemuwaañuba ñulla katamuwa deeve, tsenmin chaikama bain iya juntsa taajuren kentsuñuba ñulla kuinda mija mijadeive.  

 

 

2

Cristo balengurajtuu tiyatun, balenguraa mandiyami.

1   Tsajuꞌ Cristo ñullanu sunden pensa manguikaanu tireñu, ñulla veela

dellakindyañu bain estyamu dejuꞌ sunden pensa mangaamu deeshu juntsaa, tsenmin kumuinchi juntsa Espíritu Santoren detashu juntsaa, tsenmin naajulaba tenbityamu deeshu juntsaa, 2 ñulla kumuinchi ma bulu juu dechuꞌ, parejuren de-estyaꞌ, muba ma pensan judejuꞌ, naajulaba Diosaꞌ taawasha kenun pensaa dejuꞌ, inu pureꞌ sundyawaakikai. 3 Mu bain munuba kishtyaꞌ ajaa kenu kityudei, tsa jutyuꞌba, daj katawachi tenna kenu kityudei, tsa jutyuꞌ main main daj pensajtu dejuꞌ, veelaa kayu ñullanu tichiba pulla deeve tya tyaidei. 4 Mu bain naa-uwanuba ñuichin uraanuu miꞌkenu kiꞌmujchi, veelachi bain uraanuuya kidei. 5 Ñulla Jesucristoba buunamulaya, ya naatyamuñuba tsandyanuu dejuve: 6 Naa Cristoya Dios juwa juꞌ bain, tsaayu tyaꞌ, entsa tusha Diosba pareju tiyaꞌ chudinuu miꞌkendyuve. 7 Cristoya naa tsamantsaa juꞌba, juntsaa keewaatyumujchi taawasha kemu chachi juu tiyaꞌ, ne chaꞌ ruku tiyaive. Tsaiꞌ ne chachi juu tiyatu, 8 ya maaliren umingaꞌ, Diosnu uraꞌ merangueꞌ, balengurajtu ruku juu tiyaꞌ, kuusanu mayujpeyai tuꞌviꞌ peyave. 9 Tsenñaa Dios yanu tsamantsangue aa bale ruku tiwaave. Tsangueꞌ yanu kumuinchi chachillachi tsamantsaa aa bale ruku tikayanu tiwaave, 10 tsenmalaa kumuinchi selusha chumula bain, naa tusha chumula bain, naa peyamula bain Jesúsꞌ ajuusha teedinudetsu, 11 tsenmin naajula bain uwain Jesucristaa Bale Rukuve tiitinudetsu, tsenmalaa Cristoꞌ mityan Apa Dios tsamantsaa bale keewaranutsu.  

 

 

 

FILIPENSES 2  602

12 Tsajuꞌ

Keranguemula entsa tusha ñillu juuñu deeve.

in estennu keranguemu naatalala, ñulla iya ñuiba bulu chunu uwanu naa-uwanuba Diosnu uraꞌ meenguemuwa deꞌ mitya, challa iya ñuiba bulu chutyuꞌ bareꞌ chuñaa, Diosnu kayu uraꞌ meenguidei. Tsejtu ñulla naa-itaa livee inbera inu juꞌ bain juntsaaya keꞌ Diosnu balengureꞌ keewareꞌ jintsudei, 13 matyu Diosyaa ñullanu naa naake uraꞌ kekaanu tyaꞌba tsanguenu pensa kekaamu juꞌ, yaren tsanguiveꞌmu juve, tsejtaa naakeñaa yachi uranuuñu bain tsanguikaanu. 14 Mu bain ti kikeꞌba paviikiꞌmujchi, tsenmin vetaꞌ vetaꞌ ajaa patintsutyumujchi kiikidei, 15-16 tsenmalaa mu bain ñullanu naa kuipa juu bain, naa tiba firuꞌ kemu juu bain katan dejutyuve. Tsejtu naa tsamantsa firuꞌ chachilla, anbukuinda kemu chachillaꞌ kejtsapala dechuꞌ bain, ti kuipaba jutyu dechuꞌ, Diosaꞌ na juu chudei. Tsejtaa ñulla naa-uwanuba chuwaanu tiremu Diosaꞌ kuinda mijakarendu, yala dandajtu juuñuu tusha chumu chachillachiya makara juuñungue danguenu detsuve. Tsenmalaa Cristo maanmala iya ñullaꞌ mitya mika sundyanu tsuyu, iya tsangueꞌ deraꞌ taawasha keꞌ bain tsanguiꞌñuba ne uraañuu tiyan jutyuꞌba miꞌ mitya. 17 Tsejtu ñulla keranguendetsutaa Diosnu keewara animaa juuñuu kendetsuñu, juntsan mitya i bain uraꞌ kivetekenuu jutu, ñullaꞌ mitya peyainuuba jushu juntsaa, tutaꞌ in asaa binu yuutsuren tsanguiveꞌnu tsuyu. Naa tsa-iꞌ bain, iya ñuiba bulu sundyanu tsuyu. 18 Tsaren ñui bain iba buluren sundyaveꞌkai.  

 

 

 

 

19 Bale

Pablo, Timoteonu bain Epafroditonu bain laapuꞌ piikemi.

Ruku Jesús tsaa mutyañuya, Timoteonu teꞌ eenu tenve, i bain ñullaꞌ kuinda mamijaꞌ sunden junu tenñuꞌ mitya. 20 Mu bain veelaya Timoteo tsaa dejutyuꞌ, iya naake pensanguemuñu bain ura juntsangue pensanguemu dejutyuꞌ, ñuichi uraa kenu pensaya dejutyuve. 21 Tsajuꞌ naajulaba Jesucristochi uraanuuya kenu miꞌkiꞌmujchi, yaichi uraanuu tene kenu miꞌkemu deeve. 22 Tsaaren Timoteoya naake uraꞌ juꞌ kemishtimuñu bain ñulla mideeve, tsenmin veelanu Diosaꞌ mika ura kuinda mijakaamishtinutala bain inu in na juuñungue kemishtimuñu bain ñulla mideeve. 23 Tsaꞌ mitya iya tyee inu juꞌba neiꞌba uraꞌ mijamiren, yanu teꞌ eenu tenve, 24 naa uwain Bale Rukuya inu mangalaañu, iren jaꞌba inu juyu tenna juꞌ bain. 25 Tsaaren naa inu deraꞌ taawasha kiveꞌmu lalaꞌ keranguemu naatala, Epafroditonu bain me-erenbera kenu pensa juyu, ñulla in junga inchi meneste junutala kiveꞌnu eekemuwadeesu juntsanu. 26 Yaa kumuinchi ñullanu mangatanu tyaꞌ yuj pensandyatyaive; ya diluve detiñu, ñulla kuinda demijañuꞌ mitya. 27 Uwain ya diikaaviꞌ ma pekeraive, tsenñuren Diosya yanu tenbityatu uraꞌ mandireve. Tsaaren Dios yanuren tenbityaindyuꞌ, inu bain tenbityataa tsangueꞌ uraꞌ mandireve, inu kayu jungajte llakinguikaandyaiꞌtu.  

 

 

 

 

 

 

 

 603

FILIPENSES 2​, ​3

28 Tsaꞌ

mitya yanu ñullaꞌ junga teꞌ me-erenbera kentsuyu, ñulla yanu mangataꞌ masundyanudetsu. Tsenmalaa i bain yuj pensandyaa jun jutyuyu. 29 Ya bain Bale Rukunu keenguemu naatala juñuꞌ mitya, ñullaꞌ junga maanmala sunden mikadei. Tsenmin naajula bain ya naajuñuba tsangue uraꞌ keewaamulanuya balenguudei, 30 matyu yaa Cristochi taawasha kendun pekeraive, tsejtu yaa naa peyanuu faañu bain peyainuu ma iive, ñulla inu naakeꞌ kiveten tsa deeñu, yaa ñullaꞌ mitya inu kivetendu.  

 

3

Bale Rukunu keenguitaa livee inuu juve.

1   Keranguemu naatalala, ñulla Bale Rukuba dejuꞌ mitya sundyadei. Naa

tyeeba manbaꞌ pilla pillakenu juꞌba inuya landendyuve, ñuichiya kayu uraa junuuñuꞌ mitya. 2 Matyu entsandinu tenve: Kucha juuñuu, firuꞌ kemu chachillanu pashkatyuꞌ, yaichi chiꞌkayainu ityudei. Yalaa, lala livee inu tenshu juntsaa, lalaꞌ bulunu Dioschi señas inuu dejuve tis nemu deeve, tsajuꞌ yalaya yalaꞌ bulunu wanbumu deeve. 3 Tsaaren lalaya uwain Dioschi señas iiñuu jumula dejuꞌ, yaꞌ Espíritu tsanguikaañu yanaa aawa kureꞌ keewaamu deeyu, tsenmin lalaya mika sunden dejuyu Jesucristochi deetu, tsejtu ne lalaya lalaꞌ bulunu tsaa señas itaa, uwain livee inu deeyu tenna dejutyuyu. 4 Tsajuꞌ vejan judíola tiꞌ mityaba naa tyamu deeñuba, iyaa kayu tsandyanuu juyu. Mu bain tiꞌ mityaba inu pullaa jun dejutyuve, yala naa tyamu deeñuba tsandyanutalaya. 5 Iya nakayañu mandishpen malu iinmalan Dioschi señas ikaamu deeve. Iya Israel chachiyu, Benjamínnu seraꞌ jamu bulu chachi; tsenmin hebreo chachilla naajuwa deeñu bain juntsaayu, tsenmin hebreo palaachi pamuyu, naa in apala bain tsaren dejuve. Tsenmala judíolaꞌ leitala pensangueꞌ panmalaya iyaa fariseolaꞌ leitala deraꞌ keenguemu bulu ruku juyu. 6 Tsejtu kaspeleya Moisésꞌ wandya leinu tsamantsa deraꞌ keranguemuꞌ mitya, Jesucristonu keranguemu chachillanu firuꞌ kenu bendaa kes nemuwaayu. Tsenmin Moisésꞌ wandya leinu uraꞌ kerangueꞌ naatiñu bain juntsanguenutalaya mu bain inu kuipa kataakenuu jutyuwa deeve, iya uraꞌ meengueꞌ juntsangue kerangueꞌ kiikemuwaañuꞌ mitya. 7 Tsejtu kaspeleya kumuinchi juntsaa jumula inchi tsamantsa bale jumuwa deeve tennaren, challaya Cristoꞌ mityaren juntsaa tene kenduya livee in jutyuwaa juꞌba aseetanguiyu. 8 Tsenmin tiba katawamu judeeshu juntsalanu in Bale Ruku Jesucristonu kayu uraꞌ keemijanu jumuba buuteꞌ pensangueꞌ keenmalaya, inchi tiba jumulanu tsaa urajtu juu detirekiyu. Tsajuꞌ Cristoꞌ mityaa tiba balejtu kuraa tireꞌ kepuntsumi juu tirekiyu, 9 tsejtaa yaba bulu chunu tiyanu. Iya Moisésꞌ wandya leinu merangueꞌ jindaa maali livee inu pensa jutyuyu, tsa jutyuꞌ, Cristonu uraꞌ keengueꞌ jindaa in kuipaꞌ mitya livee inu pensa juyu. Tsajuꞌ iya Cristonu uraꞌ keranguitaa in kuipaꞌ mitya Dioschi livee inu pensa juyu. 10 Inuya Jesucristoba buunaꞌ kayu kalen junu tenve. Tsenmin ya peyaꞌ mangujpanu pudee bain inu chusa tenve, tsenmin ya naa-i taaju imuwaañu bain inu bain juntsai taaju in chunu tenve. Tsaiꞌ ya naaju pensa pemuwaañuba inu bain tsandyanu tenve. 11 Tsejtu inu bain naa-induba peyaꞌ mangujnu ajchundenna washnanu tenve.  

 

 

 

 

 

 

 

 

 

FILIPENSES 3​, ​4  604 Nukaa tapaꞌkajinu jinduba kayu tyuinajindetyuyu.

12 Entsanditu

iya yumaa tiba detapaꞌkajiiyu tindyuyu, tsenmin Dios naajusa tyañuba yumaa juntsaa deechuꞌ juyu tindyuyu. Naa tsaañu bain, kayu ajkeshaa jintsuyu tyuinajinu tenna juꞌ mitya, matyu Jesucristo yumaa inu ajkeꞌ miꞌkeꞌ kaꞌ yachi tiremuwaañu. 13 Keranguemu naatalala, iya entsanditu yumaa detapaꞌkajiiyu titundindyuyu, tsaaren entsaaya kenu pensa juyu: kaspele tiba dekiñu jumulaya pashiꞌ, kayu keengueꞌ jintsuꞌ, ajkesha tyee junuuñuba juntsaa tapaꞌkajinu tenve, 14 tsejtaa nukaa jindu tsaindu bain tyuinajiꞌ juntsan mitya tyeeba Dioschi uukeraa jumu kanu, lalanu Jesucristoꞌ mityaa Dios kaiꞌsha tyeeba kuwanu tiñu. 15 Kumuinchi lala yumaa yanu kerangueꞌ puluꞌ pensa jumulaya entsangue pensanguenuuya dejuyu. Tsaaren ñulla juntsaatalan vee pensa dekeꞌ jatsa detyañu bain, Diosya juntsaatala bain aseetanguikaanu tsuve. 16 Tsaaren lala tinaa yumaa tapaꞌkajiiñu-iꞌ dekeemijaꞌba, juntsanuya naaju mijakarañuba tsanguen chusai. 17 Keranguemu naatalala, iya naa naaken chuñuba ñui bain juntsanguen chudei. Tsenmin lala ñullanu naake mijakaamu deeñuba juntsanguen chumulanuya, yalanu keetadiꞌ tsanguen chudei. 18 Pureꞌ bijee ñullanu papatintsuyu tennaren, entsa manbandu pensandenñu kapilaa patintsuyu: Cristo lalaꞌ mityaa peyañuren, pureꞌ chachilla juntsa kuindanu kundaa juu tene chudenave. 19 Tsejtu yalaya naa-uwanuba manbetyu ñinbaashaa jiinuu dejuve. Yaichiya yala tyee kiikenu tyaꞌba juntsaalaa yalaꞌ dyus juuñuu juve, tsenmin tiba yujtyainuu jumulaa yaichiya sundyaꞌ dajtyainuu jumula deeve. Tsajuꞌ tiba entsa tusha katawamulanu tene aa pensaa juju deeve. 20 Tsaaren lalaya selushaa chunuu jumula deeyu. Tsajuꞌ lalaya livee kemu Bale Ruku Jesucristonu selusha teꞌ maasa tenna juꞌ, tsamantsandenna keedenayu. 21 Tsaiꞌ maatu ya naakendaa entsa tunu deechuꞌ tanaꞌ tsaa jikarentsuꞌba juntsachi lalaꞌ balejtu bulunu maveteꞌ yachi tsamantsa naraa bulu jun tsaa tirenu juve.  

 

 

 

 

 

 

 

 

4

1   Tsaꞌ

Naa-uwanuba Jesucristoba bulu juꞌ sunden judei.

mitya, mangataꞌ keenu ajchundyanu in estennu keranguemu naatalala, ñulla inchi tsamantsa sundyaa jumula, tsenmin inchi pullaꞌ tyeeba naraa kakeñuu jumulaya, Bale Rukuꞌ chachi dejuꞌ tujleiꞌmujchi deechuꞌ jintsudei. 2 Evodianu bain, Síntiquenu bain entsandi pantsuyu: Ñulla Bale Rukuꞌ mitya keranguemu naatala shinbu juuñuulaya, ñuitala vee vee pensa dejutyuꞌ, ma pensaa juudei. 3 Ñu bain, iba bulu uraꞌ taawasha kemu ruku, entsa keranguemu shinbulanu kiveꞌsa tenve. Yalaa kaspele Diosaꞌ mika ura kuinda inu kivetes nemuwa deeve, tsenmin yala Clementeba bain, naa kayu veela inu bulu kemishtimu chachillaba bain inu tsanguiveꞌmuwa deeve. Entsalaa Dioschi livee dejuꞌ, yalaꞌ mumuya chunuu jumulaꞌ mumu pilla kiikasha yumaa pillaa detanave.  

 

 605

FILIPENSES 4

4 Naa-uwanuba

Bale Rukuba juꞌ sundyadei. Manen tsa mandintsuyu: ¡Sundyadei! 5 Naa ñulla aa ura chachi deeñuba kumuinchi chachilla dekeemijasa. Bale Ruku yumaa maangumanave. 6 Tiꞌ mityaba pensandyaa chutyudei, matyu ti menesteꞌba Diosba kuinda kiikeꞌ paꞌdei; tsenmin ñullaꞌ mitya Dios ti kikeñu bain, yuj uraꞌ kive tiitidei. 7 Tsenmala Dios ñullanu tiba bulla jutyu uraꞌ chuwaanu tsuve, tsaa chuwaañu chachillachiya naakeꞌ aseetanguen tsaa juve. Tsejtu tiba bulla jutyu chujtinu tsuve, ñullaꞌ tenbukasha bain, ñullaꞌ pensasha bain washkendu, ñulla yumaa Jesucristoba debuunañuꞌ mitya.  

 

 

8 Keranguemu

Uraa kenun pensaadei.

naatalala, pullaꞌbi entsandinu tenve: tyee anbuda jutyuñu bain, ti naajunaa balengurenuu juñu bain, tyee deechuꞌ juu juñu bain, tyee Dioschi uraꞌ kuraa dejuñu bain, tyee naraa juñu bain, tyee chachilla yuj urave tiꞌ sundyanuu dejuñu bain, juntsaalanaa aa pensa judei. Tsejtu kumuinchi uraanu tene, matyu uwain urave tiꞌ sundya sundyainuunu tene pensangueꞌ kiikidei. 9 Tsenmin iya tyee mijakaañu mijamuwa dejuꞌ bain, iya naati pañu meenamuwa dejuꞌ bain, iya naa kentsu keenamuwa dejuꞌ bain tsa tsanguidei. Tsenmalaa tiba bulla jutyu uraꞌ chuwaanu tiremu Dios ñuiba junu tsuve.  

10 Bale

Filipossha chulla yuj uraꞌ dekive, timi Pablo.

Rukuba juꞌ mitya yuj sundenve, ñulla inu pensa demajuñuꞌ mitya. Tsanditu ne ñulla inu tsaa pashinchi iimuwa deeve tindyuꞌ, tyeeba kemishtikenuu pensa dejuꞌba naaken tsaataa tsa deeve tenñundiyu. 11 Entsanditu iya meneste juyu tiꞌ tsandindyuyu, matyu iya naana tanamu juꞌ bain juntsachiren sunden chunu mijayu. 12 Tsejtu naa tiba tajtuu chunu bain, naa tiba pureꞌ taa chunu bain mijayu. Tsenmin naa tituba indu bain tsaa chunu bain mijayu, tsajuꞌ naa tiba fiꞌ tyubaa chunu bain, naa tiba fajtu panda mujkaa chunu bain mijayu, tsajuꞌ naa pureꞌ taa chunu bain, naa tiba tajtu juꞌ menestee chunu bain mijayu. 13 Cristo inu dera kuwaꞌ jintsuñuꞌ mitya, iya tyee iꞌ bain tiba ityumujchi tsaaren chuꞌ jintsunu tsuyu. 14 Tsejtu naa iya tsai taaju de-iꞌ puinuu juñu bain, ñulla entsangueꞌ tyeeba dekeꞌ, uraꞌ kiveꞌtu, inchi uraanuu dekive. 15 Tsenmin iya Macedonia tusha luꞌ jiꞌ Diosaꞌ mika ura kuinda mijakareꞌ ajkeꞌ peepuꞌ jintsu, naa kerangueꞌ vee vee mujtu waku wakudimulaya inu tyeeba kuwaꞌ kemishtikaatyuwa deeñu bain, ñulla Filipossha chumu keranguemulaya Diosaꞌ mika ura kuinda mijakaanu inu lushi kuwaꞌ kemishtimuwa dejuꞌba mideeve. 16 Tsejtu iya naa chaiba Tesalónica pebulusha chunu uwanun, ñulla ma bijeeya ma pullake inu lushi eemuwa deeve in menestendyanutala kiveꞌnu. 17 Entsandindu iya naa-uwanuba ñulla inu tiba demeꞌñu tene kaken chunu tenñundindyuyu, tsandimiya ñulla Diosaꞌ ajuushaa ñullaꞌ tsanguen mitya  

 

 

 

 

 

 

FILIPENSES 4  606

kayu detadisa tenñundiyu. 18 Challaya Epafroditoba ñulla tiba eedekisu juntsa dekaꞌ mika tanaꞌ, yapaba detanayu. Ñullaꞌ eedekisu juntsaya Diosnu uutyawaantsumi aindyunguikaanu ufeenda juꞌkeꞌ keewara juuñuu juuve. 19 Tsaren juꞌ in keranguenu Diosya ñulla tyee meneste deeñuba Jesucristoꞌ mityaren juntsa tiba tsamantsa naraa jumula dekuwanu tsuve. b 20 Lalaꞌ Apa Diosnu naa-uwanuba tsamantsaave tiꞌ papatisai. Tsaasa.  

 

 

21 In

De-insha palaa

mityaya millangue uraꞌ dechusa tidei kumuinchi Jesucristoꞌ mitya Diosaꞌ chachi jumulanuya. Naa iba bulu pumu keranguemu naatalala bain ñullanu uraꞌ dechusa tindetsuve. 22 Kumuinchi Diosaꞌ chachi enu pumulaya uraꞌ dechusa tindetsuve, tsaaren entsandimula naajulaa romanolaꞌ kayu aa uñichi taawasha kemu dejuꞌba, yalaa kayu tsandiꞌ uraꞌ chusa tindetsuve. 23 Matyu lalaꞌ Bale Ruku Jesucristo ñullanu estyaꞌ keewaasa.  

 

b 4.19 dekuwanu tsuve tityumujchi, dekuwade tiꞌ pakentsuyu tiꞌ aseetanguikara bain junu juve.